Fikrət Yusifov: “Bu fikirlərlə Ağ Ev Trampın məsələ ilə bağlı yaxın günlərdə verəcəyi bəyanata hazırlıq görür”
ABŞ Vaşinqtonun İrana qarşı hərbi əməliyyatının xərclərini ərəb dövlətlərinin ödəməsində maraqlıdır. Bu barədə Ağ Evin mətbuat katibi Kerolayn Livitt jurnalistlər üçün keçirilən ənənəvi brifinqdə bildirib.
“Düşünürəm ki, Birləşmiş Ştatlar Prezidenti Donald Tramp onları buna təşviq etməkdə çox maraqlı olardı. Bu məsələdə ondan (Amerika lideri) önə keçməyəcəyəm. Amma əminəm ki, onun bu fikri var”, - deyə o, Vaşinqtonun ərəb ölkələrinin İrana qarşı əməliyyatını maliyyələşdirməsini istəyib-istəməməsi sualına cavab olaraq bildirib.
Maraqlıdır, ərəb ölkələri müharibənin xərclərini öz üzərlərinə götürəcəklərmi? Ümumiyyətlə, onlar Trampın bu istəyini qəbul edəcəklərmi?
Sözügedən məsələ ilə bağlı fikirlərini baki-xeber.com-la bölüşən sabiq maliyyə naziri, professor Fikrət Yusifov buna bir neçə prizmadan yanaşdı: “Tramp Birləşmiş Ştatlar adına gördüyü bütün işlərə, beynəlxalq müstəvidə həll etdiyi və həll etmək istədiyi bütün məsələlərə biznesin gözü ilə baxır - çünki o, biznesmendir. Əslində burada təəccüblü heç nə yoxdur. ABŞ prezidenti tərəflərdən gördüyü işlərin qarşılığını istəyir. Bu gün Fars körfəzində ABŞ-ın apardığı müharibə körfəz ölkələri üçün olum-ölüm məsələsidir. Hörmüz boğazının bağlanması iqtisadiyyatı və sosial həyatı birbaşa neftlə bağlı olan körfəz ölkələri üçün bir fəlakətə çevrilməkdədir. İndi bu ölkələrin neft-qaz satışından gündəlik itkiləri 2 milyard dolların altındadır. Heç də əbəs deyil ki, əvvəllər İrana qarşı hücuma yox deyən körfəz ölkələri, indi Trampdan İranı mümkün qədər sərt vurmağı və bu müharibəni mümkün qədər tez bitirməyi xahiş edirlər. Tramp isə o qədər də tələsmir. Onun öz hesablamaları var və o bu müharibəyə həm körfəz ölkələrini və həm də Avropanın aparıcı ölkələrini cəlb etmək niyyətindədir. Bu ölkələr isə ABŞ-İsrail koalisiyasına qoşulmağa hələlik tərəddüd edirlər. Lakin sonda qoşulmaqdan dolayı çarələri qalmayacaq. Çünki körfəz ölkələri nefti-qazı sata bilmədikləri, Avropa və Asiya ölkələri isə neftin qiymətlərinin bahalaşması səbəbindən getdikcə dərinləşən problemlər yaşamaqdadırlar. Ağ Ev sözçüsünün Trampın körfəz ölkələrindən müharibə xərclərini ödəmələrini istəyəcəyinə dair fikirləri isə onun öz sözləri deyil. Bu fikirlərlə Ağ Ev Trampın məsələ ilə bağlı yaxın günlərdə verəcəyi bəyanata hazırlıq görür. ABŞ rəsmisi bu fikirləri səsləndirməklə körfəz ölkələrinin yadına salır ki, bu sizin müharibədir, biz sizin üçün çalışırıq və siz də zəhmət çəkib bu müharibə üçün çəkdiyimiz xərcləri qarşılayın. Bəzi məlumatlara görə Tramp körfəz ölkələrindən müharibəyə çəkiləcək xərclərdən 15-20 dəfə çox 4-5 trliyon dollar xərac tələb edəcək. Müharibə bitdikdən sonra isə Hörmüz boğazına bir şlaqbaum qoyub, oradan keçən bütün yüklərdən ABŞ adına rüsum toplayacaq”.
Vidadi ORDAHALLI
