Əli Orucov: “Ola bilsin ki, Birləşmiş Ştatlarla Rusiya arasında hansısa gizli sövdələşmə var”
Qlobal gərginliyin artdığı bir dövrdə İran ətrafında yeni geosiyasi iddialar gündəmə gəlib. Getdikcə daha çox xəbər və rəylər gəlir ki, Rusiya İrana tam kömək edir.
Məlumata görə, Rusiya tərəfi ABŞ-ın Səudiyyə Ərəbistanındakı aviabazasının peyk görüntülərini çəkərək İranın həmin obyektə hücumuna şərait yaradıb. Rusiya hücumdan əvvəl həmin bazanın görüntülərini üç dəfə peyk vasitəsilə qeydə alıb. Başqa bir məlumata görə, Hörmüz boğazı yaxınlığında Rusiya nüvə sualtı qayığının yerləşdirildiyi təsdiqlənib. Belə ki, Moskva İrana dəstək məqsədilə altı sualtı qayığı, o cümlədən iki nüvə enerjisi ilə işləyən sualtı qayığı, Hörmüz boğazına göndərib. Bu sualtı qayıqların əsas missiyası ABŞ və İsrailin blokadanı pozmasının və ya İran sahillərinə yaxınlaşmasının qarşısını almaqdır. Hələ bundan əvvəl ABŞ-ın müharibə naziri Pit Heqset Rusiyanın İrana bəzi yardımlar etməsinə işarə etmişdi və bunu izlədiklərini demişdi.
Maraqlı olan odur ki, Tramp hələ də özünü o yerə qoymur və onun bununla bağlı Rusiyaya qarşı münasibəti dəyişmir. Buna səbəb nədir? Tramp nə düşünür?
Sözügedən məsələni baki-xeber.com-a şərh edən AMİP funksioneri Əli Orucov hesab edir ki, Trampın Rusiyanın İrana yardımına belə dözümlü yanaşması təəccüblüdür: “Burada bir sıra versiyalara dayanaraq ehtimallar irəli sürmək olar. Ola bilsin ki, Birləşmiş Ştatlarla Rusiya arasında hansısa gizli sövdələşmə var. Çünki biz görürük ki, ABŞ-ın Avropada ən yaxın müttəfiqləri belə, İranla bağlı Trampa dəstək vermirlər. Bəlkə də Avropa bu sövdələşmənin fərqində olduğu üçün ABŞ-ın yanında yer almır. Digər versiya ondan ibarətdir ki, Tramp Rusiya barədə kəskin addımlar atsa Moskva İrana silah yardımını daha da gücləndirə bilər. Bu isə ABŞ-ın körfəzdə vəziyyətini daha da çətinləşdirə bilər. Bu məsələdə Trampın çəkinəcəyi əsas faktor Rusiyanın Çinlə birlikdə koordinasiyalı şəkildə İrana hərbi yardım göstərməsidir. Fikrimcə, Tramp bundan daha çox ehtiyat edir. Trampın məqsədi İran məsələsində Rusiyanın Çinlə birlikdə hərəkət etməsini önləməkdir. Onu da nəzərə almaq lazımdır ki, İranda gedən müharibə Rusiyanın işinə yarayır. Həm neftin qiyməti artıb, həm də Rusiyanın neft ixracı üçün imkanlar açılıb. Hörmüzün bağlı olması Çinin daha çox Rusiya nefti idxal etməsinə zəmin yaradır. Düzdür, Çin onsuz da Rusiyadan böyük həcmdə neft idxal edirdi. Ancaq İran müharibəsindən sonra neftlə yaranan boşluğu Çin Rusiya nefti hesabına dolduracağını güman edirəm”.
Vidadi ORDAHALLI
