Samir Hümbətov: “İran rəsmiləri özləri də bu məsələdə Rusiya və Çinin dəstəyinin böyük olduğunu gizlətmirlər”
İranın rəsmi Telegram kanalları 27 martda İranın hücumundan əvvəl və sonra Səudiyyə Ərəbistanındakı Şahzadə Sultan Hava Bazasında məhv edilmiş ABŞ Hərbi Hava Qüvvələrinin E-3G Sentry AWACS-larının peyk görüntülərini yayımlayıb. "Zədələnməyib. Tamamilə məhv edilib", - Clash Report görüntülərə şərh verib.
Daha əvvəl The Wall Street Journal ABŞ və Ərəb rəsmilərinə istinadən İran raketi və pilotsuz uçuş aparatının Səudiyyə Ərəbistanındakı ABŞ hava bazasına zərbə endirdiyini, bunun nəticəsində əsas Amerika kəşfiyyat təyyarəsinə zərər verdiyini və hərbçilərin yaralandığını bildirmişdi.
Zədələnən təyyarələr arasında raketləri, dronları və təyyarələri uzun məsafələrdə izləmək və real vaxt rejimində döyüş meydanı məlumatlılığını təmin etmək üçün istifadə edilən hava xəbərdarlıq və idarəetmə sistemi olan E-3 Sentry də var idi. Təyyarə hava əməliyyatlarının əlaqələndirilməsində və gələn təhdidlərə cavab verməyə rəhbərlik etməkdə mərkəzi rol oynayır.
Çin və Rusiyanın dəstəyi olmadan bu zərbələrin peyk görüntülərini İran necə əldə edə bilər?
Beynəlxalq Münasibətlər və Diplomatiya Araşdırmaları Mərkəzinin rəhbəri, politoloq Samir Hümbətov baki-xeber.com-a bildirdi ki, İrana bütün bu bilgiləri Rusiya və Çin ötürür. “Bir aydan artıq davam edən bu müharibədə İrana kəşfiyyat məlumatlarını, xüsusən də peyk görüntülərini, kosmik informasiyaları ötürən Rusiya və Çindir. Yəni İranın elə texnologiyaları yoxdur ki, bu məlumatları əldə etsinlər. İran rəsmiləri özləri də bu məsələdə Rusiya və Çinin dəstəyinin böyük olduğunu gizlətmirlər. Bu gün də həmin iki dövlət İrana dəstək göstərir”.
S.Hümbətovun fikrincə, istər İsrail, istərsə də ABŞ-la bağlı kəşfiyyat məlumatlar birbaşa Rusiya və Çin tərəfindən İrana verilir. “Burada məqsəd İranın mövcud rejimini ayaqda saxlamaqdır. Təbii ki, bu da Rusiyanın və Çinin maraqlarına xidmət etdiyi üçün bu addımı atırlar. Amma bunu nə qədər davam etdirə biləcəkləri gedən siyasi proseslərdən və atılacaq addımlardan aslıdır”-deyə S.Hümbətov bildirdi.
İradə SARIYEVA
