Məhəmməd Əsədullazadə: “Müxalifət qalib gələrsə, düşünmürəm bu, iki ölkə əlaqələrinə mənfi təsir göstərsin”
Məlum olduğu kimi, aprelin 12-də Macarıstanda parlament seçkiləri keçiriləcək. Macarıstandakı seçki prosesi dünyanın diqqət mərkəzindədir. Məsələ ondadır ki, baş nazir Viktor Orbanın müstəqil siyasət yeritməsi, Avropa İttifaqının bir sıra qərarlarına veto qoyması Brüsseli qane etmir.
O da məlumdur ki, Orban hökuməti hər zaman Avropa İttifaqında Azərbaycanın maraqlarını qoruyub. Macarıstan zaman-zaman öz veto hüququndan istifadə edərək Aİ-də Azərbaycan əleyhinə qərarları bloklayıb. Məsələn, 2023-cü ildə Aİ-nin Ermənistan ordusuna 10 milyon avro yardım edilməsi qərarına Macarıstan veto qoyub. Həmin il Qarabağda keçirilən antiterror əməliyyatlarını Aİ bəyanatı ilə pisləmək istədi, amma Macarıstan buna imkan vermədi. Bundan başqa, Orban 2010-cu ildə baş nazir olandan sonra 2012-ci ildə Ramil Səfərov Azərbaycana ekstradisiya edildi. Bir sözlə, seçkilərdə müxalifət qalib gəlsə bu, iki ölkə arasında münasibətlərə, Macarıstanın Azərbaycanla bağlı mövqeyinə necə təsir edəcək?
Sözügedən məsələyə aydınlıq gətirən politoloq Məhəmməd Əsədullazadə baki-xeber.com-a açıqlamasında buna bir neçə prizmadan yanaşdı: “Macarıstanda keçirilən parlament seçkiləri Avropa üçün də mühüm siyasi əhəmiyyət daşıyır. Çünki Orban Avroittifaqın Ukrayna ilə bağlı qərarlarına təsir edir. Demək olar ki, Aİ-də müəyyən dərəcədə müstəqil siyasət aparır. Bütün bunlar Brüsseli ciddi şəkildə narahat edir. Azərbaycan üçün Orban lazımlı bir siyasi liderdir. Ona görə ki, daim Azərbaycanla strateji əlaqələrə önəm verən, Türk Dövlətləri Təşkilatında iştirak edən liderdir. Azərbaycanla Macarıstan arasında siyasi-iqtisadi əlaqələrin inkişafında Orbanın xidmətləri böyükdür. Aprelin 12-də keçirilən seçkilərdə müxalifət qalib gələrsə, düşünmürəm bu, iki ölkə əlaqələrinə mənfi təsir göstərsin. Çünki Azərbaycan artıq ərazi bütövlüyünü təmin edib. Azərbaycan regionun lider dövlətidir. O baxımdan yeni hakimiyyət çalışacaq ki, mövcud siyasi əlaqələrə önəm versin. Yəni iki ölkə arasında əlaqələr inkişaf etsin. Müxalifətin qalib gəlməsi yalnız Macarıstanla Aİ arasında əlaqələrə müsbət təsir edə bilər. Budapeştlə Bakı arasında olan siyasi münasibətlər əvvəlki kimi davam edəcək. Çünki Azərbaycanla Macarıstan arasında hər hansı problem yoxdur. İqtisadi-siyasi və bir çox digər əlaqələr davam edir. Söhbət təhsil, mədəniyyət sahələrdəki əlaqələrdən gedir. Bu baxımdan seçkidə kimin qalib gəlməsindən asılı olmayaraq bu, Azərbaycan üçün hansısa problem yaratmayacaq. İkitərəfli münasibətlər normal olaraq qalacaq”.
Vidadi ORDAHALLI
