Məlum olduğu kimi, Rusiya baş nazirinin müavini Aleksey Overçuk xəbərdarlıq edib ki, Avropa İttifaqına (Aİ) daxil olacağı təqdirdə, Ermənistanın Rusiya ilə hava əlaqəsi olmayacaq: "Hazırda Avropa İttifaqı ölkələri ilə hava əlaqəsi yoxdur, bu isə o deməkdir ki, bizim Ermənistanla da hava əlaqəmiz olmayacaq". O qeyd edib ki, Ermənistan vətəndaşları Avropaya inteqrasiya istiqamətində qəbul edilmiş kursun potensial nəticələrini dərk etməlidirlər: "Bəlkə də bu, çox sərt səslənir, lakin biz istəyirik ki, Ermənistandakı insanlar başa düşsünlər ki, əgər bu baş verərsə, o cür hallar məhz Avropa İttifaqı ilə yaxınlaşma barədə qərarlar qəbul edildiyi üçün baş verəcək".
Bununla belə, Overçukun sözlərinə görə, Ermənistanın Aİ-yə daxil olmasının mümkün nəticələri naməlum qalır. O vurğulayıb ki, "Beynəlxalq Sülh və Rifah üçün Tramp Marşrutu" layihəsinin həyata keçirilməsi ilə bağlı sazişin imzalanması da Cənubi Qafqazda regional tarazlığı pozub: “Problem ondadır ki, bu imzalar daha dərin prosesləri tətiklədi. Onlar Türkmənçay müqaviləsinin imzalandığı 1828-ci ildən bəri mövcud olan regional tarazlığı pozub". Overçuk deyib ki, həmin dövrdə İrəvan və Naxçıvan xanlıqlarının torpaqları Rusiya imperiyasına verilib və sərhəd coğrafi sərhəd - Araz çayı boyunca müəyyən edilib: “O vaxtdan bəri bu, iki böyük qonşu arasında razılaşmalarla təmin edilən ümumilikdə dinc sərhəd olub”. Overçuk əlavə edib ki, Rusiyanın artıq Ermənistanda maraqları yoxdursa, onun ərazisindən yük daşınması üçün az səbəb olacaq. Ermənistanın hakim Vətəndaş Müqaviləsi Partiyasından olan parlament üzvü Qaqik Melkonyan bütün bunlarla bağlı maraqlı fikirlər səsləndirib: “Rusiyadan ultimatumlar eşitdiyimiz ilk dəfə deyil; bu, ölkə prezidenti tərəfindən səsləndirilən ilk ultimatumdur. İndi xalqımız qərar verməlidir: Rusiya ilə, yoxsa Rusiyasız, Avropa ilə, yoxsa Avropasız. Artıq Ermənistanın ən güclü müttəfiqinin, 1828-ci ildən bəri təhlükəsizliyimizin qarantı olan ölkənin bizi necə təhdid etdiyini gördük. Overçuk bilərəkdən Türkmənçay müqaviləsinə diqqət yetirdi, lakin imzalandığı zaman Ermənistanın ərazisini və bugünkü vəziyyətini qeyd etməyi unutdu. Rusiya Ermənistan ərazisinin nə qədərini başqa dövlətlərə güzəştə gedib? Xalq bu məsələni referendumda həll etməlidir. İyunun 7-də xalq mövcud hökumətin qalıb-qalmayacağına, yoxsa başqalarının gəlib-gəlməyəcəyinə qərar verəcək. Paşinyan və Putinin 2020-ci ildəki görüşü zamanı bu cür məsələlər müzakirə edilə bilməzdi, çünki Rusiya hələ də həlledici rol oynayırdı və Qarabağın təhlükəsizliyi onun əlində idi. Və Qarabağ həmişə bizi öz forpostu kimi saxlamağın açarı olub". Onun sözlərinə görə, erməni xalqı Putinin dediyi kimi qazı 177 dollara deyil, təxminən 400 dollara alır: "Bizim alternativimiz olacaq; məsələn, İrandan qaz ala bilərik ki, bu da Rusiya qazından daha ucuz olacaq. Hava səyahətlərinin dayandırıla biləcəyini deyəndə, bundan yalnız biz əziyyət çəkəcəyikmi? Onlar daha çox əziyyət çəkəcəklər. İndi ölkəmiz Amerika və İngiltərə ilə münasibətlər qurur; İtaliyaya təyyarə bileti 35-36 dollara başa gəlir. İnsanlar işləmək üçün Avropaya gedəcəklər. Bütün bu məsələlər həll edilə bilər və Avropa Ermənistanda nə baş verə biləcəyini başa düşür. Ruslar Ararat dağını Türkiyəyə verəndə də ultimatum verdilər və biz bütün Qars və Ərdəhandan imtina edib Ermənistana gəldik. Qarabağda da eyni şeyi etdik. Artıq imtina edəcək heç bir şeyimiz qalmadığı nöqtəyə çatmışıq. "Tramp marşrutu" Rusiyanı qorxudur və qəzəbləndirir, çünki onlar Cənubi Qafqazda təsirlərini itirirlər. Onlardan ayrılmaq bizim üçün çox çətin olacaq, amma xalqın qərar verəcəyi an gələcək. Rusiya Ermənistanın dövlətçiliyinə sahib olmasını istəmir. O, onun Rusiyanın bir əyaləti olmasını istəyir. Rusiya Türkiyə ilə düşmənçiliyimizi qızışdırdı. Seçkilərdən sonra hər şey öz yerini tapacaq. Overçuk indi bizi qorxudur ki, xalq seçkilərdə Samvel Karapetyan, Robert Köçəryan, Qaqik Tsarukyana - Rusiyapərəst üçlüyə səs versin".
Tahir TAĞIYEV
