Rusiya Baş nazirinin müavini Aleksey Overçuk xəbərdarlıq edib ki, Ermənistan Avropa Birliyinə qoşularsa, artıq Rusiya ilə hava əlaqəsi olmayacaq.
O, Birinci Kanalda açıqlamasında hazırda Rusiyanın Aİ ölkələri ilə hava əlaqəsinin olmadığını bildirib: “Bu da o deməkdir ki, Ermənistanla hava əlaqəsi olmayacaq".
Overçukun sözlərinə görə, Ermənistan vətəndaşları rəsmi İrəvanın Aİ-yə yaxınlaşmaq qərarının potensial nəticələrindən xəbərdar olmalıdırlar: "Bu, çox sərt səslənə bilər, amma biz istəyirik ki, Ermənistandakı insanlar başa düşsünlər, əgər bu baş verərsə, bu olacaq, çünki Aİ-yə yaxınlaşmaq üçün qərarlar qəbul edilib".
Eyni zamanda, Overçuk bildirib ki, Ermənistanın Aİ-yə daxil olmasının son nəticələrinin nə olacağı hələ məlum deyil.
Bundan əvvəl açıqlama verən Ermənistan Parlamentinin sədri Alen Simonyan isə bildirib ki, Moskva ölkəyə tədarük edilən Rusiya qazının qiymətini artırmaq qərarı versə, Kollektiv Təhlükəsizlik Müqaviləsi Təşkilatından (KTMT) və Avrasiya İqtisadi Birliyindən (AİB) çıxma prosesinə başlayacaqlar.
Simonyan bu cür danışıqların yeni bir şey olmadığını deyərək, əgər qiymətlər artırılarsa, Ermənistanın buna cavab verəcəyini bildirib.
Bununla belə, Simonyan qiymət artımının çox ehtimal olunmadığını da bildirib. O, iki ölkə liderləri arasında çox yaxşı və məhsuldar bir görüşün baş tutduğunu deyib və bildirib ki, bu görüş təhlükəni aradan qaldırmalıdır.
Ermənistana qaz tədarükü Rusiyanın "Qazprom" şirkətinin tam mülkiyyətində olan törəmə şirkəti olan "Qazprom Armenia" tərəfindən həyata keçirilir. 2025-ci ilin birinci yarısında tədarük həcmi 1,2 milyard kubmetri keçib. Yanacaq Gürcüstan ərazisindən keçən "Şimali Qafqaz - Zaqafqaziya" qaz kəməri ilə nəql olunur. Boru kəmərinin illik layihə gücü 1,8 milyard kubmetrdir.
Ermənistanla Rusiya arasında son zamanlar artan gərginlik, xüsusən də İrəvanın Qərblə yaxınlaşmaq səyləri səbəbindən dərinləşir. İrəvan tez-tez Moskvanın rəhbərlik etdiyi hərbi ittifaq olan KTMT-ni tənqid edir və eyni zamanda Avropa Birliyi ilə yaxınlaşma siqnalı verir. Qaz qiymətləri də bu gərginliyin ən vacib iqtisadi tətikləyicilərindən biri kimi diqqət çəkir.
Aprelin 1-də Ermənistanın Baş naziri Nikol Paşinyan və Rusiya Prezidenti Vladimir Putin Moskvada danışıqlar aparıblar. Görüş zamanı Putin bildirib ki, Moskva İrəvanın Aİ ilə münasibətlər barədə müzakirələrindən xəbərdardır və bu müzakirələrə sakit yanaşır. Lakin Rusiya lideri açıq şəkildə bildirib ki, İrəvanın həm Aİ-yə, həm də AİB-ə eyni vaxtda üzvlüyü mümkün deyil. "Bu, siyasi məsələ deyil, sırf iqtisadi məsələdir", - deyə Putin bildirib.
Paşinyan isə öz növbəsində qeyd edib ki, İrəvan AİB-ə üzvlüyün Aİ üzvlüyü ilə uyğunsuz olduğunu bilir, lakin proseslər hələ seçim edilməli olan nöqtəyə çatmayıb.
İrəvan və Moskvadan gələn son açıqlamalar göstərir ki, Paşinyan və Putin arasında danışıqlara baxmayaraq, iki ölkə arasında gərginlik daha da artacaq.
Tahir TAĞIYEV
