Mərkəzi Kəşfiyyat İdarəsinin direktoru Con Retkliff Moskvaya gizli səfəri zamanı münaqişəyə son qoymaq üçün ABŞ prezidenti Donald Tramp, Rusiya prezidenti Vladimir Putin və Ukrayna prezidenti Volodimir Zelenski arasında üçtərəfli görüş təklif edib.
“Axios” danışıqlardan xəbərdar iki mənbəyə istinadən xəbər verir ki, Retkliffin Moskvaya səfəri, Tramp administrasiyasının Rusiya ilə Ukrayna arasında danışıqlarda irəliləyiş əldə etmək üçün diplomatik səylərində ilk şəxsi iştirakı oldu.
Çərşənbə axşamı Retkliff Rusiya Xarici Kəşfiyyat Xidmətinin rəhbəri Sergey Narışkin və FSB-nin direktoru Aleksandr Bortnikovla görüşüb. Səfərin məqsədlərindən biri Rusiya kəşfiyyat xidmətlərinin rəhbərlərinin Vladimir Putini ABŞ-ın vasitəçiliyi ilə Ukrayna ilə danışıqlara qayıtmağa inandıra bilib-bilməyəcəyini müəyyən etmək olub. Amerika rəsmiləri Zelenskiyə Retkliffin Moskvadakı danışıqları və üçtərəfli sammit təklifi barədə məlumat veriblər. Belə bir görüşün keçirilməsi ideyası artıq Tramp administrasiyası tərəfindən irəli sürülmüşdü; Zelenski onu dəstəkləmişdi, lakin Putin əvvəllər təklifi rədd etmişdi.
“Axios” mənbələrinin məlumatına görə, Retkliff Rusiya tərəfi ilə sülh danışıqlarının bərpası imkanlarını da müzakirə edib.
Bundan əvvəl "New York Times" qəzeti Mərkəzi Kəşfiyyat İdarəsinin direktorunun Bortnikova cəbhə xəttindəki vəziyyəti mənfi qiymətləndirdiyini və vəziyyət pisləşməzdən əvvəl Moskvanı razılığa gəlməyə çağırdığını bildirmişdi.
Retkliff Moskvadakı görüşlərindən sonra Bortnikovun diplomatik səylərdə konstruktiv iştirakçı ola biləcəyi və danışıqların bərpasına kömək edə biləcəyi qənaətinə gəlib. Lakin Ukrayna hakimiyyəti Rusiya rəhbərliyinin niyyətlərinə şübhə ilə yanaşır. Ukrayna Prezident Administrasiyasının rəhbərinin müavini Pavlo Palisa bildirib ki, Ukrayna kəşfiyyatının məlumatına görə, Putin orduya Kiyev və Çerniqov vilayətləri də daxil olmaqla, Ukraynanın şimalında bir neçə hücum ssenarisi hazırlamağı tapşırıb.
Tramp administrasiyasının vasitəçiliyi ilə Rusiya-Ukrayna danışıqları fevral ayının ortalarında İranla müharibənin başlamasından sonra dayandırılıb. ABŞ nümayəndələri Stiv Uitkoff və Cared Kuşner son aylarda Rusiya və Ukrayna müzakirəçiləri ilə ayrı-ayrı görüşlər keçirsələr də, əhəmiyyətli irəliləyiş əldə edə bilməyiblər. Ukrayna Prezident Administrasiyasının rəhbəri Kirill Budanov cümə axşamı bildirib ki, ABŞ-ın vasitəçiliyi ilə Rusiya ilə danışıqlar sentyabr ayında bərpa oluna bilər.
Tahir TAĞIYEV
