Afsəddin Nəbiyev: “Bunun kökündə Kremlin dövlətimizin müstəqil siyasət yeritməsini qəbul edə bilməməsi dayanır”
Məlum olduğu kimi, avqustun 27-də Azərbaycanın Rusiyadakı səfirliyi qarşısında təxribat törədilib. Səfirliyin qonaq evi qarşısında “Rusiya vətəndaşlarından əl çəkin!”, “Əliniz rus qanına batıb!” və Azərbaycana qarşı ittihamların yer aldığı plakatlar yerləşdirildib. Azərbaycan Xarici İşlər Nazirliyi baş verənləri pisləyib.
O da məlumdur ki, Rusiya elə bir ölkədir orada əsla belə təxribatlar təsadüfən, yuxarının xəbəri olmadan baş vermir. Bundan əvvəl bir YouTube kanalında ölkəmiz əleyhinə təxribat xarakterli material getdi, indidə bu. Bunun arxasında nə dayanır? Rusiya Azərbaycanın timsalında nəyi həzm edə bilmirlər?
Sözügedən məsələyə aydınlıq gətirən AMİP-in sədr müavini Afsəddin Nəbiyev baki-xeber.com-a açıqlamasında Rusiyanın bu təxribatlarının arxasında bir sıra məkrli niyyətlərin dayandığını qeyd etdi: “Azərbaycan Xarici İşlər Nazirliyinin bu hadisəni pisləməsi tamamilə əsaslıdır. Məsələ ondadır ki, Rusiya kimi dövlətin siyasi və informasiya məkanında belə aksiyaların, xüsusilə xarici dövlətin diplomatik nümayəndəliyi qarşısında baş verən təxribatların heç bir dairənin xəbəri olmadan həyata keçirildiyinə inanmaq çətindir. Bundan əvvəl bəzi Rusiya media resurslarında və internet platformalarında Azərbaycana qarşı açıq təxribat xarakterli materialların yayılması, indi isə diplomatik nümayəndəliyimizin qarşısında təşkil olunan aksiya ən yuxarı instansiya tərəfindən qaynaqlandığı heç bir şübhə doğurmur. Bütün bu kimi hadisələrin səbəbi haradan qaynaqlanır, biz bu suala sadə cavab verə bilərik. Azərbaycanın hansı uğurlarını və hansı mövqeyini həzm edə bilmirlər? Görünür, Azərbaycanın Cənubi Qafqazda getdikcə güclənən müstəqil siyasi mövqeyi, öz milli maraqlarını qətiyyətlə müdafiə etməsi və regionun gələcəyinə dair qərarların məhz Bakı ilə hesablaşılaraq qəbul olunması müəyyən dairələri ciddi narahat edir. Azərbaycan artıq kənardan verilən göstərişlərlə hərəkət edən, geosiyasi proseslərdə ikinci dərəcəli rol oynayan dövlət deyil. Azərbaycan regionda öz sözünü deyən, milli maraqlarını qətiyyətlə müdafiə edən və beynəlxalq münasibətlərdə müstəqil xətt yürüdən güclü dövlətdir. Ən əsası isə Azərbaycan bu gün Cənubi Qafqazda yeni təhlükəsizlik və əməkdaşlıq arxitekturasının formalaşmasının əsas müəlliflərindən biridir. Ölkəmiz bütün qonşu dövlətlərlə sivil münasibətlərin qorunub saxlanılması, siyasi və diplomatik dialoqun inkişaf etdirilməsi, iqtisadi əlaqələrin genişləndirilməsi və regionda davamlı sülhün təmin olunması üçün ardıcıl siyasət yürüdür”.
Sədr müavini hesab edir ki, Azərbaycanın mövqeyi sadə və prinsipialdır: “Regionda sülh, qarşılıqlı hörmət və əməkdaşlıq hökm sürməlidir. Bu siyasət heç bir dövlətə qarşı yönəlməyib. Lakin Azərbaycanın müstəqil siyasət yürütməsi, öz ərazisində suverenliyini tam təmin etməsi və xarici siyasətini yalnız milli maraqlar əsasında müəyyənləşdirməsi ilə barışmaq istəməyən qüvvələrin mövcudluğu da danılmazdır. Bir sözlə, bütün bunların kökündə Kremlin Azərbaycanın müstəqil siyasət yeritməsini qəbul edə bilməməsi dayanır. Rusiyada bəzi media orqanları və informasiya platformaları vasitəsilə Azərbaycana qarşı son dövrlərdə səsləndirilən hədələyici fikirlər, təxribat xarakterli materiallar və indi də diplomatik nümayəndəliyimiz qarşısında baş verən hadisə ayrı-ayrı media subyektlərinin “özəl təşəbbüsü” kimi təqdim edilə bilməz. Bu cür addımların ictimai rəyə təsir göstərmək, Azərbaycan əleyhinə mənfi fon yaratmaq və Bakıya psixoloji-siyasi təzyiq göstərmək məqsədi daşıdığı açıq görünür. Lakin Rusiyada anlamalıdır ki, hədə-qorxu, informasiya təxribatı və diplomatik təzyiq Azərbaycanla münasibətlərdə nəticə verməyəcək. Azərbaycan öz dövlətçilik maraqlarını çox yaxşı bilir və heç bir təzyiq qarşısında müstəqil siyasi kursundan geri çəkilməyəcək.
Rasional və ağıllı düşüncə tələb edir ki, Rusiya-Azərbaycan münasibətlərində emosiyalar və təxribatlar deyil, qarşılıqlı maraqlar, hörmət və sağlam siyasi məntiq əsas götürülməlidir. Təxribatçı ritorika heç kimə fayda vermir. Əksinə, bu cür addımlar iki ölkə arasında qarşılıqlı etimadın zədələnməsinə xidmət edir. Azərbaycan öz qonşuları ilə normal və qarşılıqlı faydalı münasibətlər qurmaq istəyir və bu mövqeyini dəfələrlə nümayiş etdirib. Bu gün baş verənlərə ən düzgün cavab təmkin, prinsipiallıq və qətiyyətdir. Azərbaycan dövləti artıq sübut edib ki, öz milli maraqlarını qorumağı bacarır. Kimsə Azərbaycanın Cənubi Qafqazdakı güclənən mövqeyini həzm edə bilmirsə, problem Azərbaycanın deyil, məhz bu reallığı qəbul etmək istəməyənlərin problemidir”.
Vidadi ORDAHALLI
