Ermənistanın baş naziri Nikol Paşinyan bildirib ki, keçmiş prezidentlər Robert Köçəryan və Serj Sarkisyana, eləcə də "Çiçəklənən Ermənistan" partiyasının lideri Qaqik Tsarukyana və onların silahdaşlarına qarşı cinayət işlərini sabotaj edən məhkəmə məmurları da məsuliyyətə cəlb olunacaqlar. Paşinyan millət vəkili Levon Köçəryanın parlamentdə baş nazirlə mübahisə etməsindən qısa müddət sonra keçmiş prezident Robert Köçəryanın və ailə üzvlərinin niyə saxlanılıb həbs olunduğuna dair suala cavab olaraq bir daha təkrar edib ki, həmin şəxslər cinayərkarlardır.
Ermənistanın baş naziri xatırladıb ki, 2018-ci ildə bu şəxslərin qanunsuz varlanmaya görə məsuliyyət daşımalı olduqlarını bildirmişdi. İndi isə bir Ermənistan vətəndaşı olaraq, Köçəryana qarşı ittiham aktını hazırlayan bütün hüquq sistemi rəsmilərinə təşəkkür etmək istəyir. Onun sözlərinə görə, bütün bu faktların çoxdan məlum olduğu və ən azı 2018-ci ildən bunlara əsasən cinayət işləri açıla biləcəyi də göz qabağındadır: “Onlar bütün bunları bilirdilər, bəs hansı tədbirləri gördülər? Bəli, bəzən işlər açılırdı, bəs niyə tam araşdırılmırdı? Çünki Köçəryan-Sarkisyan mafiyasının məhkəmə sistemində əli var idi və hələ də var”. Paşinyan bildirib ki, 2018-ci ildə hökumət bu cür insanlara şans verdi və qanunsuz varlanma ilə əlaqəli cinayətlərə görə əfv elan etdi: “Onlar əməllərini etiraf etməklə əmlakının 25%-ni saxlaya bilərdi. Ama heç kim bu fürsətdən istifadə etməyib, o cümlədən məhkəmələrdə və hüquq-mühafizə orqanlarında loyal tərəfdarlarına güvəniblər. Hüquq-mühafizə orqanlarında bütün bu insanların kimliyi müəyyən ediləcəki və onların başına gələcəklərə həsəd aparmıram. Onlar heç kimin onların yerinə gəlməyəcəyini düşünürlərmi? Onlar yanılırlar. Onlar özlərini xalqa izah etməli olacaqlar. Onların əmlakı, hesabları və ailələrinin hesabları yoxlanılmalıdır. Axtarışdan bir gecə əvvəl Köçəryanı xəbərdar edənlər də daxil olmaqla, hamısı yoxlanılmalıdır".
Paşinyan vurğulayıb ki, hüquqi strukturlardakı cinayətkarlara işləyən şəxslər kütləvi şəkildə işdən çıxarılacaq. Bunun təhdid olub-olmadığı soruşulduqda, Ermənistanın baş naziri belə cavab verib: “Bəli, mən təhdid edirəm və çox güclü şəkildə”. Onun sözlərinə görə, Robert Köçəryan, Serj Sarkisyan və Qaqik Tsarukyan hər ayın əvvəlində telefonlarını açıb pensiyalarının hesablarına köçürülüb-köçürülmədiyini yoxlamalıdırlar. Qeyd edək ki, Korrupsiyaya Qarşı Mübarizə Komitəsi Ermənistanın keçmiş prezidenti Robert Köçəryanın iki ay müddətinə həbs olunduğunu açıqlayıb. Xatırladaq ki, Robert Köçəryan 25 avqustda həbs olunmuş və daha sonra bu yaxınlarda stent prosedurundan sonra səhhətinin pisləşməsi səbəbindən xəstəxanaya yerləşdirilmişdi. Köçəryan qanunsuz əmlak əldə etməkdə ittiham olunur. Müstəntiqlərin sözlərinə görə, o, prezidentliyi dövründə başqaları ilə əlbir olaraq, vəzifəsindən sui-istifadə edərək bir sıra dövlət və iqtisadi aktivləri bazar dəyərindən aşağı qiymətə əldə edib. Onun oğlu Sedrak və Ermənistanın üçüncü prezidenti Serj Sarkisyan da dindirilmək üçün çağırılıblar. Sedrak Köçəryan da iki ay müddətinə həbsdə saxlanılıb.
Samirə SƏFƏROVA
