Bəhruz Quliyev: “Bu, bir daha sübut edir ki, AŞPA üçün insan hüquqları anlayışı selektiv xarakter daşıyır”
Avropa Şurası Parlament Assambleyası (AŞPA) növbəti dəfə Azərbaycana qarşı qərəzli qətnamə qəbul edərək 23 “erməni məhbus”u azad etməyə çağırıb.
AŞPA-nın ölkəmizə qarşı qərəzli qətnaməsi təəccüb doğurmur. Ən azından ona görə ki, dəfələrlə belə vəziyyətlə üzləşdiyimiz üçün AŞPA qətnamələri bizim üçün adiləşib. Bu dəfə təəccüb doğuran məqam odur ki, bu yaxınlarda qarşılıqlı razılaşmaya əsasən Azərbaycan tərəfi humanizm prinsiplərindən çıxış edərək 4 erməni məhbusu Ermənistana təhvil verib. Bu halda onların sayı 23 nəfər deyil, azalmalı idi. Yəni bu hesabla AŞPA “erməni məhbus”ların sayını 19 göstərməli idi. Ancaq qərəz AŞPA-nın gözünü o qədər örtüb ki, bu faktı belə görmürlər.
Sözügedən məsələ ilə bağlı fikirlərini baki-xeber.com-la bölüşən “SƏS” qəzetinin baş redaktoru, politoloq Bəhruz Quliyev hesab edir ki, AŞPA-nın növbəti dəfə Azərbaycana qarşı qərəzli qətnamə qəbul edərək guya 23 “erməni məhbus”un azad edilməsinə çağırması təəccüb doğurmur: “Çünki bu qurumun Azərbaycanla bağlı mövqeyi artıq uzun illərdir hüquqa deyil, siyasi sifarişlərə və ikili standartlara əsaslanır. Əsl təəccüb doğuran isə başqa bir məqamdır. Yaxın vaxtlarda qarşılıqlı razılaşma əsasında Azərbaycan dövləti humanizm prinsiplərinə sadiqliyini nümayiş etdirərək 4 erməni məhbusu Ermənistana təhvil verib. Məntiq və elementar ədalət tələb edirdi ki, bu addım AŞPA sənədlərində də öz əksini tapsın və iddia edilən “məhbus”ların sayı azaldılsın. Ancaq görünür, qərəz AŞPA-nın gözünü o qədər örtüb ki, real faktlar belə onların diqqətindən kənarda qalır və ya da bilərəkdən görməzliyə vurulur. Bu yanaşma bir daha sübut edir ki, AŞPA üçün insan hüquqları anlayışı selektiv xarakter daşıyır. Azərbaycan humanist addım atanda bu, ya görməzdən gəlinir, ya da siyasi manipulyasiya predmetinə çevrilir. Halbuki eyni qurum onilliklər ərzində Ermənistanın Azərbaycan torpaqlarını işğalı dövründə törətdiyi ağır insan hüquqları pozuntularına, etnik təmizləməyə və hərbi cinayətlərə qarşı susqunluq nümayiş etdirib. Hesab edirəm ki, Avropanın bu ikili standartları nə yeni haldır, nə də gözlənilməz. Amma hər belə qətnamə AŞPA-nın öz nüfuzuna vurduğu növbəti zərbədir. Azərbaycan beynəlxalq hüquqa, milli qanunvericiliyə və humanizm prinsiplərinə əsaslanaraq qərarlarını verir və bundan sonra da verəcək. Siyasi qərəzlə yazılmış qətnamələr isə nə tarixi həqiqətləri dəyişə bilər, nə də Azərbaycanın suveren hüquqlarına kölgə sala bilər. Azərbaycan dövləti və cəmiyyəti artıq yaxşı bilir ki, dünyada ədalət anlayışı yoxdur, ədalət tribunalardan deyil, faktlardan və prinsipial mövqedən keçir. AŞPA isə nə vaxtsa bu həqiqətlə barışmalı olacaq”.
Vidadi ORDAHALLI
