Rəşad Bayramov: “Avropa təsisatlarının Azərbaycana qarşı qərəzi və ortada olan fikir ayrılıqları danılmaz faktdır”
Azərbaycan çox nadir müsəlman ölkələrindəndir ki, Avropa təşkilatlarında iştirak edir. Ona görə biz bilirik orada nələr baş verir. Bu fikirləri Prezident İlham Əliyev Bakıda beynəlxalq konfransların iştirakçıları ilə görüşündə deyib.
“Avropa Şurasının üzvü olaraq biz bu ədalətsizliklərlə üzləşmişdik, üzləşirik və yəqin ki, üzləşəcəyik”,- deyən dövlət başçısı vurğulayıb ki, bizə qarşı elan edilməmiş bu qarayaxma kampaniyası heç vaxt dayanmayacaq.
“Nə üçün? Çünki biz heç kimin qabağında baş əymirik və əyməyəcəyik, öz sözümüzü deyirik, öz milli mənliyimizi qoruyuruq, öz həyat tərzimizi qoruyuruq”, - deyə Prezident vurğulayıb.
Prezidentin açıqlamasından belə məlum olur ki, Avropa təsisatlarının Azərbaycana münasibətdə qərəzi heç vaxt bitməyəcək və buna biz hər zaman hazır olmalıyıq.
Sözügedən məsələ ilə bağlı fikirlərini baki-xeber.com-la bölüşən AMİP Ali Məclisinin sədri Rəşad Bayramov hesab edir ki, Prezidentin Azərbaycanın Avropa təşkilatlarında iştirakı və bu platformalarda üzləşdiyi münasibətlərlə bağlı fikirləri Bakı ilə Avropa təsisatları arasında münasibətlərin hazırkı mərhələsinə dair mühüm siyasi mesaj kimi qiymətləndirilə bilər: “Burada diqqət çəkən əsas məqam Prezidentin tənqidlərin müvəqqəti xarakter daşımadığını, Azərbaycanın öz milli mövqeyini müdafiə etdikcə bu qarşıdurmanın davam edə biləcəyini vurğulamasıdır. Bu yanaşma münasibətlərin ayrı-ayrı qərarlar və bəyanatlar üzərindən deyil, daha fundamental siyasi fikir ayrılıqları fonunda dəyərləndirildiyini göstərir. Məlumdur ki, Azərbaycan 2001-ci ildən Avropa Şurasının üzvüdür və təşkilatla əməkdaşlıq həm dövlət qurumlarını, həm də vətəndaş cəmiyyəti strukturlarını əhatə edir. Avropa Şurasının Bakıdakı ofisi də Azərbaycanla demokratiya, insan hüquqları və hüququn aliliyi sahələrində əməkdaşlığın davam etdiyini bildirir. Bu fakt göstərir ki, institusional əməkdaşlıq kanalları hələ də mövcuddur. Lakin buna baxmayaraq Avropa təsisatlarının Azərbaycana qarşı qərəzi və ortada olan fikir ayrılıqları da danılmaz faktdır. Prezidentin bu qərəzli yanaşmanın kökündə Azərbaycanın xarici siyasətdə daha müstəqil davranmaq niyyəti olduğunu vurğulaması da tamamilə haqlı mövqedir. Azərbaycanın son illərdə Türk Dövlətləri Təşkilatı, İslam Əməkdaşlıq Təşkilatı və digər çoxtərəfli platformalarda fəallığını artıraraq müxtəlif siyasi və iqtisadi tərəfdaşlıqlar arasında balans yaratmağa çalışması bir sıra Avropa təsisatlarını qane etmir. Həmin təsisatlar yanlış olaraq düşünürlər ki, müxtəlif bəhanələrlə Azərbaycana təzyiq göstərməklə nəyəsə nail olmaq, ölkəmizi öz müstəqil mövqeyindən çəkindirmək mümkündür. Prezident də çıxışında məhz bu mövqeni önə çəkərək rəsmi Bakının belə təzyiq və tənqidlər şəraitində öz siyasi xəttini davam etdirməyə hazır olduğuna dair növbəti dəfə mesaj vermiş oldu”.
Vidadi ORDAHALLI
