Abutalıb Səmədov: “Bu onun çarəsiz durumda olmasının sübutu kimi qəbul olunmalıdır”
ABŞ/İsrail və İran müharibəsi dövründə Amerika prezidenti Donald Trampın senzuradan kənar sözlərini çox eşitmişik. Məsələn, Tramp "Truth Social" platformasında "lənətə gəlmiş boğazı açın, əks halda, cəhənnəmdə yaşayacaqsınız” yazıb, İran xalqına xitabən “axmaqlar” və sair ifadələr də işlədib. İndi də İrana 48 saat verib deyir ki, tələbi yerinə yetirilməsə “İran xalqı əsl cəhənnəm görəcək”.
Tramp təkcə İrana qarşı deyil, digər ölkələrə, hətta Avropa dövlətlərinə, onların liderlərinə qarşı da ifadələr işlədib. Onun Fransa lideri E.Makrona qarşı da təhqiramiz ifadələr işlətdiyi, onu təhqir etdiyi məlumdur.
Hətta Trampın İran xalqına qarşı bu senzuradan kənar sözlərini Amerikada senatorlar da tənqid ediblər. Onun İran xalqına belə bir senzurasız müraciətləri nə kimi effekt verir? Amerikanın dünyada nüfuzuna, dövlətçilik tarixinə nə dərəcədə başucalığı, yaxud təhqir yaradır? Trampın bu qeyri diplomatik çağırışlarına necə baxmaq olar?
“Alyans” SAM-ın sədri Abutalıb Səmədov baki-xeber.com-a bildirdi ki, Trampın ayrı-ayrı dövlətləri və onların başçılarını təhqir etməsi yeni hadisə deyil. A.Səmədovun sözlərinə görə, Tramp bundan əvvəlki prezidentliyi dövründə də bir sıra bu cür hörmətsiz şəkildə, diplomatik etiketə uyğun olmayan formada müraciətlər edib, dünya bu davranışa adət edib. “Bu dəfə prezident seçildikdən sonra Tramp dövlət başçılarını təhqir etməyə Ukrayna prezidentindən başladı. Sonra Səudiyyə Ərəbistanının şahzadəni təhqir etdi. İndi İran xalqına və onun başçılarına müraciətdə bu cür təhqiramiz davranışlara yol verir. Bu bir tərəfdən də siyasətin nə qədər çirkin olduğunu hamıya göstərir. Yəni Trampın davranışı nə qədər qəbuledilməz olsa da, digər tərəfdən siyasətin və siyasi liderlərin mahiyyətini anlamaq imkanı əldə edirlər. Adətən, siyasi liderlər görüşərkən, mətbuat qarşısında öz mədəni səviyyələrini göstərməyə daha çox qəbul edilən ifadələr işlətməyə, xoş sözlər söyləməyə çalışırlar və bütün o mahiyyətləri görüşlərin qapalı hissəsində ortaya qoyulur. Orada təhqirlər də, hədə-qorxu da, şantaj da var. Ancaq Tramp hamının gözü qarşısında bunu edir. Hesab edirəm ki, bu müəyyən mənada müsbət hadisə sayılmalıdır.
Trampın belə senzurasız müraciəti, İran xalqını təhqir etməsi nə nəticə verə bilər? Xalqı öz rəhbərliyi ətrafında bir az daha da sıx birləşdirər. Çünki bu cür insanların böyük dövlətlərə rəhbərlik etməsi və onları İran xalqına nə cür yaşamağı öyrətməsi təbiidir ki, xalq qəbul edə bilməz. Trampın hansı məqsədlə bu cür senzurasız müraciətlər səsləndirməsindən aslı olmayaraq bu Amerika dövlətinə yalnız zərər gətirir”.
A.Səmədov qeyd etdi ki, burada heç bir xeyirdən söhbət gedə bilməz. Bu kimi müraciətlərin İran xalqını hakimiyyət ətrafında birləşdirdiyini deyən A.Səmədov qeyd edti ki, bu Amerikanın dünyadakı nüfuzuna ciddi şəkildə təsir göstərir. “Trampın ən yaxın müttəfiqi olan dövlətlər də bu gün onun yanında deyillər. Təkcə bu fakt Trampın nə qədər yanlış yol tutduğunu hamıya nümayiş etdirir. Bu cür qeyri-diplomatik çağrışlar həm də Trampın çarəsizliyini göstərir. İşlər arzuladığı kimi getmir, gedəcəyinə ümid azdır, bu cür nəticə Trampın sonrakı rəhbərliyinə ciddi şəkildə təsir göstərəcək, Konqresə keçiriləcək aralıq seçkilərində məğlubiyyət bir az da artıb, Trampın “topal ördəyə” çevrilməsi ehtimalı xeyli çoxalıb və görünür bunu anlayan Tramp bundan sonra bir az da daha kəskin ifadələrdən istifadə edəcək və bu onun çarəsiz durumda olmasının sübutu kimi qəbul olunmalıdır”-deyə A.Səmədov qeyd etdi.
İradə SARIYEVA
