Məhərrəm Zülfüqarlı: “Kimin seçiləcəyinə macar xalqı qərar verməlidir və bu, belə də olmalıdır”
Rusiya Prezidenti Vladimir Putinlə Macarıstanın Baş naziri Viktor Orbanın telefon danışığı yayılıb. Bildirilir ki, 2025-ci ilin oktyabrında baş tutan telefon danışığı zamanı Orban Putinə Ukrayna müharibəsində Moskvanın qalib gəlməsi üçün “istənilən şəkildə” kömək etməyə hazır olduğunu bildirib.
Bundan başqa, ötən ay Macarıstanın xarici işlər naziri Peter Siyyarto ilə Lavrov arasında danışıqların səs yazısı yayılıb. Daha sonra belə məlumat yayıldı ki, Siyyarto tez-tez Aİ-yə məxsus məxfi məlumatları Rusiyanın xarici işlər naziri Sergei Lavrova ötürür.
Bütün bunların ard-arda, özü də məhz seçki ərəfəsində yayılması əsla təsadüfü deyil. O üzdən, sözügedən məlumatların yayılması Orbanın seçkidə qalib gəlməsinə imkan verəcəkmi? Bu, seçkilərin nəticələrinə necə təsir edəcək?
Sözügedən məsələni baki-xeber.com-a şərh edən tarix elmləri doktoru, professor Məhərrəm Zülfüqarlının fikrincə, Macarıstandakı seçki prosesini demək olar bütün dünya ictimaiyyəti izləyir: “Xüsusən də Avropa və Macarıstana yaxın ölkələr, o cümlədən, türk dünyası diqqətlə izləyir. Ona görə ki, Macarıstan Türk Dövlətləri Təşkilatının üzvüdür. Burada bir sıra məsələlər var ki, onların aydınlaşdırılmasına ehtiyac var. Avropa İttifaqı ölkələrini, Birləşmiş Ştatları demokratik ölkə kimi həmişə nümunə kimi göstərməyə çalışıblar. Ancaq son illər bunların siyasətində olan nöqsanlar bu ölkələrin ciddi tənqid edilməsinə gətirib çıxarıb. Xüsusən də ABŞ-ın İsraillə birlikdə İrana qarşı müharibəsi ciddi tənqid hədəfinə çevrilib. Düzdür, bu müharibəyə qarşı Avropa ölkələrindən də çıxan oldu. Hətta İspaniya bu müharibədə iştirak etməkdən imtina etdi və digərləri də müqavimət göstərdi. Ancaq istənilən halda bütün dünya gördü ki, Qərbin öz maraqları var. Ona görə də ora daxil olan ölkələr öz dövlət maraqlarından çıxış edirlər. Macarıstan Baş naziri Orban da öz dövlətinin maraqlarından çıxış edir. Ona görə ki, Ukraynadan keçən “Dostluq” qaz kəmərinin bağlanması Macarıstanın enerji ilə təminatında problemlər yaradır. Məhz bu amil Budapeştlə Kiyev arasında münasibətlərin daha da kəskinləşməsinə səbəb olub. Orbanın siyasəti Avropa ölkələri tərəfindən qəbul olunmur. Ona görə də məqsədli şəkildə indi belə kompromatları yayırlar ki, Orban seçkidə məğlubiyyətlə üzləşsin. Hesab edirəm ki, bunlar hamısı qara piardır və seçki ərəfəsi bunlar olur. Yəni Orbanın seçilməsinə mane olmaq üçün aparılan kampaniyadır. Bir məsələni də qeyd edim ki, Ukraynada macar milli azlığı yaşayır. Hələ müharibədən əvvəl onların hüquqlarının müdafiəsi ilə bağlı Macarıstan bəyanatlar verirdi. Yəni Ukrayna ilə Macarıstan münasibətlərində macar azlığı ilə bağlı problemlər var. Bir sözlə, kimin seçiləcəyinə macar xalqı qərar verməlidir və bu, belə də olmalıdır. Aparılan qaralama təbliğatına diqqət etməməlidirlər. Əsas Macarıstanın mənafeyindən kim çıxış edirsə, ona səs verilməlidir”.
Vidadi ORDAHALLI
