Elşad Həsənov: “Harutyunyan bu vəzifəni tutduqdan sonra o qüvvələr Rusiyayönlü mövqe sərgiləyə bilməyəcəklər”
Müxalifətdəki Güclü Ermənistan fraksiyasından olan deputat Harutyun Harutyunyan Ermənistan Respublikası Milli Assambleyasının Avropaya inteqrasiya üzrə daimi komitəsinin rəhbəri seçilib.
Gizli səsvermədən sonra 56 deputat onun namizədliyini dəstəkləyib, 48 nəfər isə əleyhinə səs verib.
Daha əvvəl Güclü Ermənistan müxalifət fraksiyasının üzvü Liana Manukyan da parlamentin maliyyə, kredit və büdcə məsələləri komitəsinin sədri seçilib.
Lakin Mülki Müqavilə fraksiyası bu komitənin sədrliyi üçün Güclü Ermənistanın üzvü Hayk Farmanyanın əleyhinə səs verib.
Paşinyan ən qatı müxalif deputatı dövlətin ən strateji postuna təyin etməsinin səbəb nə ola bilər?
Ekspertlər hesab edirlər ki, "Güclü Ermənistan" rusiyapərəst mövqeyi ilə tanınır və Paşinyan onun nümayəndəsini sədr seçdirməklə bir növ onları Rusiyadan qoparmaq istəyir. Ekspertlər qeyd edir ki, onun məhz belə bir komissiyaya sədr seçdirməklə Paşinyan artıq müxalifətin də Qərbə inteqrasiya tərəfdarı olduğunu göstərmək istəyir.
O da vurğulanır ki, Fraksiyanın əvvəl irəli sürdüyü ilkin namizəd (Arega Hovsepyan) lazımi səs toplaya bilmədiyi üçün fraksiya ikinci cəhddə Harutyun Harutyunyanın namizədliyini irəli sürüb. O, hakim “Vətəndaş Müqaviləsi” partiyasının da dəstəyi ilə namizəd komitə sədri seçilib.
Politoloq Elşad Həsənov baki-xeber.com-a bildirdi ki, Ermənistan parlamentində müxalif deputatlar da çox səs toplayıb. “Mütləq çoxluq Paşinyanın partiyasına aid olmadığına görə onlar müxalifətlə hesablaşdılar. Müxalifət nümayəndəsi Harutyunyanın komissiya sədri təyin edilməsi də gözlənilən idi və bu da elə bir ciddi məsələ deyil. O nəyi isə həll edəsi deyil. Hesab edirəm ki, iki Ermənistan müxalifətinin də böyük əksəriyyəti Avropa İttifaqına inteqrasiyanın tərəfdarıdır. Hesab edirəm ki, Harutyunyan bu vəzifəni tutduqdan sonra o qüvvələr Rusiyayönlü mövqe sərgiləyə bilməyəcəklər. Çünki artıq Rusiyanın beynəlxalq müstəvidə nüfuzu düşür, artıq Rusiyanı istəyən qüvvələr çox azdır. Bu nöqtə-nəzərdən indiki müxalif qüvvələr də Rusiyayönümlü olduqlarını onlar dilə gətirə bilməzlər. Həm də hesab edirəm ki, müxalifət olmalarına baxmayaraq müxalifətdən də hakimiyyətə işləyənlər olur. Bu nöqtəyi- nəzərdən Harutyunyanın Avropa inteqrasiya komissiyasının sədri seçilməsi elə də ciddi bir məsələ deyil. Yəni nə mənada ciddi məsələ deyil? O, Paşinyan hakimiyyəti üçün elə də təhlükəli fiqur deyil. Çünki müəyyən komissiyalara da ratasya hüququna uyğun müəyyən deputatlar, o cümlədən də müxaliflər seçilir. Buna görə də hesab edirəm ki, o, hakim partiyanın müəyyən razılığı olmadan seçilə bilməzdi”.
E.Həsənovun fikrincə, müxalif komissiya sədrinə hakim partiya üzrlərindən də səs verənlər var. “Bu nöqteyi-nəzərdən Hartunyanın Avropaya inteqrasiya məsələləri üzrə komissiyaya sədr seçilməsi Paşinyan hakimiyyətinə ciddi zərbə vuracaq mövqe deyil. Hesab edəm ki, o, Ermənistanın Avropa İttifaqına inteqrasiya etməsini daha dəstəkləyəcək”-deyə Elşad Həsənov qeyd etdi.
İradə SARIYEVA
