Elvin Abbasov: “Bank əməliyyatlarından tutmuş dövlət reyestrlərinə qədər bir çox rəqəmsal xidmət dayana bilər”
“Terror əməliyyatlarını dayandırmaq barədə dəfələrlə etdiyimiz xəbərdarlıqları qulaqardına vurdunuz və bu gün sizin və İsrail müttəfiqlərinizin terror hücumları nəticəsində bir neçə İran vətəndaşı şəhid olub”. Bu barədə “Pars Today” qəzetinin verdiyi məlumata görə, İslam İnqilabı Keşikçiləri Korpusunun (SEPAH) bəyanatında bildirilib.
“Amerika İKT və süni intellekt şirkətləri terror hədəflərinin hazırlanmasında və izlənilməsində əsas element olduğundan, bu terror əməliyyatlarına cavab olaraq, terror əməliyyatlarında iştirak edən əsas qurumlar artıq qanuni hədəflər hesab ediləcək.
Bu qurumların işçilərinə dərhal iş yerlərini tərk etmələri tövsiyə olunur. Regiondakı bütün ölkələrdə bu terror şirkətlərinə yaxın ərazilərin sakinlərinə də bir kilometr radiusda ərazini tərk etmələri və təhlükəsiz yerə köçmələri tövsiyə olunur.
Çərşənbə günündən etibarən terror planlaşdırmasında fəal iştirak edən şirkətlər hər bir sui-qəsdə görə cavab tədbirlərinə məruz qalacaqlar.
Bu şirkətlərin sırasına Sisco, HP, Intel Oracle, Microsoft, Apple, Google, Meta, IBM, DEL, Plantier, Nvidia, G.P. Morgan, Tesla, G.E. Spire Solution, G42, Boeing daxildir.
İran Google, Meta, Tesla və digər sosial şəbəkə platformalarını da vuracağını açıqlayıb. Bu baş verərsə sosial şəbəkələrdə nə baş verəcək?
İKT üzrə ekspert Elvin Abbasov baki-xeber.com-a bildirdi ki, İranın bu bəyanatı reallaşarsa, qlobal rəqəmsal mühitdə ilk növbədə zəncirvari xidmət kəsintiləri (outages) baş verər. Siyahıda həm bulud texnologiyaları, həm də əməliyyat sistemləri təminatçıları olduğu üçün bank əməliyyatlarından tutmuş dövlət reyestrlərinə qədər bir çox rəqəmsal xidmət dayana bilər. Texniki dildə "tək nöqtəli uğursuzluq" (Single Point of Failure) adlandırılan bu vəziyyət, mərkəzləşmiş platformaların çökməsi ilə qlobal məlumat mübadiləsini və təchizat zəncirini ciddi şəkildə axsadar.
Digər tərəfdən, belə bir gərginlik sosial şəbəkələrdə dezinformasiya və hibrid müharibənin artmasına, süni intellektlə hazırlanan manipulyasiya məzmunlarının cəmiyyətdə narahatlıq yaratmasına səbəb olar. Nəqliyyat, aviasiya və peyk rabitəsi sistemlərinin hədəf alınması isə həm logistikanın ləngiməsi, həm də ehtiyat əlaqə kanallarının itirilməsi deməkdir”.
E.Abbasov qeyd etdi ki, belə bir vəziyyətdə rəqəmsal dözümlülük (resilience) ən vacib faktora çevrilər; çünki texnoloji nəhənglərin zəifləməsi qlobal rəqəmsal nizamın pozulması və kritik məlumatların sızması riskini artırır.
İradə SARIYEVA
