Ermənistanda yəhudi icması? – ermənilərin yəhudi milli hissləri ilə oynamasına dünya yəhudiləri dözəcəkmi...

Bu günlərdə Prezident İlham Əliyev yəhudi icması ilə görüşdə haqlı olaraq onları faşist Njdenin abidəsinin sökülməsinə dəstək verməyə çağırdı. Çünki bu gün yalnız Ermənistanda faşizm irsi dövlət səviyyəsində qorunur. Njdeyə abidənin ucaldılması buna əyani sübutdur.

Bu arada Ermənistan mətbuatına özünü bu ölkədəki yəhudi icmasının rəhbəri kimi təqdim edən Rimma Varjapetyan adında bir məxluq sözügedən məsələ ilə bağlı edilən çağırışa qarşı çıxıb və əsassız kəskin fikirlər səsləndirib. O iddia edib ki, guya Ermənistanın yəhudi icması bir ictimai təşkilat olaraq 1991-ci ildən bəri mövcuddur. Həmçinin bildirib ki, guya yəhudilər əsrlər boyu tarixi Ermənistan ərazisində yaşayıblar: “Bütün səviyyələrdə yəhudiləri çağırıram ki, belə çıxışlara etibar edilməməlidir. Bu, başqa bir təxribatdır, təkcə Ermənistana deyil, ilk növbədə, yəhudilərin özlərinə qarşı təhqirdir ”.

Açıq-aşkar görünür ki, R.Varjapetyan yəhudilərin milli hissləri ilə oynayır. Məsələ ondadır ki, Ermənistan monoetnik dövlətdir. Məgər Ermənistanda yəhudilər yaşayırlar? Ermənistanda azsaylı etniklərdən yalnız yezidi kürdlər qalmışdılar ki, onlar da son illər ciddi assimilyasiyaya məruz qalıblar. Daha konkret desək, ölkədən müxtəlif vasitələrlə çıxarılıblar. Bir müddət Ermənistan hakimiyyəti istədi ki, yezidi kürdlərin adından istifadə etsin, amma alınmadı. İndi də yəhudilərin adından istifadə edilir. Hansı ki, bu ölkədə yəhudilərin varlığından söhbət gedə bilməz. Ona görə ki, Ermənistanda yəhudilər yaşamırlar. Ancaq ermənilər bununla yəhudilərin milli hissləri ilə oynayırlar. Ona görə də yəhudi təşkilatları buna dözməməli və məsələyə öz kəskin münasibətlərini bildirməlidirlər.

• “Müasir dünyada faşizmi təbliğ etmək yəhudiliyə qarşı gəlmək deməkdir”

Sözügedən məsələ ilə bağlı fikirlərini “Bakı-Xəbər”lə bölüşən politoloq Məhəmməd Əsədullazadənin sözlərinə görə, bütün bunlar ermənilərin növbəti fitnəkarlığıdır. O üzdən, yəhudi təşkilatları buna öz münasibətini bildirməlidirlər: “Prezident İlham Əliyevin Ermənistanda faşizmin təbliği simvoluna çevrilən Qaregin Njdenin abidəsi barədə qeyd etdikləri, göründüyü kimi, bu ölkədə ciddi narahatlıq yaradıb. Çünki yaxşı bilirlər ki, faşizm bir insanlıq cinayətidir. Həmçinin, yəhudilərin Holokostunun əsas səbəbkarıdır. Müasir dünyada faşizmi təbliğ etmək yəhudiliyə qarşı gəlmək deməkdir. Hesab edirəm ki, Prezident İlham Əliyevin faşist Njdenin abidəsinin sökülməsi barədə yəhudi lobbisinə müraciəti məhz sülh və əməkdaşlığın regionda inkişafına hesablanıb. Digər tərəfdən, Ermənistanda yəhudi icması yoxdur. Orada özləri üçün yaratdıqları qondarma yəhudi icması isə yəhudiliyə savaş açmaq deməkdir. Bu gün Azərbaycanla beynəlxalq yəhudi icması arasında sıx əməkdaşlıq atmosferi mövcuddur. Göründüyü kimi, ermənilərin özlərindən guya Ermənistanda yəhudi icması yaratması, qondarma icma sədrini mətbuata çıxarması açıq təxribatdır. Ona görə də yəhudi icmasını hərəkətə gətirmək lazımdır. Çünki Ermənistan daim belə bir aldadıcı manevrlərlə dünyanı aldadır. Azərbaycan bu barədə beynəlxalq yəhudi icmasını məlumatlandırmalıdır. Onların adından istifadə edildiyi bəyan olunmalıdır. Belə bir həyasız hərəkətin qarşısı alınmalıdır. Yəhudi icmasını bu kimi məsələlərin qarşısını almağa çağırıram”.

Vidadi ORDAHALLI