Ramil Hüseynov: “Sözügedən məsələdə heç şübhəsiz Prezidentin yeritdiyi incə siyasi kursun böyük əhəmiyyəti var”
Dünyada geosiyasi balansların sürətlə dəyişdiyi, çoxqütblü sistemin formalaşdığı və ənənəvi güc mərkəzləri arasında rəqabətin dərinləşdiyi bir mərhələdə Azərbaycanın xarici siyasətinin əsas xüsusiyyətlərindən biri müxtəlif geosiyasi və geoiqtisadi platformalar arasında çevik əlaqələr qurmaqdır.
Prezident İlham Əliyevin nüfuzu, siyasi iradəsi və strateji addımları ölkəmizin yeni dünya düzəninin formalaşdığı bir dövrdə “orta güc dövləti”nə çevrilməsini təmin edir. Məhz Prezident Əliyevin müstəqil, ardıcıl və prinsipial siyasəti nəticəsində ölkəmiz öz ərazi bütövlüyünü və suverenliyini tam bərpa edib. Bu baxımdan Şanxay Əməkdaşlıq Təşkilatı xüsusi əhəmiyyət kəsb edir. ŞƏT dünyanın böyük coğrafiyasını əhatə edən, təhlükəsizlikdən iqtisadiyyata, nəqliyyatdan energetikaya qədər geniş gündəliyə malik platformadır. 2016-cı ildə dialoq tərəfdaşı statusunun əldə olunması ilə başlayan proses sonrakı illərdə Prezident İlham Əliyevin ŞƏT sammitlərində iştirak etməsi ilə daha yüksək siyasi səviyyəyə çatıb. Şərq-Qərb və Şimal-Cənub dəhlizlərinin kəsişməsində yerləşən Azərbaycan öz coğrafi mövqeyini diplomatik və iqtisadi üstünlüyə çevirməyə çalışır. Bu baxımdan ölkənin tranzit imkanları onun “orta güc dövləti” statusunun əsas dayaqlarından biridir.
Sözügedən məsələni baki-xeber.com-a şərh edən “Yeni Xətt” Siyasi Tədqiqatlar Mərkəzinin rəhbəri Ramil Hüseynov hesab edir ki, Azərbaycanın uğurlu çoxvektorlu xarici siyasət kursu ölkəmizin “orta güc dövləti”nə çevrilməsində mühüm rol oynayıb: “Sözügedən məsələdə də heç şübhəsiz Prezident İlham Əliyevin yeritdiyi incə siyasi kursun böyük əhəmiyyəti var. Prezident Əliyevin dünyadakı böyük nüfuzu, qətiyyətli siyasi iradəsi və ardıcıl strateji addımları bunu təmin edən başlıca faktorlardan biridir. Sadalanan amilləri bir birindən ayrı təsəvvür etmək olmaz. Bütün bu faktorlar bir birini tamamlayır. Bu gün Azərbaycansız Çin-Mərkəzi Asiya-Avropa əlaqələrini təsəvvür etmək çətindir. Ən azından ona görə ki, Rusiya ilə İran həm müharibə vəziyyətindədilər, həm də sanksiyalar altındadılar. Çin son illərdə Azərbaycan üzərindən Avropaya daşımalara xüsusi önəm verir. Azərbaycan nə Rusiyanın, nə də Qərbin orbitində olan hərbi-iqtisadi təşkilatların üzvü deyil. Üzərində hansısa öhdəlik yoxdur. Ölkəmiz bütün platformalarla bərabərhüquqlu əməkdaşlıq edir. Azərbaycanda hansısa ölkənin hərbi bazası yoxdur. Adətən bu kimi amillər ölkələrin xarici siyasət kursuna mənfi təsir edir. Azərbaycanın razılığı, iştirakı olmadan regionda hansısa layihəni reallaşdırmaq ümumiyyətlə mümkün deyil. Bir sıra məsələlərdə Azərbaycanla bilavasitə hesablaşırlar. Bütün bunlar ölkəmizin “orta güc dövləti” statusunu daha da güclndirir”.
Vidadi ORDAHALLI
