Sahil Kərimli: “İranda baş verən müharibə və bu müharibənin hansı sonluqla nəticələnməsi Zəngəzur dəhlizi layihəsinə...”
ABŞ/İsrail birləşmələrinin İrana qarşı apardığı müharibə bölgəmizin həyatına da təsirsiz ötüşmür. Bu müharibənin Zəngəzur dəhlizi layihəsinin gələcəyinə necə təsir edəcəyi də əsas müzakirə edilən mövzulardandır. Ermənistanın xarici işlər naziri Ararat Mirzoyan Armenian News-NEWS.am saytına bildirib ki, TRIPP (Zəngəzur dəhlizi) ətrafında müzakirələr səngiməyib. “Biz sənədlərin təsdiq mərhələsindəyik.
Güman edirəm ki, növbəti mərhələ hansısa hökumətlərarası sazişin imzalanmasını əhatə edəcək və bundan sonra təşkilat yaradılacaq. Biz ilin sonuna və ya ortasına qədər tikintiyə başlamaq istədiyimizi demişdik, amma bunun nə dərəcədə real olduğunu bilmirəm; hər halda, bu, sadəcə bir arzu idi", - Mirzoyan deyib.
İranda müharibənin gedişi və sonluğu TTIPP- Zəngəzur marşrutuna necə təsir edə bilər?
Politoloq Sahil Kərimli baki-xeber.com-a bildirdi ki, ümumiyyətlə ABŞ/İsrail İran qarşıdurması bir çox baxımdan bölgədə müəyyən gərginliklər yaradır. “Təbiidir ki, bölgə iqtisadiyyatına, bölgə ölkələrinin iqtisadi inteqrasiyasına müəyyən problemlər var. Amma hesab edirəm ki, İranda baş verən müharibə və bu müharibənin hansı sonluqla nəticələnməsi Zəngəzur dəhlizi layihəsinə bir o qədər də ciddi təsir etməyəcək. Çünki layihə dünya əhəmiyyətli layihədir, Azərbaycanın da bölgədə sülh və təhlükəsizlik yaratmaq istəkləri Zəngəzur dəhlizi ilə də sıx bağlı məsələdir. Çünki dünyanın o başından, yəni uzaq Çindən Avropaya qədər uzanacaq Orta Dəhlizin əsas açarı kimi bu gün Zəngəzur dəhlizi çox böyük əhəmiyyətə malikdir”.
S.Kərimli vurğuladı ki, Azərbaycan bölgədə sülh, təhlükəsizlik, dayanıqlı rifah yaratmaq üçün bütün imkanlarından istifadə edir. “Hesab edirəm ki, Azərbaycanın müəllifi olduğu Zəngəzur dəhlizi layihəsi, xüsusilə də ABŞ-ın, birbaşa Prezident Donalt Trampın çox dəstək verdiyi bu layihə gələcəkdə bölgənin iqtisadi inteqrasiyasına, iqtisadi şaxələnməsinə gətirib çıxaracaq. Yəni İranla bağlı baş erən proseslər, İrana qarşı həyata keçirilən hərbi əməliyyatlar və İranın da bu hücumlara cavab verməsi, müharibənin daha da alovlandırılması üçün atdığı qarşılıqlı addımlar əlbəttə ki, çox ciddi risqlər yaradır. Amma bu Zəngəzur dəhlizi ilə bağlı məsələləri o qədər də təhlükə altında qoymur. Çünki ortada çox möhkəm qətiyyət və iradə var, Azərbaycan dövlətinin atdığı ciddi addımlar var, bölgədə sülh və təhlükəsizlik üçün verilmiş təkan və dəstək var. Bu baxımdan, Zəngəzur dəhlizinin gələcəyi təhülükə altında deyil. Əksinə bu layihənin reallaşdırılması istiqamətində bütün proseslər əvvəlki kimi davam etdirilir, bu irəliyə aparılır”-deyə S.Kərimli qeyd etdi.
İradə SARIYEVA
