11/12/2019 04:54
728 x 90

Müsavat Partiyası niyə çalxalanır - prosesin siyasi, şəxsi-emosional və strateji kökləri...

img

Hiss olunur ki, son vaxtlar daha çox çalxalanan partiyalardan biri Müsavatdır. Düzdür, bu partiya zaman-zaman daha ciddi yarpaq tökümlərinə məruz qalıb. Demək olar ki, partiyanın üzvü olan bütün tanınmış ziyalılar qurumu tərk edib.

Müsavatın tamamilə parçalanması isə başqan dəyişikliyinin reallaşdığı 2014-cü ildəki qurultaya təsadüf etdi. Həmin qurultayda İsa Qəmbər başqanlıqdan getdi. Onun yerinə yeni başqan seçildi. Əsas iddialılar Qubad İbadoğlu ilə Arif Hacılı idi. Çox cüzi səslə Qubad İbadoğlu Arif Hacılıya məğlub oldu. Bununla razılaşmayan Qubad İbadoğlu və tərəfdarları partiyanı tərk edərək ADR adlı yeni hərəkat yaratdılar. Partiyanı tərk edənlər bildirdilər ki, orada yalnız brend kimi Müsavat adı və Arif Hacılının ətrafı qalıb.

Sonuncu qurultayda da vəziyyətin gərginliyi, partiya daxilində qruplaşmaların bir-birinə qarşı barışmaz mövqedə olması üzə çıxdı. Bunun ardınca isə Müsavatın adı mühacir qalmaqalında çəkilməyə başladı. Almaniya Polisinin keçirdiyi əməliyyat nəticəsində Müsavatın Avropa qanadının bir neçə funksioneri həbs olundu. Bu faktın özü də göstərdi ki, Müsavatın daxilində vəziyyət heç də ürəkaçan deyil. Çünki partiya rəhbərliyi kənardan daha çox indiki və sabiq üzvləri tərəfindən tənqid edildi. Müsavatın bu şəkildə çalxalanmağının səbəbini nə ilə izah etmək olar?

  • Səxavət Əlisoy: “2014-cü ildən sonra ləyaqətçiliyi saxtakarlıqla əvəz etdilər”

Uzun müddət Müsavat Partiyasının rəhbər strukturlarında çalışan, 2014-cü ildə başqanlığa namizəd olan Səxavət Əlisoy qəzetimizə açıqlamasında bildirdi ki, bu gün Müsavatı daha çox onun daxilindən tənqid edirlər: “Həmin adamların adını da çəkə bilərəm. Yadigar Sadıqlı, Elman Fəttah, Yafəs Əkrəmoğlu Arif Hacılının başqan seçilməsi üçün dəridən-qabıqdan çıxdılar. Məhz həmin adamlar sosial şəbəkələrdə mənim əleyhimə yazılar yazırdılar. Niyəsini bilirsiniz? Mən Arif Hacılının başqan olmasına qarşıydım. Bugünkü fəlakəti qabaqcadan görə bilirdim. Onlar isə A.Hacılını xilaskar gözündə görürdülər. Hazırda Müsavatı yıxıb yerə sürüyən də elə həmin adamlardır. Onlar burunlarından uzağı görsəydilər, Müsavat bu günə düşməzdi. Hesab edirəm ki, partiyanın bu şəkildə nüfuzdan düşməsinin bir səbəbkarı var, o da A.Hacılıdır. A.Hacılı həqiqətən “böyük” siyasətçidir. Çünki Müsavat Partiyasının dağıdılmasında onun böyük zəhməti olub. Görün nə qədər böyük adamdır ki, Müsavat kimi partiyanı bir dərnəyə çevirməyi bacardı. Biz sadə müsavatçını necə qınaya bilərik? Ömrünü bunlara həsr edən sadə müsavatçı təbii ki, yaranmış vəziyyəti ürək ağrısı ilə izləyir və təəssüf keçirir. 2014-cü ildə obyektiv mövqe tutmaq lazımıydı. O vaxt 6 səs çoxluğu ilə Hacılı başqan seçilə bilməzdi. Fəlakətin əsası elə ondan başladı. Bir müəssisədə baş verən nöqsana görə oranın başçısından hesab soruşulur. Burada da məsuliyyəti A.Hacılı daşıyır. Naxçıvandan, Zaqataladan olan sıravi müsavatçının burada heç bir təqsiri ola bilməz. Sonda bir şeyi demək istəyirəm. Müsavat Partiyasının təməl prinsiplərindən biri ləyaqətçilikdir. Elə bilirəm bunun nə olduğunu geniş açıqlamağa zərurət yoxdur. 2014-cü ildən sonra ləyaqətçiliyi saxtakarlıqla əvəz etdilər. Elə buna görə də Müsavat bu şəkildə çalxalanır”.

Məhəmmədəli QƏRİBLİ

Son xəbərlər