Rusiya Ermənistan hökumətinin qərbyönlü xarici siyasəti ilə razılaşmayan müxalifət liderlərinin son həbslərini pisləyib, siyasi motivli adlandırıb. Rusiya Xarici İşlər Nazirliyinin sözçüsü Mariya Zaxarova bildirib: “Təəssüf ki, Rusiya prezidenti Vladimir Putinin aprelin 1-də Moskvada Ermənistanın baş naziri Nikol Paşinyanla görüşü zamanı qeyd etdiyi mənfi tendensiya davam edir. Söhbət Rusiya ilə müttəfiqlik münasibətlərinin qorunmasının tərəfdarı olan siyasi qüvvələrə və xadimlərə qarşı real repressiyaların güclənməsindən gedir”.
Zaxarovanın sözlərinə görə, Ermənistan hakimiyyətinin tutduğu bu destruktiv xətt rəsmi İrəvanın Rusiya ilə münasibətləri pisləşdirəcək addımlar atmadığı barədə bəyanatları ilə kəskin ziddiyyət təşkil edir. Qeyd edək ki, bu həftə Ermənistanın keçmiş prezidenti Robert Köçəryan həbs olunub. Rusiyanın xarici işlər naziri Sergey Lavrov isə Robert Köçəryanın və oğlu Sedrak Köçəryanın həbsini şərh edərkən bildirib: “Rusiya Xarici İşlər Nazirliyinin mövqeyi ondan ibarətdir ki, o, Ermənistan xalqının maraqlarını rəhbər tutur. Əsrlər boyu onların maraqlarının xalqımızın maraqları ilə necə iç-içə olduğunu görürük. Biz uzun müddətdir həmişə birlikdə, həmrəylikdə olmuşuq. Rusiya dəfələrlə çətin vəziyyətlərdə erməni xalqını və Ermənistan rəhbərliyini xilas edib. Əlbəttə ki, bu maraqlar üstünlük təşkil etməlidir. Hazırda İrəvandakı mövcud hakimiyyət başqa məqsədləri rəhbər tutur”. O, həmçinin diqqəti Köçəryanla yanaşı, Ermənistanın digər keçmiş prezidenti Serj Sarkisyanın da istintaq altında olduğuna yönəldib: “İrəvan Avropa İttifaqı ilə uyğunlaşmaq məqsədini bəyan edib və Aİ-yə üzvlük prosesinin başlanması haqqında qanun qəbul edib. Lakin Avrasiya İqtisadi İttifaqı ölkələri Ermənistan rəhbərliyini Aİ-yə qoşulmaq və ya Aİİ-də qalmaq istəyib-istəmədiklərinə qərar vermək üçün referendum keçirməyə çağıran bəyanat yayan zaman Ermənistanın baş naziri Paşinyan vaxtı gələndə qərar verəcəyini söylədi. Əgər Ermənistanın Avropa İttifaqına qoşulması ilə bağlı qanun qəbul etmisinizsə , “vaxtı gələndə” nə deməkdir?”. Onun sözlərinə görə, Paşinyanın respublikanın Aİ-yə daxil olması ilə bağlı referendumun yalnız ərizə təqdim edildikdən və "yol xəritəsi" hazırlandıqdan sonra müzakirə edilə biləcəyi barədə açıqlamaları onun xalqa "çox da yüksək etimad göstərmədiyini" göstərir.
Xatırladaq ki, avqustun 25-də hüquq-mühafizə orqanlarının əməkdaşları Ermənistanın ikinci prezidenti Robert Köçəryanın və oğlu Levonun evində, eləcə də keçmiş prezidentin ailəsinə məxsus şirkətlərdə axtarış aparıblar. Daha sonra Robert Köçəryan və böyük oğlu Sedrak həbs olunublar. Keçmiş prezident qanunsuz olaraq əmlak əldə etməkdə ittiham olunur. Müstəntiqlərin məlumatına görə, Köçəryan dövlət başçısı olduğu müddətdə başqaları ilə əlbir olub və vəzifəsindən sui-istifadə edərək bir neçə dövlət və iqtisadi aktivi bazar qiymətlərindən aşağı qiymətə əldə edib. Köçəryanın “Hayastan” alyansı, varlı iş adamları Samvel Karapetyan və Qagik Tsarukyanın rəhbərlik etdiyi daha iki müxalifət qrupu iyunun 7-də parlament seçkilərində Paşinyanın əsas rəqibləri olublar. Onlar Ermənistanın ənənəvi müttəfiqi Rusiya ilə münasibətləri bərpa edəcəklərini vəd ediblər, eyni zamanda açıq şəkildə Moskvanın tərəfini tutmamağa çalışıblar. Paşinyan seçki kampaniyası zamanı bu qüvvələrin liderlərini “aradan götürəcəyini” vəd edib, onları xarici dövlətin agentləri olmaqda ittiham edib. Onun Rusiyanı nəzərdə tutduğu ehtimal olunur. Karapetyan ötən ilin iyununda həbs olunub, dekabrda ev dustaqlığına buraxılıb. Tsarukyan bu il iyulun 6-da həbs edilib. Müxalifət liderləri onlara qarşı ayrı-ayrılıqda irəli sürülən ittihamları rədd edir. Paşinyan isə yenidən onların həbs edilməsi üçün xalqdan mandat aldığını iddia edib. Rəsmi nəticələrə görə, Paşinyanın “Vətəndaş Müqaviləsi” partiyası seçkilərdə səslərin təxminən yarısını qazanıb. Ermənistan müxalifəti rəsmi nəticələri tanımayıb. Rusiya da seçkilərin pozuntularla keçdiyini bildirib. Prezident Vladimir Putin Paşinyanı təbrik etməyib. “Azatutyun” yazır ki, Rusiyanın Zaxarovanın bəyanatları ilə Ermənistandakı daxili siyasi prosesləri bu cür açıq tənqid etməsi Rusiya-Ermənistan münasibətlərinin daha da pisləşdiyini göstərir. Mayda İrəvanda iki Avropa sammitinin keçirilməsindən sonra Moskva Yerevana təzyiqləri artırıb. Rusiya Paşinyan hökumətindən Avropa İttifaqı ilə Rusiyanın rəhbərlik etdiyi Avrasiya İqtisadi İttifaqı arasında tezliklə seçim etməyə çağırır. Paşinyan bildirib ki, Ermənistan Avropa İttifaqına üzvlük üçün tezliklə rəsmi müraciət edəcək. Rusiyanın deputatları buna cavabında İrəvana əlavə iqtisadi sanksiyaların tətbiq oluna biləcəyi barədə xəbərdarlıq ediblər. Moskva mayın sonu və iyunun əvvəlində Ermənistandan milyonlarla dollar dəyərində kənd təsərrüfatı məhsulları və mineral su idxalını faktiki qadağan edib.
Tahir TAĞIYEV
