11/12/2019 04:44
728 x 90

MDB məkanı üçün vahid təhlükəsizlik platformasında Azərbaycanın yeni rolu - Ramil Usubovun Moskva səfəri...

Arzu Nağıyev: “Rusiya bilir ki, ABŞ və ya Qərb bu amildən məharətlə istifadə edə bilər”

img

Noyabrın 20-də Moskvada MDB ölkələri təhlükəsizlik şuraları katiblərinin iclası keçirilib. Azərbaycan Təhlükəsizlik Şurasının katibi Ramil Usubov iclasda iştirak edib.

İclas iştirakçıları MDB məkanında regional təhlükəsizliyin təmin olunması, təhlükəsizlik şuraları xətti ilə beynəlxalq əməkdaşlıq, qlobal təhlükəsizlik və strateji sabitliyə dair mövzuları və ABŞ-ın suveren dövlətlərin daxili işlərinə qarışmasını müzakirə ediblər.

Rusiya Federasiyası Təhlükəsizlik Şurasının katibi Nikolay Patruşev iclasın açılışında çıxış edərək bildirib ki, iştirakçılar MDB məkanında təhlükəsizliyin təmin olunması məqsədilə mövcud problemlərin həllinə birgə yanaşmaları işləyib hazırlayacaqlar.

Rusiya KİV-nin verdiyi məlumata görə, artıq Ramil Usubovla Nikolay Patruşev arasında 2020-2021-ci illər üçün birgə əməkdaşlıq planı haqda saziş imzalanıb. Bildirilir ki, bundan əvvəl Usubovla Patruşev arasında Bakıda görüş olub və həmin vaxt təhlükəsizliklə bağlı ətraflı fikir mübadiləsi aparılıb. Patruşev öz çıxışında bildirib ki, Azərbaycanla əməkdaşlığın genişlənməsinə böyük önəm  verir. Göründüyü kimi, MDB məkanı üçün vahid təhlükəsizlik platformasının hazırlanacağına dair anons verilib. Bu platformada Azərbaycanın yeni rolu nədən ibarət ola bilər?

  • “Azərbaycan özünü müdafiə etməyə qadir olan ölkədir”

Təhlükəsizlik məsələləri üzrə ekspert Arzu Nağıyev “Bakı-Xəbər”ə açıqlamasında bildirdi ki, dünyada və regionda baş verən vacib proseslərin fonunda belə bir tədbirin keçirilməsi çox təqdirəlayiqdir: “MDB  təhlükəsizlik şurası katiblərinin məhz belə bir həssas məqamda bir araya gəlməsi və müəyyən qərarlar qəbul etməsi müsbət dəyərləndirilməlidir. Azərbaycan da MDB məkanına daxil olan bir dövlətdir. Bizim Rusiya və bir sıra MDB ölkələri ilə su və quru vasitəsilə sərhədlərimiz var. Təhlükəsizliklə bağlı təhdidlərin qarşısını almaq üçün koordinasiyalı şəkildə müəyyən addımların atılması zəruridir. Lakin bu o demək deyil ki, vahid sistemin yaradılmasında Azərbaycan Rusiyadan daha çox maraqlıdır. Rusiya öz sərhədləri boyunca bir bufer zona yaratmağa çalışır ki, baş verə biləcək hər hansı təhdidin qarşısının ilkin alınmasında onun tərəfdaşları da yaxından iştirak etsinlər. Azərbaycanı da bu rolda görürlər. Ölkəmizin şimal sərhədləri ilə Rusiyanın cənub sərhədinə düşən ərazisi o qədər də sakit zona kimi xarakterizə edilmir. Həmin coğrafiyada baş verə biləcək hər hansı bir insident, xüsusilə də Dağıstan istiqamətində terrorçuların hərəkətə gəlməsinin qarşısının alınmasında Rusiya Azərbaycanın roluna güvənir. Burada əsasən söhbət kəşfiyyat məlumatlarının mübadiləsindən gedir. Ancaq yaradılması barədə söhbət gedən vahid sistemdə müəyyən anlaşılmazlıqlar da yaşana bilər. Bilirsiniz ki, MDB ölkələrindən biri digərinin ərazisini işğal edib. Nə qədər ki, Ermənistan işğaldan əl çəkməyib, bizimlə İrəvan arasında birgə sistemin olması mümkün deyil. Yəni bu sistem bütün MDB ölkələri arasında işləyə bilməz. Düşünürəm ki, burada Rusiya daha çox öz maraqlarını güdür. Bundan əvvəl Rusiyanın xüsusi xidmət orqanlarının rəhbərləri Orta Asiya regionunda vəziyyətin gərginləşə biləcəyi ilə bağlı proqnozlar verirdilər. Həmin ölkələrdə müəyyən dini radikal qrupların fəallığı nəzərə çarpır. Rusiya bilir ki, ABŞ və ya Qərb bu amildən məharətlə istifadə edə bilər. Bu səbəbdən də əsas diqqət o istiqamətə yönəlməlidir”.

Ekspertin sözlərinə görə, Azərbaycan özünü müdafiə etməyə qadir olan ölkədir: “Türkdilli ölkələrin xüsusi xidmət orqanlarının burada keçirdikləri görüşdə məlum oldu ki, Azərbaycan müttəfiq ölkələrlə ikitərəfli qaydada, koordinasiyalı şəkildə məlumat mübadiləsini aparır. Vahid sistemin yaradılmasında başlıca maraqlı olan ölkə Rusiyadır. Çünki nəhəng ölkə kimi ona edilən təhdidlərin həcmi də böyükdür. Buna görə də Rusiya hətta NATO üzvü olan Türkiyə ilə də tərəfdaşlıq edir. Hesab edirəm ki, MDB məkanındakı dövlətlərin arasında ikitərəfli əməkdaşlığın perspektivi vahid sistemin yaradılmasından daha çoxdur. Rusiya ilə bu sahədə məlumat mübadiləsi aparmağımızın da bizə yalnız xeyri var. Vahid sistemin yaradılmasında da inanıram ki, Azərbaycan öz iqtisadi, milli və hərbi maraqlarını önə çəkib, yekun rəyini ortaya qoyacaq”.

Məhəmmədəli QƏRİBLİ

Son xəbərlər