Erməni Milli Konqresinin milyarder Samvel Karapetyanın rəhbərlik etdiyi qüvvə ilə ittifaq yaratmaq səyləri uğursuzluğa düçar olduğundan, qurum seçkilərdə ayrıca iştirak etmək qərarına gəlib. Bu xüsusda verilən bəyanatda bildirilir: "Erməni Milli Konqresi qarşıdan gələn seçkilərdə Samvel Karapetyanın "Güclü Ermənistan" partiyası ilə milləti məhv edən rejimə qarşı böyük bir ittifaq yaratmaq üçün bütün lazımi səyləri göstərdi. Biz ittifaqın yaradılması üçün heç bir ilkin şərt qoymadan maksimum çeviklik nümayiş etdirdik. Bizdən asılı olmayan səbəblərə görə həmin ittifaq baş tutmadı".
Uğursuz danışıqlara baxmayaraq, birinci prezident Levon Ter-Petrosyanın rəhbərlik etdiyi qüvvə parlamentdə koalisiya yaratmaq və ölkəni qaçılmaz təhlükələrdən xilas etmək üçün həm seçkiqabağı, həm də seçkidən sonrakı mərhələlərdə "Güclü Ermənistan" və digər müxalifət qüvvələri ilə əməkdaşlığa hazır olduğunu açıqladı. Erməni Milli Konqresi əvvəlki seçkilərdə təxminən 20 min səs toplayaraq parlamentdən kənarda qaldı. 7 iyun seçkilərində dörd faizlik baryeri necə aşmağı planlaşdırdıqları bəlli deyil. Samvel Karapetyanın "Güclü Ermənistan" partiyası Erməni Milli Konqresi ilə ittifaqdan niyə imtina etdiklərini hələ izah etməyib. Üçüncü prezident Serj Sarkisyan bildirib: "Düşünürəm ki, bu gün müxalifətin liderinin, bəli, "Güclü Ermənistan" olduğuna heç kimin şübhəsi yoxdur". Samvel Karapetyanın "Güclü Ermənistan"ını aparıcı müxalifət qüvvəsi hesab edən Serj Sarkisyan hələlik Respublika Partiyasının 7 iyun seçkilərində onu dəstəkləyib-dəstəkləməyəcəyini deməkdən yayınır: "Bu səslər mənim cibimdə deyil, kiməsə verib-vermməək üçün. Düşünürəm ki, seçki kampaniyası zamanı xalqımız qərar verəcək". Serj Sarkisyan təxminən bir ay sonra, 8 mayda başlayacaq kampaniya zamanı mötərizələri açacağına söz verir: "Əhəmiyyətli olan odur ki, partiya üzvləri, bizim tərəfdarlarımız, demək olar ki, tamamilə seçkilərə gedəcək və müxalifət qüvvələrinə səs verəcəklər. Görəcəyik ki, prosesdə hansı qüvvələr var". Serj Sakisyan əmindir ki, əgər kampaniya zamanı olmasa belə, ən azı "seçkilərin nəticəsində" müxalifət birləşəcək və birgə hərəkətlərlə "eyni nöqtəyə çatacaq".
Qeyd edək ki, ikinci prezident Robert Köçəryan da seçkilərdə böyük seçkiqabağı ittifaqlarla iştirak etməyin vacibliyindən danışıb: "Əminəm ki, müxalifət qüvvələri 2-3 böyük cəbhə ilə iştirak etdikdə olduğundan daha az səs alacaqlar. Görürəm ki, müxalifət meydanı seçkilərə 3, maksimum 4 böyük blokla gedə bilər". Yeri gəlmişkən, Sarkisyanla Köçəryanın komandaları arasında kəskin fikir ayrılıqlarına və "Nikol Paşinyanı kim gətirdi" ilə bağlı qarşılıqlı ittihamlara baxmayaraq, Respublika Partiyasının qurultayından sonra Serj Sarkisyan Robert Köçəryanın rəhbərlik etdiyi alyansın uğur qazanmasını çox istədiyinə əminlik bildirdi. Bundan əlavə, o, öz sorğularının Robert Köçəryanın rəhbərlik etdiyi qüvvənin Respublika Partiyasından daha yüksək reytinqə malik olduğunu göstərdiyini açıq şəkildə bildirdi. 7 iyun seçkilərindən əvvəl müxalifət meydanında artıq üç əsas blok formalaşıb: "Samvel Karapetyanın rəhbəri olduğu "Güclü Ermənistan" alyansı, Robert Köçəryanın "Ermənistan" alyansı və müxtəlif siyasi qüvvələr və fiqurların qoşulduğu Qaqik Tsarukyanın Çiçəklənən Ermənistan Partiyası. Paralel olaraq, əvvəlki günlərdə bir sıra qüvvələr seçkilərdə iştirak etməyəcəklərini və Samvel Karapetyanı dəstəkləyəcəklərini açıqladılar. Onların arasında keçmiş xarici işlər naziri Raffi Ovannisyanın qurduğu İrs partiyası da var. Siyasi qüvvə son qurultayında qəbul edilən qətnamədə "milli xeyirxah Samvel Karapetyanın ətrafında formalaşan ümumxalq birliyini dəstəklədiyini" bildirib. Raffi Ovannisyan çıxışında Samvel Karapetyan, keçmiş ombudsman Arman Tatoyan və "Yaşamaq üçün Torpaq" partiyası ilə geniş konsolidasiya yaratmaq məsələsi ilə bağlı müzakirələr apardıqlarını bildirib. Lakin Ovannisyanın sözlərinə görə, onlar ortaq məxrəcə gələ bilməyiblər. Keçmiş baş nazir Hrant Baqratyanın rəhbərlik etdiyi Azadlıq Partiyası da Samvel Karapetyana dəstəyini açıqlayıb.
Samirə SƏFƏROVA
