Məhəmməd Əsədullazadə: “Bakı və Paris arasında olan siyasi-iqtisadi əlaqələr bundan sonra erməni lobbisinin kölgəsində olmayacaq”
Azərbaycan Avropa İttifaqının aparıcı ölkələrindən biri olan Fransa ilə əlaqələrin inkişafına hər zaman xüsusi önəm verib. Bir neçə gün əvvəl Prezident İlham Əliyevin Fransaya növbəti səfərini tarixi hadisə hesab etmək olar. Səfər çərçivəsində dövlət başçısı çoxsaylı rəsmi, eləcə də Fransanın 11 şirkətinin nümayəndələri ilə səmərəli işgüzar görüşlər keçirib.
Azərbaycanla Fransa şirkətləri arasında 2 milyard dollardan çox dəyərində müqavilələr imzalanıb. Onu da qeyd edək ki, Fransa iqtisadi gücünə görə Avropa İttifaqının ilk üçlüyünə daxildir. İqtisadi əlaqələrin bu səviyyədə inkişafı isə, istər-istəməz, siyasi, diplomatik münasibətlərə də təsir edir. Bu isə Ermənistan-Azərbaycan, Dağlıq Qarabağ münaqişəsinin ədalətli həllində böyük əhəmiyyət kəsb edir. Çünki hazırda Qarabağ münaqişəsinin tənzimlənməsi ilə bağlı danışıqlara vasitəçi olan ATƏT-in Minsk Qrupunun həmsədrlərindən biri Fransadır. Heç şübhəsiz, bu ölkə ilə siyasi-iqtisadi əlaqələrin inkişafı məhz Dağlıq Qarabağ münaqişəsinin həllində önəmli rol oynaya bilər.
O da məlumdur ki, uzun illərdir Fransada güclü, oturuşmuş erməni lobbisi fəaliyyət göstərir. Dağlıq Qarabağ münaqişəsi alovlananda sözügedən lobbi bu ölkədə Azərbaycan barəsində mənfi rəyin yaradılmasında xüsusi rol oynayıb. Düzdür, ötən illər ərzində görülən işlər sayəsində bununla bağlı bir sıra problemlər öz həllini tapıb. Yəni Fransa daha əvvəlki kimi erməni təbliğatının təsiri altına düşüb onların yalanlarına inanmır. Ancaq yenə də görüləsi işlər var. Bu baxımdan Fransa şirkətlərinin Azərbaycan iqtisadiyyatının inkişafında fəal iştirak etməsi, sərmayə qoymaları perspektivdə bu ölkədə erməni lobbisinin zəiflədilməsində, onların ölkəmizə qarşı fəaliyyətinin neytrallaşdırılmasında necə rol oynaya bilər?
Sözügedən məsələni “Bakı-Xəbər”ə şərh edən politoloq Məhəmməd Əsədullazadə bunu bir nəçə aspektdən dəyərləndirdi: “Azərbaycan müstəqilliyini əldən etdikdən sonra əsas ticari tərəfdaşlarından biri Fransa olub. Fransa şirkətlərinin ölkəmizin müxtəlif sahələrinə, əsasən neft sənayesinə sərmayə qoyması ikitərəfli siyasi əlaqələrin inkişafında dinamika olub. Qeyd edim ki, Fransanın dünyaca məşhur TOTAL şirkəti bu gün Azərbaycanın neft sənayesində əsas paya sahib olaraq ölkəmizin iqtisadiyyatına töhfə verir. O da məlumdur ki, hər bir şirkətin fəaliyyəti onun mənsub olduğu ölkənin siyasəti ilə bağlıdır. Bu gün Fransanın TOTAL şirkəti birbaşa rəsmi Parisin iqtisadi və siyasi layihəsidir. Məhz TOTAL və digər Fransa şirkətlərinin ölkəmizdə fəaliyyəti Paris və Bakı arasında əsas strateji körpüdür. Fikir versək görərik ki, bu şirkətlərin arxasında Fransa Senatı və hökuməti durur. Hazırda Fransada erməni lobbisi də güclü təşkilatlardan biridir. Fransadan ölkəmizə qarşı erməni lobbisinin anti-Azərbaycan təbliğatı daim bu ölkənin hakim dairələrinin diqqətinə aşılanıb. Erməni lobbisinin ciddi cəhdlərinə baxmayaraq, Fransa öz dövlət siyasəti və milli maraqları çərçivəsində Azərbaycana xüsusi yanaşıb. Dövlət başçısı İlham Əliyevin Fransaya səfəri, Prezident Makronla görüşü və burada ölkənin biznes elitası ilə görüşləri, Azərbaycana sərmayə qoymağa bir daha dəvət etməsi ikitərəfli əlaqələrin inkişafı üçün yeni səhifə açdı. Fransanın silah şirkətlərinin də marağında Azərbaycanın olmasına nəzər yetirsək, artıq görünür ki, erməni lobbisinin Azərbaycanla işi, demək olar, fiaskoya uğrayır. Fransa şirkətləri öz mənfəətlərini boş erməni təbliğatına qurban vermək istəmirlər. Rəsmi Bakı da bu xüsusda çevik diplomatiya aparmalı, Fransa şirkətləri vasitəsilə erməni lobbisinin fəaliyyətini sıfıra endirməlidir. Bu gün dünyada enerji və iqtisadi müharibə gedir. Fransa şirkətləri daim bu iqtisadi müharibədə öndə olublar, öz maraqları naminə rəsmi Parisin siyasətinə ciddi təsir ediblər. Hesab edirəm ki, hazırda bu siyasət davam edir. Bakı və Paris arasında olan siyasi-iqtisadi əlaqələr bundan sonra erməni lobbisinin kölgəsində olmayacaq”.
Vidadi ORDAHALLI
