Şakir Ağayev: “İstər Avropa İttifaqında, istərsə də ABŞ-da tənqidi mətbuat sıxışdırılır və onlara qarşı ayrı-seçkilik edilir”
ABŞ "The New York Times", "The Wall Street Journal" və "Bloomberg" qəzetlərinin jurnalistlərinə G20 üzv ölkələrinin maliyyə nazirlikləri və mərkəzi bankları rəhbərlərinin görüşündə iştirak etmək üçün akkreditasiya verməyib.
ABŞ Maliyyə Nazirliyi avqustun 31-də Şimali Karolina ştatının Aşvill şəhərində başlayan G20 maliyyə nazirləri və mərkəzi bank rəhbərlərinin iki günlük görüşünü işıqlandırmaq üçün bir neçə nüfuzlu nəşrin - The New York Times, The Wall Street Journal və Bloomberg-in jurnalistlərinə akkreditasiya verməkdən imtina edib.
NYT-nin məlumatına görə, nəşrin iqtisadiyyat üzrə müxbiri Alan Rappeport 2017-ci ildə ABŞ Maliyyə Nazirliyini işıqlandırmağa başlayıb və o vaxtdan bəri təxminən on iki G7 və G20 sammitində iştirak edib. Akkreditasiyanın rədd edilməsi ilə bağlı şərh verən nəşrin sözçüsü Nikol Teylor bu qərarı "[ABŞ Prezidenti Donald Tramp] administrasiyasının müstəqil jurnalistikanı sarsıtmaq üçün etdiyi daha bir qıcıqlandırıcı cəhd deyil, həm də ictimai nəzarətdən yayınmaq üçün açıq-aşkar bir cəhd" adlandırıb.
AFP xəbər agentliyi qeyd edir ki, "əlverişsiz media orqanlarının işinə mane olmaq, Donald Trampın ikinci prezidentlik müddətinin əvvəlində həddindən artıq tənqidi və ya "solçu" adlandırdığı media orqanlarına qarşı başlatdığı kampaniyanın bir hissəsidir".
Tramp "Wall Street Journal" və "The New York Times" qəzetlərinə qarşı məhkəmə iddiaları qaldırıb. Ağ Evə qayıtdıqdan qısa müddət sonra o, ABŞ tərəfindən maliyyələşdirilən xarici yayım mediasına nəzarət edən ABŞ Qlobal Media Agentliyinin (USAGM) xərclərinin azaldılmasını əmr edib.
ABŞ-da media belə ayrı-seçkiliyə məruz qalır.
“Novoye vremya” qəzetinin baş redaktoru Şakir Ağayev baki-xeber.com-a bildirdi ki,
demokratiya anlayışı Qərb, Amerika tərəfindən bir alət, vasitə kimi istifadə olunurdu və bu da artıq öz mahiyyətini itirib.
“Mahiyyətini ona görə itirib ki, onlar o alətdən başqa ölkələrə təzyiq vasitə kimi istifadə ediblər və edirlər. Şübhə etmirəm ki, lazım olanda yenə də təzyiq vasitəsi kimi istifadə edəcəklər. İstər Avropa Birliyi, istərsə də ABŞ özlərinə gələndə bu dəyərlər öz mahiyyətini itirir. Xüsusən də Tramp hakimiyədə gələndən sonra bu özünü daha çox biruzvə verir. Konkret olaraq ABŞ-dan danışırıqsa, heç kimə sirr deyil ki, Tramp onu tənqid edən, onun hər hansı bir qərarını müzakirəyə çıxaran mətbu orqanına qarşı çox aqresiv hərəkət edir, çox aqresiv çıxışlar sərgiləyir. Hətta onları məhkəməyə də verir, onları öz mətbuat konferansına bıraxmağa qadağan da edir. O cümlədən G20-liklərin maliyyə nazirlərinin iclasında da belə bir hal baş verdi. Amerika mətbuatı qeyd etdi ki, mətbuat nümayəndələri arasında ayrı-seçkilik olub. Bu ondan irəli gəlir ki, görünür, müzakirə olunacaq məsələlərin tənqid hədəfinə çevrilməsini istəmirlər. Bu səbəbdən də bəzi populyar media təmsilçiləri ora buraxılmayıb. Yəni artıq istəmirlər ki, mətbuat onların apardığı siyasəti tənqid etsin. Bu siyasət düzdür, yaxud səhvdir, onu Amerika cəmiyyəti qiymətləndirə bilər.
Onlar istəyirlər ki, mətbuat onların istədiyi kimi olsun, onların dediyi sözləri desin.
Çox təəssüflər olsun ki, artıq istər Avropa İttifaqında, istərsə də ABŞ-da tənqidi mətbuat sıxışdırılır və onlara qarşı ayrı-seçkilik edilir.
Əgər bunu mövcud hakimiyyət edirsə, demək hər şey düzdür, o tənqid etmək olmaz. Bax, bunlardan irəli gəlir bu ayrı-seçkilik. Əvvəldə dediyim kimi, söz azadlığı, demokratiya və s. kimi alətlərdən ki, istifadə olunurdu, amma artıq onlar özləri o dəyərlərin üstündən xətt çəkirlər. Amma çox təəssüflər olsun ki, başqa ölkələrə qarşı ondan bir təzyiq aləti kimi istifadə edirlər. Amma bu proseslər göstərir ki, ABŞ-da hər şey güc vasitəsilə həll olunmağa başlayıb. Bu ümumiyyətlə dünyada belədir. Ona görə də bu vasitələrdən istifadə edirlər. “Mən belə istəyirəm, mən gücləyəm, mən hər şey edə bilərəm” demək istəyirlər. Yəni bütün o dəyərlər, beynəlxalq qanunlar, beynəlxalq standartlar artıq o ölkələrdə də sıradan çıxır. O dəyərlərin sıradan çıxarılmasının səbəbkarı da, sıradan çıxardanlar da belə ölkələr olub”-deyə Ş.Ağayev qeyd etdi.
İradə SARIYEVA
