Rusiya baş nazirinin müavini Aleksey Overçuk Ermənistanın Avropa İttifaqına daxil olması halında, Ermənistanın Rusiya ilə hava əlaqəsi olmayacağı barədə xəbərdarlıq edib. Baş nazirin müavini bildirib: "Hazırda Avropa İttifaqı ölkələri ilə hava əlaqəsi yoxdur. Bu, o deməkdir ki, bizim Ermənistanla hava əlaqəmiz olmayacaq".
Overçukun sözlərinə görə, Ermənistan vətəndaşları rəsmi İrəvanın Avropa İttifaqı ilə yaxınlaşma qərarının mümkün nəticələrindən xəbərdar olmalıdırlar: "Bəlkə də çox sərt səslənir, amma biz istəyirik ki, Ermənistandakı insanlar başa düşsünlər ki, əgər bu baş verərsə, mütləq baş verəcək, çünki Avropa İttifaqı ilə yaxınlaşma ilə bağlı qərarlar qəbul edilib". Xatırladaq ki, İrəvan Avropa İttifaqına qoşulmaq niyyətindən vaz keçmir. Aprelin 1-də Kremldə Ermənistanın baş naziri Nikol Paşinyanla görüşündə Rusiya prezidenti Vladimir Putin eyni zamanda həm AİB-in, həm də Aİ-nin üzvü olmağın mümkün olmadığını vurğuladı. Paşinyan buna belə cavab verdi: "Hazırda gördüyümüz işlər və gündəliyimiz uyğundur və bu iki gündəliyi birləşdirmək mümkün olduğu müddətcə onları birləşdirəcəyik. Bu mümkün olmadıqda və qərar qəbul etmək lazım gəldikdə, əminəm ki, Ermənistan vətəndaşları qərar verəcəklər". Rusiya prezidentinin mətbuat katibi Dmitri Peskov isə qeyd edir: “Ermənistanın AİB-də iştirakı hazırda ölkənin MDB orta göstəricisini aşan templə inkişaf etməsinə imkan verir. Sizin AİB şəklində inteqrasiyanız var. Və orada xeyli pul qazanırsınız. Və AİB-yə üzvlüyünüz indi sizə MDB orta göstəricisindən və əlbəttə ki, Rusiya Federasiyasındakından daha yüksək sürətlə inkişaf etmək imkanı verir”. Kremlin sözçüsü vurğulayıb ki, İrəvan eyni zamanda Aİb və Avropa İttifaqının üzvü olmağın mümkünsüzlüyünü başa düşür və bu, vacibdir. Rusiyanın xarici işlər naziri Sergey Lavrov bildirib: “Ermənistan tərəfi Rusiya prezidenti Vladimir Putinin Ermənistanın baş naziri Nikol Paşinyanla görüşü zamanı səsləndirdiyi narahatlıqları anladığını bildirib. Münasibətlərin praktikada necə inkişaf etdiyini görəcəyik”. Rusiya Təhlükəsizlik Şurasının sədr müavini Dmitri Medvedyev isə "Telegram" kanalında regionda gərginliyi artıracaq kəskin bəyanatlarla çıxış edib. O, Rusiyanın qonşusu olan ölkələrin Avropa İttifaqına daxil olmasına qarşı daha tolerant yanaşmamağa çağırıb. Medvedyev Avropanın NATO daxilindəki ziddiyyətlər fonunda öz hərbi strukturunu yaratmaq planlarından bəhs edib. Onun sözlərinə görə, Brüsseldəki "siyasi eybəcərlər" Aİ daxilində tamhüquqlu hərbi komponent yaratmağı ciddi şəkildə düşünürlər: "Aydındır ki, alyans daxilində İran kampaniyasının kəskinləşdirdiyi güclü ziddiyyətlər var. Bu, dünyanın mənzərəsini tamamilə dəyişir. Artıq Avropa İttifaqı sadəcə iqtisadi birlik deyil və o, çox sürətlə Rusiyaya qarşı düşmən kəsilmiş tamhüquqlu hərbi alyansa çevrilə bilər". Rusiya rəsmisi vurğulayıb ki, mövcud şərait Moskvadan sərt addımlar tələb edir: "Nəyə işarə edirəm? Ona ki, qonşularımızın hərbi-iqtisadi Avropa İttifaqına üzv olmasına dözümlü yanaşmaqdan imtina etməyin vaxtı çatıb". Medvedyev həmçinin Rusiya prezidenti Vladimir Putinin Ermənistan baş naziri Nikol Paşinyanla son danışıqlarındakı fikirlərini xatırladıb. O qeyd edib ki, Aİİ (və Aİ üzvlüyü bir-biri ilə uzlaşmır. Rus politoloq Dmitri Suslov isə qeyd edir ki, Ermənistan Aİ-yə üzvlüklə bağlı hər hansı qanun qəbul edərsə, Rusiya bunu İrəvanın gələcəkdə anti-Rusiya qaydaları ilə oynamağa hazır olması kimi qiymətləndirəcək: “Belə bir addım Brüsselə Ermənistanın xarici siyasətini dəyişmək üçün təzyiq rıçaqı verəcək. Əgər məqsəd bu deyilsə, onda bu cür qanun layihələrindən imtina edilməlidir”. Ekspert həmçinin Qərbin Ermənistana verdiyi iqtisadi vədlərin şübhəli olduğunu vurğulayıb: “Rusiya Ermənistanın digər tərəfdaşlarla münasibət qurmasına qarşı deyil. Əsas məsələ odur ki, Ermənistan Rusiya ilə mövcud münasibətləri korlamasın və balansı qorusun. Lakin biz görürük ki, rəsmi İrəvan təkliflərin sərfəli olub-olmamasına baxmayaraq, sırf seçilmiş siyasi kurs xatirinə Rusiya ilə əlaqələri qurban verir”.
Tahir TAĞIYEV
