Müşfiq Ələsgərli: “Qərəzli olubsa da, bu onun şəxsi mövqeyi olmayıb”
Məlum olduğu kimi, yanvarın 22-də Fransanın Strasburq şəhərində AŞPA-nın qış sessiyası öz işinə başlayıb. Yanvarın 26-a qədər davam edəcək qış sessiyasında quruma yeni prezident və insan haqları üzrə komissar seçilib.
Qış sessiyasında müzakirəyə çıxarılan məsələlər əsasən münaqişə zonalarındakı humanitar fəlakətlər, sülh və barışın əldə olunması, dözümlülük və tolerantlıq, Avropada antisemitizm, islamofobiya və ksenofobiya hallarının artması ilə bağlı olub. Konkret olaraq, Ukraynadakı mövcud münaqişə ocaqlarında humanitar fəlakətlə bağlı müzakirələr aparılıb, İsrail və Fələstin arasında sülhün əldə edilməsi yolları araşdırılıb, Avropa Şurasının baş katibi öz prioritetlərini açıqlayıb, insan haqları üzrə komissar isə 2017-ci il üçün illik hesabatını təqdim edib. Bu arada Avropa Şurasının (AŞ) insan haqları üzrə yeni komissarının adı məlum olub. Avropa Şurası Parlament Assambleyasının qış sessiyasında keçirilən səsvermənin nəticələrinə əsasən, bu posta Dunya Miyatoviç (Bosniya və Herseqovina) seçilib. Qeyd edək ki, bundan əvvəl Avropa Şurasının insan haqları üzrə komissarı Nils Muyjnieks olub. O bu postda 2012-ci ildən fəaliyyət göstərib. Yeni komissarın adı Azərbaycana yaxşı məlumdur. Xanım Miyatoviç uzun müddət ATƏT-in media azadlığı üzrə nümayəndəsi olub və həmin fəaliyyəti ərzində Azərbaycana qarşı daim tənqidi mövqe bəsləyib. Belə reputasiyada olan bir xanımın daha bir böyük səlahiyyətli vəzifəyə təyinatı Azərbaycan üçün nə vəd edir? Qərara gəldik ki, bu barədə Miyatoviçi yaxşı tanıyan ekspertlərin münasibətini öyrənək.
Azərbaycan Mətbuat Şurasının sədr müavini Müşfiq Ələsgərli qəzetimizə açıqlamasında bildirdi ki, o, Dunya Miyatoviçi yaxından tanıyır: “Xatırladım ki, mən onunla bir çox beynəlxalq tədbirlərdə görüşmüşəm. İşini yaxşı bilən professional bir adam kimi xarakterizə edə bilərəm. Bəli, onun Azərbaycanla bağlı neqativ fikirləri olub. Ancaq yalnız tənqidi fikirlər söyləməyib, pozitiv danışdığı hallar da var. Bizi tənqidi fikirlərin söylənilməsi də dərindən narahat etmir. İş burasındadır ki, həmin neqativ fikirlərin içində qərəzli yanaşma çox olub. Beynəlxalq qurumların iş prinsipinə yaxşı bələd olan adam kimi deyə bilərəm ki, həmin təsisatların tutduqları mövqedə şəxsiyyətlərin rolu az olur. Yəni hansısa fərdin prosesə təsir etmək imkanı olduqca zəifdir. Bunu Dunya Miyatoviçə də şamil edə bilərəm. Əslində, bu məsələyə ən dolğun cavabı Davosdakı çıxışı zamanı cənab İlham Əliyev verdi. Azərbaycandakı media azadlıqları və insan haqları ilə bağlı suala cavabında Prezident aydın şəkildə ifadə etdi ki, belə üsullarla ölkəmizə təzyiq etməyə çalışırlar. Əslində, vəziyyətin belə olduğunu biz də bilirdik, ancaq Prezidentin səsləndirdiyi fikir mahiyyəti tam açmış oldu. Ancaq gəlin bir faktı da etiraf edək ki, beynəlxalq qurumlara bəzən elə adamlar rəhbərlik edirlər ki, onların sırf Azərbaycana deyil, bütün İslam dünyasına nifrəti olur və bunu gizlətmirlər. Dunya Miyatoviçi o kateqoriyaya aid etməzdim. Qərəzli olubsa da, bu, onun şəxsi mövqeyi olmayıb. Ümidvaram ki, Azərbaycanı yaxından tanıyan Miyatoviç yeni təyin olunduğu vəzifəsində obyektiv və ədalətli mövqe sərgiləyəcək”.
Məhəmmədəli QƏRİBLİ
