ABŞ 24 saat ərzində İrana zərbə endirə bilər. “Reuters”ə danışan bir Qərb hərbi rəsmisi bildirib ki, bütün əlamətlər ABŞ-ın İrana hücumunun yaxında olduğunu göstərir. İki Avropa rəsmisinin sözlərinə görə, ABŞ 24 saat ərzində İrana zərbə endirə bilər.
İran hökuməti bir tərəfdən İslam Respublikasının indiyə qədər üzləşdiyi ən böyük daxili iğtişaşları yatırmağa çalışır, digər tərəfən, ABŞ prezidenti Trampın müdaxilə etmək təhdidlərinə qarşı çıxmağa çalışır.
Bir ABŞ rəsmisi, yüksək vəzifəli bir İran rəsmisinin, Tehranın qonşu ölkələri Vaşinqtonun hücum edəcəyi təqdirdə Amerika bazalarına zərbə endirəcəyi barədə xəbərdar etməsindən sonra ABŞ-ın Yaxın Şərqdəki bazalardan bəzi personalını geri çəkdiyini söyləyib. ABŞ-dan sonra Britaniya da Qətərdəki Əl-Udeid bazasından qoşunlarını geri çəkməyə başlayıb.
Bir Qərb hərbi rəsmisi “Reuters”ə bildirib ki, bütün əlamətlər ABŞ hücumunun qaçılmaz olduğunu göstərir: “Lakin bu administrasiya hər kəsi ayıq saxlamaq üçün bu şəkildə davranır və bu gözlənilməzlik strategiyanın bir hissəsidir".
İki Avropa rəsmisi ABŞ-ın hərbi müdaxiləsinin növbəti 24 saat ərzində baş verə biləcəyini bildirib.
Bu arada, ABŞ mediası İrana hərbi müdaxilənin yaxın günlərdə başlaya biləcəyini yazır. Qeyd edilir ki, Pentaqon tərəfindən İrana müdaxilə ilə bağlı bütün variantlar Trampa təqdim edilib. Variantlar arasında İranın nüvə obyektlərinə və raket bazalarına zərbə endirilməsi də yer alır. O da vurğulanır ki, ABŞ İrana hərbi müdaxilə edərkən ciddi cavab zərbələri ilə qarşılaşa bilər.
Tahir TAĞIYEV
