Artıq altı ildir ki, Novruz tonqalları azad Qarabağımızda və Şərqi Zəngəzurumuzda alovlandırılır. Dövlət başçısı İlham Əliyevin və birinci xanım Mehriban Əliyevanın 16 noyabr 2020-ci il tarixində Füzuli və Cəbrayıl rayonları və şəhərlərinə səfərləri ilə başlanan bərpa-quruculuq işlərinin miqyası bu gün sakinlərinə qovuşan ünvanların sayında, həmçinin Böyük Qayıdış Proqramının birinci mərhələsi üçün nəzərdə tutulan hədəflərə yüksək səviyyədə nail olunmasında özünün aydın ifadəsini tapır. Təkcə cari ilin ötən dövründə keçmiş məcburi köçkünlərin bu torpaqlara mərhələ-mərhələ qayıdışı ilə bərabər, yeni ünvanlar - Xankəndi və Xocavənd şəhərləri də sakinlərinə qovuşdu. Ümumilikdə, bu gün 9 şəhər, onlarla kənd bu sevinci yaşayır. Son altı ildə dövlət başçısı İlham Əliyev və birinci xanım Mehriban Əliyeva Novruz tonqalını azad edilmiş ərazilərimizdə alovlandırırlar.
Bu il Novruz tonqalının ünvanı Xocavənd rayonunun Xanoba kəndi oldu. Prezident İlham Əliyev və birinci xanım Mehriban Əliyeva martın 18-də Xocavənd rayonunun Xanoba kəndində fərdi evlərin və infrastrukturun bərpası sahəsində görülən işlərlə tanış oldular, bu kəndə qayıdan sakinlərlə görüşdülər və onlarla birlikdə Novruz tonqalını alovlandırdılar. 2021-ci ildə Şuşada, 2022-ci ildə Suqovuşanda, 2023-cü ildə Talış kəndində, 2024-cü ildə Xankəndi şəhərində, 2025-ci ildə isə Ağdərə rayonunun Həsənriz kəndində Novruz tonqalını yandıran Prezident İlham Əliyev bu məkanlardan bugünümüzə və gələcəyimizə hədəflənən çağırışları səsləndirdi. Bu gün harada yaşamasından asılı olmayaraq hər bir azərbaycanlı tarixi Zəfərimizdən, ərazi bütövlüyümüzün və suverenliyimizin tam bərpa edilməsindən, bu qələbələrin yaratdığı reallıqlar əsasında işğaldan azad edilmiş ərazilərimizdə aparılan genişmiqyaslı bərpa-quruculuq işlərindən, soydaşlarımızın Böyük Qayıdışından qürur hissi keçirir. Birlik, həmrəylik bayramı olan Novruzu doğma yurd-yuvalarında qeyd edən soydaşlarımız ikiqat sevinc yaşayırlar. Dövlət başçısı İlham Əliyevin və birinci xanım Mehriban Əliyevanın Xocavənd rayonunun Xanoba kəndinin sakinləri ilə görüşündə də Prezidentimiz bu məqamları xüsusi vurğuladı ki, həm Ramazan, həm Novruz bayramlarını burada - doğma Qarabağ diyarında qeyd edəcəksiniz. Bu, böyük xoşbəxtlikdir.
Bu fikirləri Milli Məclisin deputatı Vüqar Rəhimzadə KİV-ə açıqlamasında bildirib.
