Hüseyn İbrahimov: “Reallıq odur ki, Paşinyan Qərblə yaxınlaşmaq kursunu bundan sonra da davam etdirəcək”
Ermənistan parlamentinin sədri Alen Simonyan bəyan edib ki, Rusiya qazın qiymətini artırsa, Ermənistan KTMT və Avrasiya İqtisadi İttifaqından çıxacaq.
Onun sözlərinə görə, əvvəllər elan edilmiş bəyanatlar yerinə yetirilərsə, belə bir ssenari mümkündür: “Belə söhbətlər yeni deyil və məsələn, qazın və ya malların qiymətləri ilə bağlı müzakirələr uzun illərdir aparılır və əgər belə bir qərar qəbul edilərsə, Ermənistan öz qərarını verəcək və həm KTMT-dən, həm də Avrasiya İqtisadi İttifaqından (Aİİ) çıxacaq”.
Görünən odur ki, Ermənistandakı hazırkı hakimiyyət xarici siyasətlə bağlı prioritetlərindən geri çəkilmək fikrində deyil. Çox güman ki, parlament seçkilərində yenidən qalib gəlsələr, bu istiqamətdə daha qətiyyətli mövqe sərgiləyəcəklər.
Sözügedən məsələni baki-xeber.com-a şərh edən İdarəçilik Akademiyasının müəllimi, sosioloq Hüseyn İbrahimovun fikrincə, son aylar gedən proseslər onu göstərir ki, Ermənistan dövləti tərəfindən aparılan xarici siyasət Rusiyanı qane etmir: “Söhbət Ermənistanın Avropa İttifaqı və ABŞ-la getdikcə artan yaxınlaşmasından gedir. Bu da hardasa təbiidir. Məsələ ondadır ki, Ermənistan Rusiyanın yaratdığı hərbi və iqtisadi bloklarda təmsil olunur. Ermənistanın dəmir yollarının səhmləri Rusiyaya məxsusdur. Qaz təchizatı ilə “Qazprom”un törəmə şirkəti məşğul olur. Ermənistanın xarici ticarət dövriyyəsində Rusiyanın yeri, rolu əhəmiyyətli dərəcədə böyükdür. Ermənistan aqrar məhsullarını əsasən Rusiya bazarına satır. O baxımdan, Alen Simonyanın açıqlaması siyasi baxımdan riskli bir çıxışdır. Ona görə ki, Ermənistan bunları qısa müddətdə əvəz etmək gücündə deyil. Gör tərəflər arasında necə ciddi fikir ayrılıqları var ki, Putin Paşinyanla görüşündə publik olaraq Rusiyanın narazılığını ortaya qoydu. Çünki adətən belə görüşlər qapalı müstəvidə qaldırılır və bununla bağlı mətbuat qarşısında belə açıq deyilmir. Putinin bunu açıq müstəvidə deməsi o deməkdir ki, Moskvanın artıq buna təmkinli yanaşmaq fikri yoxdur. Yəni belə vəziyyətdə Ermənistan seçim etməlidir. Ya Avropa İttifaqında olmalıdır, ya da Rusiyanın yaratdığı bloklarda qalmalıdır. Ermənistan Avrasiya İqtisadi İttifaqının iqtisadi faydalarından yararlanmaqla, Avropa ilə yaxınlaşma kursunu davam etdirə bilməz. Putin bunu açıq şəkildə deməklə, bir növ həm də erməni cəmiyyətinə mesaj ünvanladı. Deməyindən belə çıxdı ki, bunlardan birini seçin və iyunun 7-də keçirilən seçkilərdə mövqeyinizi ortaya qoyun. Ancaq reallıq odur ki, Paşinyan Qərblə yaxınlaşmaq kursunu bundan sonra da davam etdirəcək. Lap Rusiya Ermənistana satdığı qazın qiymətini 400 dollara çatdırsa belə”.
Vidadi ORDAHALLI
