11/12/2019 03:51
728 x 90

Paşinyan pozucu “üçbucaqlı Qarabağ həlli” ideyasından Avropada da əl çəkmədi – Azərbaycan, Ermənistan və “DQR” xalqları...

Fikrət Sadıqov: “Deyilənlər o qədər absurd ifadələrdir ki, Paşinyanın bu fikirlərini ciddi qəbul etmək mümkün deyil”

img

Ermənistan Baş naziri Nikol Paşinyan Qarabağ danışıqları ilə bağlı pozucu fikirlərini növbəti dəfə təkrarlayıb. O, Milandakı kilsədə keçirdiyi görüşdə bildirib ki, Dağlıq Qarabağ münaqişəsinin istənilən həlli Ermənistan, “Artsax” və Azərbaycan xalqları üçün məqbul olmalıdır:

“Mən sülh formulu təqdim etmişəm. Demişəm ki, Dağlıq Qarabağ münaqişəsinin nizamlanması Ermənistan xalqı, “DQR” xalqı və Azərbaycan xalqı üçün məqbul olmalıdır. Yeri gəlmişkən qeyd etmək lazımdır ki, Dağlıq Qarabağ məsələsinin həllinin həm də Azərbaycan xalqı üçün məqbul olmasını bəyan edən ilk erməni lideriyəm. Bunun üçün Ermənistanda məni tənqid ediblər. Onlar deyiblər ki, Ermənistanın lideri Azərbaycan xalqı üçün niyə narahat olmalıdır? Ümidvaram ki, Azərbaycan Prezidenti də belə bəyanatla çıxış edəcək”.

N.Paşinyan onu da qeyd edib ki, Dağlıq Qarabağ münaqişəsinin nizamlanmasına dair onun “düsturu” budur: “Bu isə o deməkdir ki, mən nə Serj Sarkisyanın, nə Robert Koçaryanın, nə də Levon Ter-Petrosyanın düsturundən istifadə etmək niyyətində deyiləm”.

Bu yanaşmanın nədən ibarət olduğu barədə suala isə Paşinyan belə cavab verib: “Əgər mən deyirəmsə hər hansı bir həll üç xalq üçün məqbul olmalıdır, onda belə bir həllə bağlı istədiyimizi söyləmək o qədər də konstruktiv deyil. Mən Azərbaycan Prezidentini və ATƏT-in Minsk Qrupunun həmsədrlərini münaqşənin üç tərəf üçün məqbul olan bir həlli üzərində işləməyi təklif edirəm. Bu çox çalışmaqla əldə edilə bilən nəticədir və tərəfdaşlarımızı, dostlarımızı bunun üzərində işləməyə dəvət edirəm”.

Göründüyü kimi, Paşinyan təklif etdiyi absurd variantdan əl çəkmək istəmir. O, Baş nazir olandan bəri separatçı tərəfin danışıqlarda tərəf olması istıqamətində səy göstərir. Baxmayaraq ki, bu variantı Azərbaycan və həmsədrlər qəbul etmir, amma Paşinyan yenə də bu cür cəfəng fikirlərdən əl çəkmir.

  • “Onun əsas məqsədi odur ki, danışıqlar prosesi uzansın”

Məsələyə münasibət bildirən keçmiş diplomat, politoloq Fikrət Sadıqovun sözlərinə görə, Paşinyan o cür cəfəng fikirlər səsləndirməklə anlamır ki, Avropa da dəyişib: “Avropa 90-cı illərin Avropası deyil. Avropada Azərbaycanın diplomatiyası, lobbisi və bir sözlə, təbliğat maşını kifayət qədər işləyir. Avropa təsisatlarında Azərbaycanın nümayəndə heyətləri fəaliyyət göstərirlər. Paşinyan öz aləmində düşünür ki, yeni Baş nazir olaraq münaqişənin həlli ilə bağlı Avropada belə təkliflərlə çıxış etsə, ona inanacaqlar. Ancaq bu belə deyil. Çünki “Dağlıq Qarabağ xalqı” anlayışı absurddur. Erməni xalqı neçə xalq ola bilər? Belədirsə, onda dünyanın ayrı-ayrı yerlərində yaşayan ermənilər ayrıca xalq kimi götürülməlidir. Yəni deyilənlər o qədər absurd ifadələrdir ki, Paşinyanın bu fikirlərini ciddi qəbul etmək mümkün deyil. O, sadəcə, bu cür fikirlər səsləndirməklə məsuliyyəti üzərindən atmağa çalışır. Onun əsas məqsədi odur ki, danışıqlar prosesi uzansın. Ona görə də təkrar-təkrar separatçı tərəfin danışıqlarda tərəf olması ilə bağlı səy göstərir”.

Vidadi ORDAHALLI

Son xəbərlər