ABŞ və İsrailin İrana qarşı hücumları başlayandan bəri Yaxın Şərqdə gərginlik səngimir. Hücumlara cavab olaraq İran qonşu ölkələrdəki ABŞ bazalarını və enerji ehtiyatlarını hədəfə alır. Bu hücumlar Körfəz ölkələrinin də İrana qarşı müharibəyə qoşulması ehtimalını artırır.
ABŞ-ın Fars körfəzindəki müttəfiqlərinin hücumlara qoşulmağa çox yaxın olduğunu bildirən "Wall Street Journal" qəzeti məsələ ilə tanış olan mənbələrə istinadən yazır ki, Körfəz ölkələri ABŞ-ın İrana qarşı hava hücumlarını dəstəkləyir, lakin hələlik birbaşa hərbi müdaxilə nöqtəsinə çatmayıblar.
Mənbələr Səudiyyə Ərəbistanının ABŞ qüvvələrinə Kral Fəhd hava bazasından istifadə etməyə icazə verdiyini bildirib. Bu qərar Ər-Riyadın hücumlar başlamazdan əvvəl verdiyi açıqlamalarla ziddiyyət təşkil edir. Həmin açıqlamalarda o, İrana qarşı hücumlar üçün öz obyektlərindən və ya hava məkanından istifadəyə icazə verməyəcəyini bildirmişdi.
Məsələyə yaxın mənbələr, Səudiyyə Ərəbistanının vəliəhd şahzadəsi Məhəmməd bin Salmanın müharibəyə qoşulmaq qərarına çox yaxın olduğu və hətta krallığın müharibəyə qoşulmaasının " zaman məsələsi" olduğunu bildiriblər.
Bu arada, Birləşmiş Ərəb Əmirliklərinin (BƏƏ) öz ordusunu münaqişəyə göndərib-göndərməmək barədə müzakirələr apardığı bildirilir. Dubaydakı İran Xəstəxanası və İran Klubunun fəaliyyətini dayandırdığı və rabitə kanallarının tamamilə kəsildiyi iddia edilir. Bu addımların İranla əlaqəli müəyyən qurumların fəaliyyətləri ilə bağlı təhlükəsizlik narahatlıqları səbəbindən atıldığı irəli sürülür.
Ərəb rəsmiləri, xüsusən də Səudiyyə Ərəbistanı və Birləşmiş Ərəb Əmirlikləri liderlərinin, İranın hərbi imkanlarını zəiflətmək üçün Trampa təzyiq göstərdiyini iddia edirlər. ABŞ ordusu Körfəz ölkələrinin hücumlara kömək edib-etmədiyi barədə şərh verməkdən imtina edib və bu barədə açıqlamaların müvafiq ölkələr tərəfindən veriləcəyini bildirilib.
Tahir TAĞIYEV
