ABŞ İranın Lark adasına hücumu ilə hərbi əməliyyatlar yenidən başlayıb. Lakin ABŞ ordusunun bu münaqişəni uzun müddət davam etdirə bilməyəcəyi irəli sürülür. Hətta ABŞ müdafiə naziri Pit Heqsetin bu barədə xəbərdarlıq edildiyi də bildirilib.
ABŞ-ın Lark adasına hücumu ABŞ ordusunda tənqidlərə səbəb olub. "Washington Post" qəzetinin xəbərinə görə, Pentaqon üçün hazırlanmış 14 avqust tarixli məxfi qiymətləndirmədə ABŞ Ordusu, Hərbi Dəniz Qüvvələri və Hərbi Hava Qüvvələri komandirlərinin, eləcə də Avropa, Asiya və Latın Amerikasında əməliyyatlara nəzarət edənlərin İrana qarşı əməliyyatın uzadılması ilə bağlı ciddi tərəddüdlərinin olduğu yer alıb.
Məlumata görə, ABŞ-ın Avropa Komandanlığı, Sakit Okean Komandanlığı və Cənub Komandanlığının komandirləri, eləcə də Hərbi Dəniz Qüvvələrinin baş admiralı xidmət müddətlərinin uzadılması əmrinə etiraz ediblər.
Komandanlıqların gəmilərin, təyyarələrin və digər hərbi aktivlərin İrana qarşı əməliyyatı dəstəkləmək üçün bölgədən çıxarılmasının Avropa, Asiya və Latın Amerikasında missiyaların və təlim fəaliyyətlərinin aparılmasına mənfi təsir göstərdiyi bildirilib. Xüsusilə ABŞ Hərbi Dəniz Qüvvələrinin müharibənin yükünün öhdəsindən gəlməkdə çətinlik çəkdiyi qeyd edilib.
Ordu və Hərbi Hava Qüvvələri komandanlıqları Heqsetin qoşunların yerləşdirilməsini uzatmaq qərarı ilə razılaşıblar, lakin bunun "ciddi risklər" daşıdığı barədə xəbərdarlıq ediblər.
ABŞ rəsmiləri İranla müharibənin yalnız Yaxın Şərqə deyil, həm də ABŞ-ın digər bölgələrdəki hərbi imkanlarına təsir edəcəyi barədə xəbərdarlıq ediblər. Məlumata görə, ABŞ-ın Sakit Okean bölgəsindəki əsas müttəfiqləri Pentaqonun raket və hava hücumundan müdafiə sistemlərinin ehtiyatlarının tükənməsi səbəbindən Çinə qarşısında müdafiəsiz qalmaqdan narahatdırlar.
Həmçinin bildirilib ki, ABŞ-ın Birləşmiş Qərargah Rəisləri Komitəsinin sədri general Den Keyn İran müharibəsi başlamazdan əvvəl Ağ Evi ABŞ-ın uzunmüddətli və genişmiqyaslı əməliyyat aparmaq üçün kifayət qədər sursatı və müttəfiq dəstəyinə malik olmadığı barədə xəbərdar edib. Eyni zamanda, ABŞ-ın Avropa Komandanlığının rəhbəri general Aleksus Qrinkeviçin də Pentaqona İsraili və ABŞ ərazisini raket hücumlarından qorumaq üçün kifayət qədər dəniz gücünə malik olmadığı barədə xüsusi xəbərdarlıq etdiyi bildirilir.
Tahir TAĞIYEV