Milli Məclisin deputatı qeyd edib ki, dövlət başçısı İlham Əliyev doğma yurd-yuvalarına qayıdan sakinlərlə görüşündə hər zaman 30 illik işğal, 44 günlük İkinci Qarabağ, bir günlük antiterror tədbirlərinin həyata keçirildiyi, həmçinin postmünaqişə dövrünün reallıqlarından geniş bəhs edir, diqqəti azad edilmiş torpaqlarımızda geniş miqyas alan bərpa-quruculuq işlərinə yönəldir. Xanoba kənd sakinləri ilə görüşündə “Doğrudan da böyük xoşbəxtlikdir. Artıq iki ildir ki, bu diyar işğalçılardan azad olunub, Xanoba kəndi 2023-cü ilin sentyabr ayında işğaldan azad edilmişdir və bundan sonra artıq bərpa işləri başlanmışdır, evlər yenidən tikildi-quruldu, bütün şərait yaradıldı. Yəni bu şanlı Zəfərimiz artıq neçə ildir bizim qürur mənbəyimizdir. Mən altıncı ildir ki, Novruz bayramını Qarabağda qeyd edirəm. Birinci dəfə 2021-ci ildə, ondan sonra da bütün illər boyu Novruz ərəfəsində Qarabağdayam və Novruz tonqalını da Qarabağda birlikdə qalayırıq. Bu, böyük xoşbəxtlikdir” söyləyərək onu da əlavə etdi ki, biz öz milli qürurumuzu, ədaləti, ərazi bütövlüyümüzü bərpa etdik, düşməni torpaqlarımızdan qovduq. Silahlı Qüvvələrimiz həm 2020-ci ildə, həm 2023-cü ildə böyük qəhrəmanlıq göstərmişdir. Bunun nəticəsində bu gün bu torpaqlardayıq və bu torpaqların əsl sahibləriyik. Çünki Ermənistan buranı viran qoymuşdu. Bütün kənd, qəsəbə, şəhər, hamısını dağıtmışdı. Burada bir neçə daxma tipli ev qalmışdı, amma indi baxın. Ağdam, Füzuli, Zəngilan, Cəbrayıl, Qubadlı nə gündə idi, yerlə-yeksan etmişdilər. Xaricdən gələn erməniləri Laçında, Kəlbəcərdə qanunsuz məskunlaşdırmışdılar, ora da bərbad vəziyyətdə idi. Hamısını biz yenidən qururuq. Cəmi 5-6 il ərzində Qarabağda və Şərqi Zəngəzurda 80 mindən çox insan yaşayır, çalışır, təhsil alır. Demək olar ki, hər ay, bəlkə də hər həftə keçmiş köçkünlər Böyük Qayıdış Proqramı çərçivəsində öz doğma diyarlarına qayıdırlar.
Qeyd edək ki, hədəf Böyük Qayıdış Proqramının birinci mərhələsinin başa çatacağı cari ilin sonunadək 140 min soydaşımızın bu torpaqlara qayıdışını təmin etməkdir. Bu günün statistikası hədəfə yüksək səviyyədə nail olacağımıza əsas verir. O da məlumdur ki, qeyd olunan dövr üçün səkkiz şəhərin sakinlərinə qovuşması planlaşdırılmışdır ki, hazırda bu rəqəm 9-dur. Ölkəmizin iqtisadi və maliyyə imkanları, həmçinin torpaqlarımıza tezliklə qayıdış sevincimiz bərpa-quruculuq işlərinin sürətini daha da artırır. Ümumilikdə azad edilən ərazilərin bərpası, milli iqtisadiyyata sürətli inteqrasiyası, dayanıqlı inkişafın təmin olunması, orada ən müasir infrastrukturun qurulması, mədəni-tarixi abidələrin bərpası və layiqli yaşayış şəraitinin yaradılması istiqamətində genişmiqyaslı tədbirlər həyata keçirilməsi hazırkı dövrün əsas hədəflərindəndir. Bu çərçivədə icra olunan layihələr həmin ərazilərin qısa müddət ərzində sülh və əməkdaşlıq bölgəsinə çevrilməsində və iqtisadi inkişafında mühüm rol oynayır. Bu gün Laçın, Şuşa, Xankəndi, Ağdam, Zəngilan və digər azad edilmiş ərazilərimiz beynəlxalq tədbirlər üçün ideal məkandır. Bu torpaqlarımız dünyaya Azərbaycanın təkmil şəhərsalma təcrübəsini təqdim edirlər. Ağdamda, Zəngilanda və Xankəndidə keçirilən Azərbaycan Milli Şəhərsalma forumları Ümumdünya Şəhərsalma Forumunun 13-cü sessiyasına gedən yolun başlanğıcı kimi dəyərləndirilir.
