Bu günlərdə Ermənistanda hakim Vətəndaş Müqaviləsi Partiyasının deputatı Hayk Sarkisyan Müdafiə Nazirliyini, o cümlədən, nazir Suren Papikyanı sərt tənqid edib. Erməni deputat bildirib ki, orduda elementar gigiyena standartlarına əməl edilmir: “Əsgərlər həftədə bir dəfə hamamdan istifadə edə bilirlər”.
Hayk Sarkisyan hərbi sirr hesab olunan məlumatı da açıqlayıb. Bildirib ki, son 10 ildə orduda çağırışçıların sayı 44 mindən 14 minə düşüb. Jurnalistlər bu cür məlumatların açıqlanmasının yolverilməz olduğunu desə də, erməni deputat “onsuz da düşmən Ermənistan ordusu haqqında hər şeyi bilir” deyə cavab verib: “44 günlük müharibə zamanı Azərbaycanın Ermənistan bölmələrinin və komandanlığının hər bir hərəkətini, təchizat yollarını və yerləşməsini bilməsi faktı ortadadır. Bakıda hər şeyi bilirlər”. Hökumət üzvü, Müdafiə Komitəsinin üzvü Qaqik Melkonyan Hayk Sarkisyanın açıqladığı narahatedici hərbi çağırış rəqəmləri ilə razı deyil. Lakin rəqəmlərdən xəbərsiz olduğunu etiraf edir: "Düzünü desəm, rəqəmlərdən xəbərim yoxdur". Hayk Sarkisyan isə bildirib ki, keçən il 2811 nəfər orduda xidmət etməmək üçün vətəndaşlıqdan imtina edib. O bildirir ki, İrəvanda yaşayan hər 1000 çağırışçıdan 100-ü orduya gedir. Əsas yük bölgələrin üzərinə düşür. Deputat vəziyyəti narahatedici, kritik və fəlakətli ifadələrlə təsvir edib. Hər il getdikcə daha az insan xidmətə gedir. Qaqik Melkonyan isə hesab edir ki, əgər çağırışçıların sayı azalıbsa, deməli, xalq Ermənistanı tərk edib və səkkiz ildir hakim komandanın nümayəndəsi kimi günahlandırılacağını bilir. Melkonyanın komanda yoldaşı və müdafiə komitəsinin sədr müavini Armen Xaçatryan çağırışın vəziyyətini narahatedici hesab etmir və əmindir ki, bir müddət keçəcək və hökumət tərəfindən tətbiq edilən dəyişikliklər vəziyyəti düzəldəcək: " Hərbi xidmətdən azad edilən xəstəliklərin siyahısı dəyişdirilib". O, məcburi xidmət müddətinin iki ildən bir il yarıma endirilməsini yaxşı bir təşviq hesab edir ki, çağrışçılar xidmətdən yayınmasınlar. Millət vəkilinin sözlərinə görə, Azərbaycanla sülh müqaviləsi ordudan fərarilik edənlərin sayını azaltmağa kömək edəcək: "Bütün bunlar insanların hərbi xidmətdən gizli yolla qaçmağa çalışmamasına kömək edəcək. Vəziyyətin nə qədər yaxşılaşdığını anlamağımız üçün gözləməli olacağıq".
Müdafiə Nazirliyi də Hayk Sarkisyanın səsləndirdiyi rəqəmlərə cavab olaraq bildirib ki, çağırışçıların sayı artır. Hərbi departamentin açıqlamasında deyilir: "2022-ci illə müqayisədə 2025-ci ildə çağırışçıların sayı 25,3% artıb. Bu cür məlumatlar ictimaiyyətdə lazımsız narahatlığa səbəb ola və silahlı qüvvələrdəki şərait barədə yanlış təsəvvür yarada bilər". Müdafiə Nazirliyi millət vəkilinin hərbi səfərbərliklə bağlı səsləndirdiyi rəqəmləri spekulyativ hesab edir və hərbi səfərbərlik rəqəmlərinin şifrələndiyini vurğulayır. Müxalifətdəki “Ermənistan” fraksiyasının üzvü Geqam Manukyan bildirib: “Bütün hökumət özü ordu və təhlükəsizliklə bağlı bu yarışda nə qırmızı xətt, nə də sərhəd tanımır. Hayk Sarkisyanın dərc etdiyi eyni rəqəmləri mən 2025-ci ildə komitədə məsələ kimi qaldırdım ki, bu, sirrdir, dövlət sirridir. Əgər mən bunu ertəsi gün dərc etsəydim, Milli Təhlükəsizlikdən tutmuş Hərbi Polisə qədər insanlar qapımızın qarşısında növbəyə durardılar”. Müxalifətçi millət vəkili qeyd edib ki, rəqəmlərdən danışmayacaq. O, nazirliyin bəhs etdiyi çağırışçıların sayının artmasının xəstəliklər siyahısının azaldılmasının nəticəsi olduğunu vurğulayır: "Səhiyyə ilə bağlı çağırışda, xəstəliklərin siyahısının azaldılmasında irəliləyiş var. Amma Hayk Sarkisyan bu hökumətin, Nikol Paşinyanın, Suren Papikyanın simasını cırıb atdı". Geqam Manukyanın hərbi xidmət müddətinin azaldılmasının problemi daha da ağırlaşdıracağına şübhəsi yoxdur.
Tahir TAĞIYEV
