Arzuxan Əlizadə: “Bu, o demək deyil ki, Birləşmiş Ştatlar hərbi müdaxilə variantına tezliklə əl atacaq”
ABŞ prezidenti Donald Tramp İran rəsmiləri ilə bütün görüşləri ləğv edib. ABŞ Prezidenti vurğulayıb ki, etirazçıların mənasız şəkildə öldürülməsi dayanmayana qədər İran rəsmiləri ilə bütün görüşləri ləğv edib.
TruthSocial sosial şəbəkəsində paylaşım edən Tramp iranlıları etirazları davam etdirib, dövlət institutlarını ələ keçirməyə çağırıb: “Qatillərin və istismarçıların adlarını yadda saxlayın. Onlar çox böyük hesab ödəyəcəklər. Mən etirazçıların mənasız qətlləri bitməyənə qədər iranlı məmurlarla bütün görüşləri ləğv etmişəm. Yardım artıq yoldadır”.
Maraqlıdır, bundan sonra nə gözlənilir? İran geri addım atacaqmı?
Sözügedən məsələ ilə bağlı fikirlərini baki-xeber.com-la bölüşən AMİP sədri, millət vəkili Arzuxan Əlizadə hesab edir ki, İran ətrafında gərginlik daha da artacaq: “Ancaq düşünmürəm ki, Tramp yaxın perspektivdə İrana genişmiqyaslı hərbi müdaxilə yolunu tutsun. Bu, həm böyük hərbi xərc tələb edir, həm də müəyyən risklər vəd edir. Belə müdaxilələr İranda cəmiyyəti radikal qüvvələr ətrafında birləşdirə, diqqəti ölkə daxilində olan əsas problemlərdən yayındıra bilər. Ona görə də Tramp İrana qarşı daha çox siyasi və iqtisadi təzyiqlərə üstünlük verəcək. ABŞ-ın əsas məqsədi İranda hakim elita arasında parçalanma yaratmaqdır. Həmçinin, İranı iqtisadi, diplomatik və kiber vasitələrlə zəiflətməkdir. Vaşinqton maksimum çalışacaq ki, ölkədə daxili narazılıqlar kəskin formada artsın, hakimiyyətin manevr imkanları məhdudlaşsın. Daxili narazılıqlar nə qədər çox alovlansa, bu bir o qədər Trampın maraqlarına cavab verir. Hesab edirəm ki, Trampın İranla bütün danışıqları dayandırması o demək deyil ki, Birləşmiş Ştatlar hərbi müdaxilə variantına tezliklə əl atacaq. Bu variantı o qədər də real hesab etmirəm. Hər halda Dövlət Departamenti, Mərkəzi Kəşfiyyat İdarəsi və Pentaqonun hesabatlarında hansı variantın daha məqbul olması öz əksini tapacaq. O üzdən, Tramp nə qədər impulsiv qərarlar verən prezident təsiri bağışlasa da sözügedən qurumların kəşfiyyat məlumatlarını, təhlillərini nəzərə almaq zorundadır. Əks halda proseslər arzuolunmaz ssenari üzrə inkişaf edə bilər”.
Vidadi ORDAHALLI