Vüqar Rəhimzadə vurğulayıb ki, azad edilmiş ərazilərimizdə təkmil idarəçilik sisteminin yaradılması da bərpa-quruculuq işlərində əhəmiyyətli rol oynayır. Belə ki, bu torpaqların dirçəlişi istiqamətində quruculuq, bərpa və yenidənqurma işlərinin sürətləndirilməsi, bu hədəfə nail olunmasında dövlət orqanlarının, qurumlarının və digər təşkilatların əlaqələndirilmiş fəaliyyətinin gücləndirilməsi mühüm rol oynayır. Habelə idarəetmədə çevikliyin və səmərəliliyin artırılması məqsədilə Prezident İlham Əliyevin "İşğaldan azad edilmiş ərazilərdə Azərbaycan Respublikası Prezidentinin xüsusi nümayəndələri haqqında" Fərmanına uyğun olaraq bu ərazilərdə Prezidentin xüsusi nümayəndəlikləri təsis edilib. Prezidentin xüsusi nümayəndəlikləri görülən işlər barədə ətraflı məlumat verirlər. Dövlət başçısı İlham Əliyev və birinci xanım Mehriban Əliyeva Xocavənd rayonunun Xanoba kəndində fərdi evlərin və infrastrukturun bərpası sahəsində görülən işlərlə tanış olarkən məlumat üçün bildirildi ki, Xanoba kəndi Xocavənd rayonunun eyniadlı inzibati ərazi dairəsində, rayon mərkəzindən 15 kilometr cənub-qərbdə yerləşir. Bura Qarabağ xanlarına məxsus olmuş yaşayış məntəqəsidir. İşğaldan əvvəl kənddə orta məktəb, klub, kitabxana, tibb məntəqəsi və rabitə şöbəsi fəaliyyət göstərib. Kənd Azərbaycan Silahlı Qüvvələrinin 2023-cü ildə həyata keçirdiyi antiterror əməliyyatı nəticəsində işğaldan azad edilib. Kənddə mövcud fərdi evlərin sayı 153-dür. Onlardan da 21-i yararsız, 132-si isə qismən yararlıdır. Qismən yararlı evlərdən 26-sı artıq istismara hazırdır. Bu ilin sonunadək daha 106 ev hazır olacaq. Bir neçə gün əvvəl ilkin mərhələdə kəndə 25 ailə - 114 nəfər qayıdıb. Oktyabradək daha 107 ailənin köçürülməsi planlaşdırılır. Ümumilikdə ötən ilin oktyabrından Xocavənd rayonunun 6 yaşayış məntəqəsinə 1818 nəfər - 441 ailə qayıdıb.
Millət vəkili bildirib ki, azad edilmiş ərazilərimizdə aparılan bərpa-quruculuq işlərində əsas diqqət göstərilən məsələlərdən biri soydaşlarımızın məşğulluğunun təmin edilməsidir. Tarixi Zəfərimizdən sonra rayonların iqtisadi bölgüsünün yenidən aparılması, həmçinin “Azərbaycan 2030: sosial-iqtisadi inkişafa dair Milli Prioritetlər”in təsdiqlənməsi hər bir bölgənin malik olduğu potensialdan Azərbaycanın dayanıqlı inkişafının təmin edilməsi, əhalinin məşğulluq probleminin həlli üçün səmərəli istifadəyə geniş imkanlar açır. Bu torpaqlarda ənənəvi kənd təsərrüfatı sahələrinin inkişafı üçün geniş imkanlar mövcuddur. Dövlət başçısı İlham Əliyev Xanoba kənd sakinləri ilə görüşündə bir daha bildirdi ki, artıq sülh, əmin-amanlıq, təhlükəsizlik şəraitində xoşbəxt yaşayın. İndi qurub-yaratmaq dövrüdür. Ona görə kənddə də bütün şərait var, məşğulluqla bağlı da imkanlar var. Özəl əkin sahələri, örüş sahələri, su var. Kurort havası var, kurortda yaşayırsınız. Layiqsiniz. İndi havanın fərqini görürsünüz. Hava, su insanın sağlamlığı üçün əsas şərtlərdən biridir. İndi biz bu doğma Qarabağ torpağında əbədi yaşayacağıq. Biz gəlməli idik və gəldik, qalib xalq kimi qayıtdıq. Dövlət başçısı İlham Əliyevin sosial media hesablarında Novruz bayramı ilə bağlı video paylaşımında da bu fikirlər qeyd edilir ki, mən altıncı ildir ki, Novruz bayramını Qarabağda qeyd edirəm. Birinci dəfə 2021-ci ildə, ondan sonra da bütün illər boyu Novruz ərəfəsində Qarabağdayam və Novruz tonqalını da Qarabağda birlikdə qalayırıq. Bu, böyük xoşbəxtlikdir.
