Qabil Hüseynli: “ABŞ qlobal enerji təhlükəsizliyinin gücləndirilməsində, o cümlədən Xəzər regionunda enerji resurslarının işlənməsi və ixracında Azərbaycanın oynadığı rolu yüksək dəyərləndirir”
ABŞ Dövlət Departamentinin yüksək rütbəli nümayəndəsi Azərbaycan təbii qazını Avropaya nəql edəcək “Cənub Qaz Dəhlizi” layihəsini dəstəklədiyini bəyan edib. ABŞ rəsmisi bildirib ki, onlar illik keçirilən məşvərət şurasının iclasında iştirak etmək niyyətindədirlər.
Qeyd edək ki, həmin tədbir 15 fevral tarixində Bakı şəhərində keçiriləcək. “Bu layihə ilə bağlı keçirilən toplantı bizim üçün böyük əhəmiyyət kəsb edir. ABŞ layihədə təmsil olunan ölkələrlə işlərin uğurla başa çatması, diversifikasiya ilə bağlı ortaya çıxacaq maneələrin aradan qaldırılması istiqamətində məsləhətləşmələr aparmağı zəruri sayır”- deyə, ABŞ rəsmisi bildirib.
Qeyd edək ki, məşvərət şurasının ilk toplantısı 12 fevral 2015-ci ildə, ikincisi 29 fevral 2016-cı ildə, üçüncüsü isə 23 fevral 2017-ci ildə baş tutub. Qeyd edək ki, bu, ABŞ-ın “Cənub Qaz Dəhlizi” layihəsilə bağlı verdiyi ilk dəstək bəyanatı deyil. ABŞ-ın ardıcıl olaraq bu layihəni dəstəkləməsinin səbəbi nədir?
Politoloq Qabil Hüseynlinin sözlərinə görə, ABŞ-ın “Cənub Qaz Dəhlizi” layihəsini dəstəkləməsinin ciddi səbəbləri var: “Yadınızdadırsa. keçən il ABŞ prezidenti Donald Trampın Bakıda keçirilən 24-cü Beynəlxalq Neft və Qaz Sərgisinin rəsmi açılış mərasimi ilə əlaqədar ünvanladığı məktubda da oxşar cümlələr yer alıb. ABŞ prezidenti bildirib ki, ABŞ “Cənub Qaz Dəhlizi”ni dəstəkləyir, Prezident İlham Əliyevlə işləməyə hazırdır. Donald Tramp ABŞ-ın Azərbaycanla birgə həyata keçirilən layihələrə böyük önəm verdiyini, Azərbaycanın inkişafını, enerji təhlükəsizliyinin qorunması yönündə səylərini dəstəklədiyini də xüsusi qeyd edib. ABŞ-ın ən böyük əhəmiyyət verdiyi strateji bölgələrdən biri də Cənubi Qafqaz, Azərbaycan və Gürcüstandır. Azərbaycanın xüsusi çəkisi bu yöndə daha ağırdır. Azərbaycan Avropa və Asiya qitələrinin birləşdiyi bir nöqtədə yerləşir, Xəzərin karbohidrogen ehtiyatlarının Avropaya nəql edilməsində çox önəmli rol oynayır. Söhbət tək neftdən yox, həm də “mavi yanacaq”dan gedir. ABŞ Azərbaycanın liderliyi ilə həyata keçirilən qlobal enerji layihələrini, o cümlədən “Cənub Qaz Dəhlizi”ni qəti surətdə dəstəkləməkdə davam edir, Azərbaycanın və beynəlxalq tərəfdaşların onun tamamlanmasına yönəlmiş səylərini alqışlayır. ABŞ Azərbaycanı Avropa üçün yeni enerji mənbəyi hesab edir. ABŞ qlobal enerji təhlükəsizliyinin gücləndirilməsində, o cümlədən Xəzər regionunda enerji resurslarının işlənməsi və ixracında Azərbaycanın oynadığı rolu yüksək dəyərləndirir.
Bu, ABŞ-ın yeni administrasiyasının bölgə problemlərinə yanaşmasının ifadəsidir. ABŞ. əvvəlki dövrlərdə olduğu kimi, öz xarici siyasətini digər ölkələrin daxili işlərinə müdaxilə, onları idarə etməyə çalışmaq prinsipi üzərində qurmayacaq. Bu siyasət iki ölkə arasında faydalı və bərabərhüquqlu əməkdaşlığın, strateji tərəfdaşlıq əlaqələrinin daha da inkişaf etdirilməsini nəzərdə tutur. ABŞ rəsmiləri tərəfindən söylənən fikirlərdə ölkələr arasında ikitərəfli münasibətlərin yeni dönəminin başlandığına işarə edilir”.
Məhəmmədəli QƏRİBLİ
