Təbriz Musayev: “Xüsusən son illər Ukrayna istehsalı olan “Flaminqo” raketləri Rusiyanın kabusuna çevrilib”
Rusiya Təhlükəsizlik Şurasının katibi Sergey Şoyqu Ukrayna Silahlı Qüvvələrinin 2025-ci ildə Rusiyanın infrastrukturuna hücumları əhəmiyyətli dərəcədə artırdığını bildirib. Onun sözlərinə görə, bu cür zərbələrin sayı təxminən dörd dəfə artıb.
Şoyqu bildirib ki, son bir ildə müxtəlif obyektlərə 23 mindən çox hava hücumu həyata keçirilib. Kifayət qədər böyük rəqəmlərdir. Şoyqu qeyd edib ki, vəziyyət, xüsusən də vacib infrastrukturun qorunması sahəsində təhlükəsizlik tədbirlərinin gücləndirilməsini tələb edir. Şoyqunun digər etirafına görə, Ukraynanın dron hücumlarından Rusiyanın heç bir bölgəsi, hətta uzaq Ural da sığortalanmayıb.
Burada diqqəti çəkən məqam odur ki, Ukrayna ilə müharibə dövründə ilk dəfə Rusiyanın yüksək rütbəli rəsmilərindən birinin dilindən həyəcan təbili çalınır. Açıq etiraf edirlər ki, Ukraynanın Rusiyanın mühüm obyektlərinə zərbələri genişlənir və bunu tam önləməkdə acizdirlər.
Sözügedən məsələni baki-xeber.com-a şərh edən İrəvan Azadlıq Təşkilatının sədri Təbriz Musayev hesab edir ki, Şoyqunun bu etirafı ciddi məqamlardan xəbər verir: “Məsələ ondadır ki, müharibənin getdiyi 4 il ərzində Ukrayna böyük döyüş təcrübəsi toplayıb. Sənaye dövləti olduğu üçün Ukrayna bir sıra silahları istehsal etmək imkanına malikdir. Ukrayna həm uzaq məsafələrə uça bilən raketlər, həm də pilotsuz uçuş aparatları istehsal edə bilir. Xüsusən son illər Ukrayna istehsalı olan “Flaminqo” raketləri Rusiyanın kabusuna çevrilib. Ukrayna həmin raketlər hesabına Rusiyanın minlərlə kilometr dərinliklərindəki hədəfləri vurur. Ukraynanın Rusiyanın neft emalı zavodlarına endirdiyi PUA zərbələri bu ölkədə ciddi problemlərə səbəb olub. Bu səbəbdən Rusiya iki ildən çoxdur yanacaq ixracını dayandırıb. Söhbət benzin və dizel yanacağından gedir. Rusiya ərazisinə görə dünyada birinci dövlətdir. Rusiyanın imkanı yoxdur ki, 17 milyon kvadrat kilometr ərazinin hava sahəsini qoruya bilsin. Digər tərəfdən, Rusiya hava hücumundan müdafiə vasitələrinin böyük hissəsini Moskva və Sankt-Peterburq şəhərlərinin qorunmasına yönəldib. Ukraynanın zərbələri fonunda, Rusiyanın neft emalı zavodları iflic ola bilər. Çünki Ukrayna zərbə PUA-larının istehsalını sürətlə artırır. Bu işdə Avropa İttifaqı ölkələri Ukraynaya ciddi texniki və maliyyə yardımı edirlər. Bu, o deməkdir ki, bir müddət sonra Ukrayna daha çox PUA ilə Rusiyaya hücum edəcək. O zaman Rusiya daha ciddi çətinliklərlə üzləşəcək və HHM sistemləri bunun qarşısını ala bilməyəcək. Şoyqu bunun fərqində olduğu üçün belə bir açıqlama ilə çıxış edib”.
Vidadi ORDAHALLI
