Elşad Həsənov: “Köçəryan Samvel Karapetyanı dəstəkləsə belə, Rusiya öz məqsədinə çata bilməyəcək”
Ermənistanda revanşist müxalifət təmərküzləşir. Raffi Hovannisiyan rəhbərlik etdiyi “İrs” Partiyasının 7 iyun tarixində keçiriləcək parlament seçkilərində iştirak etməyəcəyini açıqlayıb. Partiya bu qərarı ölkədə formalaşan yeni siyasi xətlə əlaqələndirib.
Bildirilib ki, “İrs” ümummilli konsolidasiyanı dəstəkləyir və bu proses tanınmış xeyriyyəçi Samvel Karapetyan ətrafında formalaşır. Bundan başqa, Ermənistanın eks-prezidenti Serj Sarkisyanın rəhbərlik etdiyi Ermənistan Respublika Partiyası (ERP) da seçkilərində iştirak etməyəcəyini rəsmən açıqlayıb. Partiya müalifətin parçalanmasının qarşısını almaq üçün seçkilərdə iştirak etməmək qərarı verib. Sarkisyan tərəfdarlarını müxalifət qüvvələrinə səs verməyə çağırıb.
O da məlumdur ki, Rusiya Köçəryanın şansının aşağı olduğunu yaxşı bilir. Ola bilərmi ki, son məqamda Moskvadan gələn sinqnalla Köçəryan da Samvel Karapetyana stavka edərək vahid mövqedən çıxış etsinlər?
Sözügedən məsələ ilə bağlı fikirlərini baki-xeber.com-la bölüşən siyasi ekspert Elşad Həsənov hesab edir ki, revanşist müxalifət 7 iyunda keçiriləcək parlament seçkilərinə ciddi hazırlaşır: “Çünki həmin qüvvələr Moskvaya bağlıdır. Rusiyanın bu seçkilərdə ciddi marağı var. Bunu Rusiya aprelin 1-də Putunlə Paşinyanın görüşündə açıq şəkildə ortaya qoydu. Putin Paşinyandan Rusiya vətəndaşlığı olan ermənilərin seçkidə iştirakına şərait yaradılmasını istədi. Paşinyan da cavabında dedi ki, Ermənistan qanunvericiliyində digər ölkə vətəndaşının seçkidə iştirakı qadağandır. Daha sonra Putin bəyan etdi ki, dünya bazarında qazın qiyməti 600 dollar olduğu halda, Rusiya bunu Ermənistana 177 dollara ixrac edir. Bununla Ermənistana eyham vurdu ki, bizdən asılısınız. Paşinyan da Putinə ağıllı cavab verdi ki, biz demokratik ölkəyik. Yəni Ermənistan xalqı istədiyi namizədə səs verəcək.
Samvel Karapetyan ev dustağı olsa da, Rusiya revanşistləri onun bloku ətrafında toplamağa çalışır. Müxalifət vahid cəbhədə Paşinyanın siyasi blokuna qarşı birləşməyə çalışır. Ancaq bunun nəticə verəcəyini düşünmürəm. Məsələ ondadır ki, revanşist qüvvələrin cəmiyyətdə sosial dayaqları zəifdir. Çünki Ermənistan əhalisi 20 il onların hakimiyyətini görüb. Yaxşı bilirlər ki, “Qarabağ klanı” hakimiyyətdə olanda ölkədə korrupsiya hansı səviyyədə olub. Onların hakimiyyəti dönəmində çoxsaylı siyasi qətllər törədilib. Ona görə də Köçəryan yox, Samvel Karapetyan olsa belə, dəyişən bir şey olmayacaq. Onlar hakimiyyətə gələcəyi təqdirdə Ermənistan Rusiyanın marionetkası olacaq. Bu baxımdan hesab edirəm ki, erməni cəmiyyəti proseslərin fərqindədir və 7 iyun seçkilərində Paşinyana səs verəcək. Köçəryan Samvel Karapetyanı dəstəkləsə belə, Rusiya öz məqsədinə çata bilməyəcək. Digər reallıq ondan ibarətdir ki, son illər Ermənistan əhalisinin sosial durumu yaxşılaşıb, əhalinin gəlirləri artıb. Bütün bunlar əlbəttə ki, erməni cəmiyyətinin mövqeyinə öz təsirini göstərir”.
Vidadi ORDAHALLI
