Şəmsəddin Əliyev: “Bütün bunlar yol polisi əməkdaşlarının fəaliyyətinə, davranışına müsbət təsir edəcək”
“Polis əməkdaşları hərəkət iştirakçıları ilə ünsiyyətdə etik davranış qaydalarına daim ciddi riayət etməli, sürücülərə törətdikləri inzibati xətanın yarada biləcəyi mənfi nəticələr izah olunmalı, onlarla lüzumsuz dialoq aparılmasına, kobudluğa və mübahisə yarada biləcək digər hallara yol verilməməlidir”. Məlum olduğu kimi, bunu Daxili İşlər Nazirliyinin Baş Dövlət Yol Polisi İdarəsində 2017-ci ildə yol hərəkəti təhlükəsizliyinin təmini sahəsində görülən işlər və qarşıda duran vəzifələrə həsr olunmuş geniş əməliyyat müşavirəsində daxili işlər naziri, general-polkovnik Ramil Usubov deyib.
Bu sahədə ciddi dönüş yaradılmasının vacibliyini diqqətə çatdıran daxili işlər naziri 2018-ci ili yol-patrul xidmətinin (YPX) əməkdaşları üçün “Etik davranış ili” elan etdiyini bildirib. Bununla yanaşı, vətəndaşlarla ünsiyyətdə kobudluq göstərən, sürücüyə özünü təqdim etməyən, törətdiyi qayda pozuntusu barədə ona izah verməyən, yaxud bunu bacarmayan əməkdaşlar barəsində ciddi ölçülər götürüləcəyini vurğulayıb.
Yeri gəlmişkən onu da qeyd edək ki, bir müddət əvvəl məlum oldu ki, Dünya İqtisadi Forumunun “2017-2018-ci illər üzrə qlobal rəqabətlilik” hesabatına əsasən, “Polis xidmətlərinin etibarlılığı” indikatoru üzrə Azərbaycan 21 pillə irəliləyərək 137 ölkə arasında 54-cü yerdə qərarlaşıb.
Bununla yanaşı, DİN tərəfindən 2018-ci ilin yol-patrul xidmətinin (YPX) əməkdaşları üçün “Etik davranış ili” elan edilməsini ekspertlər necə dəyərləndirirlər? Nazirin elan etdiyi bu proses il boyu məzmunlu şəkildə həyata keçirilsə, Azərbaycan polisinin beynəlxalq reytinq siyahılarındakı mövqeyinin daha da yaxşılaşdırılmasında necə rol oynayacaq?
Məsələyə münasibət bildirən “Polisə Dəstək” İctimai Birliyinin rəhbəri Şəmsəddin Əliyevin sözlərinə görə, bütün bunlar yol polisi əməkdaşlarının fəaliyyətinə, davranışına müsbət təsir edəcək: “Azərbaycan müstəqillik əldə etdikdən sonra uzun illərdir etik davranışların təkmilləşdirilməsi və buna əməl olunmasi ilə bağlı islahatlar davam edir. Bununla bağlı DİN-in Kollegiya qərarı var, əməliyyat müşavirələrində dəfələrlə sözügedən məsələ prinsipial şəkildə müzakirə olunub. Nə üçün buna daha çox diqqət yetirilir? Ümumiyyətlə, DYP, Post-Patrul Xidməti bayır xidmətində əhali ilə bilavasitə təmasda olan struktur bölmədir. Yəni bu gün DİN orqanlarının elit generaliteti, yüksək rütbəli zabitləri daha çox polis idarələrində, qurumun aparatlarında cəmlənib. Vətəndaş yalnız qəbuldan-qəbula bu insanlarla təmasda olur. Ancaq bu gün DİN orqanlarının nüfuzuna müəyyən mənada təsir edə biləcək o halları aradan qaldırmaq üçün mütləq mənada əhali ilə təmasda olan bayır xidmətində etik davranış qaydalarına riayət olunması çox ciddi faktordur. Hər şey buradan başlayır. Müəyyən insanlar var ki, bəzi ekstremal vəziyyətlərdə öz müvazinətini saxlaya bilmir. Yaxud da o cür situasiyalarda qərar qəbul etmək bacarığı o qədər də yüksək olmur. Bütün bunların hamısı, istər-istəməz ictimaiyyətdə müəyyən neqativ rəyin formalaşmasına təsir edir. Etik davranış qaydalarına dövlət qulluğunda çalışanlar necə riayət edirsə, polisdə də dövlət qulluğunun xüsusi növündə çalışan əməkdaşlar buna əməl etməlidirlər. Bu həm də ona görə vacibdir ki, insanın səviyyəsi, əxlaqı, mədəniyyəti ailədən başlayır. Onun təhsil aldığı müəssisədə formalaşır. DİN böyük, çoxsaylı şəxsi heyəti olan qurum olduğuna görə bu qaydalara ciddi riayət olunur. 2018-ci ilin yol-patrul xidmətinin əməkdaşları üçün “Etik davranış ili” elan edilməsi Azərbaycanın həm dövlətçiliyi, həm də vətəndaşları və qurum üçün çox ciddi önəm kəsb edir. Nəzərə almaq lazımdır ki, Azərbaycan polisinin reytinqi beynəlxalq göstəricilərə görə də hər il yüksəlir. Bu faktora da ciddi diqqət edilməlidir”.
Vidadi ORDAHALLI
