Elşad Həsənov: “Qarabağ münaqişəsi başlayandan bəri ilk dəfədir dayanıqlı sülh bərqərar edilib”
Ermənistan baş naziri Nikol Paşinyan sosial şəbəkə hesabında bəyan edib ki, Ermənistan müstəqillik qazandığı dövrdən bəri ilk dəfədir ki, Azərbaycanla tam sülhə nail olub. Onun fikrincə, 2025-ci ilin avqust ayına qədər olan dövrdə ölkəsi heç vaxt Azərbaycanla belə bir sülh mühitində olmayıb:
"2025-ci il Ermənistanın Azərbaycanla atışmalar nəticəsində itki vermədiyi ilk təqvim ilidir. 2024-cü ilin fevralından bəri sərhəddə ölüm və yaralanma halı qeydə alınmayıb".
Baş nazir vurğulayıb ki, iki ölkə arasında sülh artıq de-yure əsasa malikdir. O, 2024-cü ildə delimitasiya komissiyalarının imzaladığı və hər iki ölkədə ratifikasiya olunaraq ali hüquqi qüvvə alan "Birgə fəaliyyət reqlamenti"ni buna nümunə göstərib: “Bu sənədlə tərəflər Almatı bəyannaməsini əsas prinsip kimi tanıyıblar. Bu o deməkdir ki, Ermənistan və Azərbaycan qarşılıqlı surətdə sovet dövründəki ərazilərini ali hüquqi səviyyədə tanıyıblar. Sülhün təməli budur”.
Sözügedən məsələ ilə bağlı fikirlərini baki-xeber.com-la bölüşən siyasi ekspert Elşad Həsənov hesab edir ki, doğurdan da Qarabağ münaqişəsi başlayandan bəri ilk dəfədir dayanıqlı sülh bərqərar edilib: “Azərbaycan ərazi bütövlüyünü və suverenliyini tam bərqərar edəndən sonra 2024-cü ildən sərhəddə ölüm və yaralanma halı qeydə alınmayıb. Bu, çox önəmli məqamdır. Xüsusən də ötən ilin avqustunda Vaşinqtonda Azərbaycanla Ermənistan arasında sülh sazişinin bəndlərinin paraflanmasından sonra qarşılıqlı etimad daha da artıb. Sülh sazişi imzalanmasa da, iki ölkə sülh şəraitində yaşayır. Azərbaycan Ermənistana yüklərin daşınmasına şərait yaradıb. Ermənistana yanacaq ixrac edilir. O üzdən, Paşinyanın səsləndirdiyi fikirlər həqiqəti əks etdirir. O da bir reallıqdır ki, Ermənistan iyunda keçirilən parlament seçkilərinə hazırlaşır və Rusiyaya bağlı revanşist müxalifət onu çətin duruma salmaq üçün bütün vasitələrə əl atır. Onu Qarabağı təhvil verməkdə ittiham edərək müharibə ritorikasını gücləndirirlər. Ona görə də erməni əhalisinin böyük əksəriyyəti Paşinyanın apardığı bu siyasəti dəstəkləyir. Nikol erməni cəmiyyətini əmin edir ki, Cənubi Qafqazda sülhün olması onun apardığı siyasət sayəsində mümkün olub. Hesab edirəm ki, Ermənistanın hazırladığı yeni konstitusiya layihəsində Azərbaycana qarşı ərazi iddiaları çıxarılıb. Ermənistanın ədliyyə naziri buna açıq işarə etdi. Erməni cəmiyyəti referendumda yeni reallığa uyğun Ermənistan konstitusiyası qəbul edəcək. Digər reallıq ondan ibarətdir ki, Azərbaycan müharibədə qalib gəlsə də sülh təşəbbüsü ilə çıxış edən tərəfdir. Ermənistanın blokadadan çıxarılması ilə bağlı Azərbaycan ilk addım atıb. Bütün bunlardan çıxış edərək hesab edirəm ki, erməni seçiciləri qarşıdakı parlament seçkilərində sülhü bərqərar edən siyasi qüvvəyə səs verəcəklər. Azərbaycan dövləti də istəyir ki, Cənubi Qafqazda sülh qorunsun və inkişaf etdirilsin. Nəticədə hər iki ölkə davamlı olaraq sülh şəraitində yaşasınlar”.
Vidadi ORDAHALLI
