Züriyə Ruslanqızı: “İranın buna açıq şəkildə razılaşması çətin görünür, amma Tehran adətən bu cür vəziyyətlərdə dolayı yol seçir”
İsrailin Baş naziri Benyamin Netanyahunun ofisi bildirib ki, İranla iki həftəlik atəşkəs Livana şamil edilmir. Qeyd edək ki, daha əvvəl İsrail mediası İranla atəşkəsin Livana da aid olduğunu bildirmişdi.
İsrail bəyan edib ki, İranla əldə olunan müvəqqəti atəşkəs Livan cəbhəsinə aid edilməyəcək. Bu necə olacaq? İran buna razı olarmı?
Politoloq Züriyə Ruslanqızı (Qarayeva) baki-xeber.com-a bildirdi ki, İsrailin atəşkəsi Livan istiqamətinə aid etməməsi əslində müharibəni hissələr üzrə idarə etmək cəhdidir. Yəni İranla birbaşa toqquşmanı müəyyən çərçivədə yumşaltmaq istəsə də, Hizbullahın yerləşdiyi Livan cəbhəsində təzyiqi saxlamaq istəyir. Bu, İsrail üçün strateji baxımdan məntiqlidir, çünki şimal sərhədində təhlükəni ayrıca neytrallaşdırmaq istəyir və eyni zamanda İranın regiondakı təsir alətlərini zəiflətməyə çalışır. Beləliklə, formal olaraq atəşkəs elan olunsa belə, müharibə faktiki olaraq başqa cəbhədə davam edir.
İranın buna açıq şəkildə razılaşması çətin görünür, amma Tehran adətən bu cür vəziyyətlərdə dolayı yol seçir. İran Hizbullahı özünün rəsmi hərbi strukturu kimi deyil, ayrıca bir qüvvə kimi təqdim edir və bu ona manevr imkanı verir. Yəni bir tərəfdən danışıqlarda atəşkəsi qəbul edə bilər, digər tərəfdən isə Livan istiqamətində baş verənlərə birbaşa müdaxilə etmədən prosesin davam etməsinə göz yuma bilər”.
Z.Ruslanqızının fikrincə, bu isə o deməkdir ki, regionda eyni anda həm atəşkəs, həm də aktiv toqquşma paralel şəkildə mövcud olacaq və vəziyyət bir müddət bu qeyri-sabit formada davam edəcək.
İradə SARIYEVA
