Sahil Kərimli: “Azərbaycan və Ermənistan arasında ticarət əlaqələrinin qurulması sülh istiqamətində atılan ən uğurlu addımdır”
Azərbaycan Prezidenti İlham Əliyev 6 aprel 2026-cı ildə Gürcüstana səfəri zamanı Ermənistanla sülhün gücləndirilməsi üçün ticarətin vacibliyini vurğulayıb və bu prosesdə Gürcüstanın roluna görə təşəkkür edib. O, sülh prosesində sadəcə sənədlərin yetərli olmadığını, atılan hər addımda sülhü möhkəmləndirmək üçün Gürcüstan vasitəsilə ticarətin önəmini qeyd edib.
Prezident Əliyev bildirib: “Cənab Baş nazir Azərbaycanla Ermənistan arasındakı sülh prosesinə də toxundu. Deyə bilərəm ki, bu prosesi gücləndirmək üçün, sadəcə olaraq, imzalanmış sənədlər yetərli deyil. Biz hər an, hər addım atıldıqda gərək bu sülhü gücləndirək və bunun ən yaxşı istiqaməti də ticarətdir. Bu gün Azərbaycanla Ermənistan arasında ticarət Gürcüstan vasitəsilə həyata keçirilir. Buna görə Gürcüstan hökumətinə öz təşəkkürümü bildirmək istərdim”.
Qeyd edək ki, aprelin 6-da Tbilisidə Azərbaycan Prezidenti İlham Əliyev və Gürcüstanın Baş naziri İrakli Kobaxidze mətbuata bəyanatlarla çıxış ediblər. Bu fikirlərdə birgə bəyantda yer alıb.
Prezidentin Gürcüstan səfəri çərçivəsində səsləndirdiyi bu bəyanatın böyük əhəmiyyət daşıdığını deyən politoloq Sahil Kərimli baki-xeber.com-a bildirdi ki, Azərbaycan həmişə çox praqmatik siyasət yürüdərək qonşuları ilə sülh və əmin-amanlıq içində yaşamağa üstün tutub: “Qonşularla dərin tarixi köklərə bağlı olan münasibətlər üzərində qurulan həm siyasi, həm də siyasi əlaqələr əlbəttə, Azərbaycanın xarici siyasətinin əsas prinsiplərindən biri olub. Bu baxımdan, bölgədə iqtisadi şaxələndirmənin həyata keçirilməsi, nəqliyyat kommunikasiya xəttlərinin inkişaf etdirilməsi, qonşu ölkələrlə qarşılıqlı idxal-ixrac əməliyyatlarının həyata keçirilməsi, eyni zamanda da qarşılıqlı investisiyaların qoyulması əsas istiqamətlərdən, prioritetlərdən biri olub. Gürcüstanla da Azərbaycanı bağlayan həm qonşuluq telləri, həm qədim tarixi köklər və qardaşlıq münasibətləri, səmimi əlaqələr bu gün də Azərbaycanın əsas siyasi prinsiplərindən biridir. Azərbaycan Prezidenti İlham Əliyevin Gürcüstana dövlət səfəri və bu səfər çərçivəsində keçirilən görüşlər, baş tutan təmaslar, aparılan danışıqlar və əldə olunan razılaşmalar əlbəttə ki, ölkələrimizin gələcəkdə də mehriban qonşuluq, sülh və əmin-amanlıq içərisində yaşamaq və bundan qaynaqlanaraq iqtisadi əlaqələri daha da dərinləşdirmək prinsipidir. Azərbaycan Prezidentinin qeyd etdiyi kimi sülhün irəliyə aparılması, sülhün irəliyə aparılması əlbəttə ki, iqtisadi əlaqələrin gücləndirilməsindən keçir”.
S.Kərimli vurğuladı ki, Azərbaycan qonşu ölkələrlə, xüsusilə də Gürcüstanla bu siyasətə sadiq qalaraq əlaqələri daha da dərinləşdirmək niyyətindədir. Ekspert qeyd etdi ki, bu gün Azərbaycan Ermənistanla sülh müqaviləsi imzalamaq istiqamətində bütün mümkün addımları atır: “Ermənistanla Azərbaycan arasında sülh müqaviləsinin imzalanması təkcə Azərbaycan və Ermənistan üçün yox, bütövlükdə bölgədə yerləşən bütün dövlətlər üçün vacib amillərdən biridir. Burada nəqliyyat-kommunikasiya xəttləri, idxal-ixrac əməliyyatları, logistik nəhəng layihələr ön plana çıxır və Azərbaycanla Gürcüstanın qarşılıqlı əlaqələrini gücləndirmək üçün iqtisadi irəliləyiş, iqtisadi əlaqələrin gücləndirilməsi çox vacib amillərdən biridir. Ona görə də bu gün Azərbaycan Prezidentinin vurğuladığı kimi Gürcüstan da daxil olmaqla bütün bölgə ölkələri ilə iqtisadi əməkdaşlığı dərinləşdirmək, ticari əlaqələri gücləndirmək vacibdir. Azərbaycan və Ermənistan arasında ticarət əlaqələrinin qurulması sülh istiqamətində atılan ən uğurlu addımdır”.
S.Kərimlinin sözlərinə görə, bu səbəbdən də Azərbaycan Prezidenti həmişə olduğu kimi yenə də həm qətiyyətli, həm milli maraqlara əsaslanan siyasət həyata keçirir, eyni zamanda da Azərbaycanın uzun illərdir yürürtdüyü düşünülmüş, praqmatik siyasətini bu gün də doğru-düzgün istiqamətdə davam etdirir.
İradə SARIYEVA
