Azər Həsrət: “Diasporamız fəal olmalı separatçı canilərin əməllərini ifşa etməklə bağlı aksiyalar keçirməlidir”
Erməni diasporu yaxın günlərdə Parisdə və Praqada Azərbaycana qarşı növbəti aksiyalar keçirəcək. Hər iki aksiyaya şəhər meriyalarının razılığı alınıb. Erməni diasporu müxtəlif aksiyalar vasitəsilə yaşadıqları ölkələrin siyasi dairələrinin və ictimai rəyinin Azərbaycan əleyhinə mövqe formalaşdırmalarına çalışır.
Fransanın aksiyalara icazə verməsi gözlənilən idi. Çünki Fransanın siyasi dairələri əvvəldən anti-Azərbaycan mövqeyə kökləniblər. Təəccüblü olan odur ki, Çexiya tərəfi də buna razılıq verib. Çexiya Azərbaycanla müxtəlif sahələrdə, o cümlədən hərbi sahədə əməkdaşlığa üstünlük verir. Bu ilin aprelində Çexiya Baş naziri Andrey Babiş Azərbaycanda yüksək səviyyəli rəsmi səfərdə olub. O zaman Çexiyanın buna icazəsi nə deməkdir?
Sözügedən məsələ ilə bağlı fikirlərini baki-xeber.com-la bölüşən siyasi şərhçi Azər Həsrət hesab edir ki, Avropada bu kimi məsələlərə elə də həssas yanaşmırlar: “Çünki istənilən diaspor, yaxud da istənilən ölkəyə yaxın olanlar müraciət edib qanunvericilik çərçivəsində etiraz aksiyaları, yaxud da başqa tədbirlər keçirə bilərlər. Özüdə belə tədbirlərdə bir qayda olaraq qanunvericiliyin gözlənilməsi yetərlidir. Etiraz edənlərin səsləndirdiyi siyasi şüarlara da kimsə qarışmır. Ümumiyyətlə, terrorizmə, radikalizmə hansısa çağırışlar yoxdursa, buna maneə törədilmir. O cümlədən, Çexiyada da bənzər vəziyyətdir. Çexiya Avropa İttifaqının üzvüdür, bir Avropa ölkəsidir. Onlar o qərarları sadəcə özbaşına vermirlər. Yəni Avroittifaqın tərkib hissəsi olaraq aksiyaların keçirilməsinə icazə verirlər. Ola bilər ki, Çexiya dövləti Azərbaycanla ikitərəfli münasibətləri nəzərə alaraq buna mane olsun. Düşünmürəm ki, Çexiya bunu istəməsin. Ancaq bu məsələdə Çexiyanın qarşısını kəsən Aİ-nin tələbləridir. Yəni Çexiya Aİ-nin qaydalarından kənar hansısa addım ata bilməz. Atacağı təqdirdə tənqidə məruz qalacaq. Məsələnin bu tərəfini də nəzərə almaq lazımdır. O baxımdan düşünmürəm ki, Çexiya rəsmiləri belə məsələlərlə bağlı özlərini risk altına atsınlar. Bu baxımdan ciddi narahat olmağa dəyməz. Bəs biz nə edə bilərik? Biz də erməni tərəfinin göstərdiyi bu aktivlik fonunda boş dayanmamalıyıq. Diasporamız fəal olmalı separatçı canilərin əməllərini ifşa etməklə bağlı aksiyalar keçirməlidir. Yoxsa biz gözləməməliyik ki, ermənilər hansı addım atırlar. Yaxud da Çexiya və digər Avropa ölkələrin mediasından istifadə edərək Azərbaycanın səsini dünyaya çatdırmalıdır. Deməyim odur ki, biz Avropada ermənilərin belə aksiyalar keçirməsinin qarşısını ala bilmərik. Çexiya vətəndaşlarının Qarabağın harada yerləşməsindən heç xəbəri yoxdur. Sadəcə, ermənilər fəaldırlarsa, biz də fəallığımızdan qalmamalıyıq. Baş verənlərə adekvat cavab verməliyik”.
Vidadi ORDAHALLI
