Dekabrın 23-də keçiriləcək bələdiyyə seçkilərində iştirak etmək üçün 41 841 nəfər müraciət edib, onlardan 22 529 nəfərin namizədliyi qeydə alınıb. Bu barədə Mərkəzi Seçki Komissiyası məlumat yayıb.
Qurumdan bildirilib ki, 27 249 nəfər fərdi qaydada müraciət edib. 14 564 nəfərin namizədliyi siyasi partiyalar tərəfindən, 28 nəfərin namizədliyi isə təşəbbüs qrupları tərəfindən irəli sürülüb. Bələdiyyə seçkilərində iştirak etmək üçün müraciət edən siyasi partiyaların sayı 10-a çatıb. Bunlar Yeni Azərbaycan Partiyası (YAP), Azərbaycan Demokratik İslahatlar Partiyası, Böyük Quruluş Partiyası, Vətəndaş Birliyi Partiyası, Bütöv Azərbaycan Xalq Cəbhəsi Partiyası, Milli Dirçəliş Hərəkatı Partiyası, Azərbaycan Demokrat Maarifçilik Partiyası, Azərbaycan Sosial Demokrat Partiyası, Azərbaycan Ümid Partiyası və Ana Vətən Partiyasıdır.
Azərbaycanda bələdiyyə seçkiləri 1999-cu ildən keçirilir. Cari ildə keçiriləcək seçkilər sayca 4-cü olacaq. Respublika üzrə 1606 bələdiyyəyə 15 min 156 üzv seçiləcək. Sonuncu bələdiyyə seçkisi 2014-cü il dekabrın 23-də keçirilib.
Diqqətçəkən məqamlardan biri beş il əvvəlki dövrlə müqayisədə namizədlərin sayında müşahidə edilən azalmadır. Məsələ ondadır ki, 2014-cü ildə keçirilən bələdiyyə seçkilərində 37 min 77 nəfər namizədliyini irəli sürüb. Ancaq bu dəfə keçiriləcək seçkilərdə namizədlərin sayı 15 min nəfər azaldı. Son illər bələdiyyələrlə bağlı qanunvericilik təkmilləşdirilir, bir sıra digər işlər görülür. Belə olan halda, bələdiyyələrə ictimai maraq niyə aşağıdır? Ümumən, namizədlərin sayının az olması nə ilə bağlıdır?
“Namizədlərin sayında artıma nail olmaq üçün, ilk növbədə, bələdiyyə institutuna münasibət dəyişməlidir”
Məsələyə münasibət bildirən bələdiyyələr üzrə ekspert Abil Bayramovun sözlərinə görə, bunun bir sıra səbəbləri var: “Bunun birinci səbəbi ümumi seçici fəallığının aşağı olmasıdır. İkincisi, bələdiyyələrlə bağlı gözləntilərin azalması ilə bağlıdır. Nəzərə almaq lazımdır ki, bələdiyyənin özünə maraq azalıb. Çünki əvvəllər bələdiyyədən daha çox gözlənti var idi. İndi həmin gözlənti əsasən özünü doğrultmadığına görə namizədliyini verənlərin sayı da kəskin şəkildə azalıb. Əsasən bununla əlaqədar belə vəziyyət yaranıb. Namizədlərin sayında artıma nail olmaq üçün, ilk növbədə, bələdiyyə institutuna münasibət dəyişməlidir. Bələdiyyələr doğrudan da yerli hakimiyyət qurumları kimi nəzərdən keçirilməlidirlər. Buna uyğun da həm bələdiyyələrə konkret səlahiyyətlər verilməli, həm də dayanıqlı maliyyə mənbələri ilə təmin edilməlidirlər. Bələdiyyələr həmin maliyyə mənbələrindən istifadə etməklə o səlahiyyətləri icra etmiş olsunlar. Nəticədə əhali bələdiyyədən keyfiyyətli ictimai xidmətlər ala bilsin. Vətəndaş bələdiyyədən keyfiyyətli xidmət ala bilmirsə, o zaman bələdiyyə seçkilərinə maraq ola bilərmi? Təbii ki, yox. Hesab edirəm ki, bu istiqamətdə ciddi addımlar atılmalıdır. Ümumilikdə, bu sahədə vətəndaş iştirakçılığının səviyyəsinin artırılmasına ehtiyac var. Onun səviyyəsinin aşağı olması seçkilərə də öz təsirini göstərir. Xüsusən də bələdiyyə seçkilərində bunu açıq-aşkar görmək mümkündür”.
Vidadi ORDAHALLI
