Məhərrəm Zülfüqarlı: “SSRİ ona görə qələbəyə nail oldu ki, faşist Almaniyası ədalətsiz müharibə aparırdı”
Rusiyanın Ukraynaya qarşı apardığı genişmiqyaslı işğalın müddəti Böyük Vətən müharibəsinin (1941-1945) davametmə müddəti ilə bərabərləşib. Müharibə artıq 1418 gündür davam edir. Burda diqqət çəkən məqam odur ki, 1941-1945 müharibəsində nəinki SSRİ ərazisi işğaldan azad edildi, həm də Şərqi Avropa alındı, faşizmə son qoyuldu.
Ancaq 2022-ci ilin 24 fevralından indiyə qədər Rusiya qarşısına qoyduğu heç bir məqsədə çata bilməyib. Rusiya nəinki bütün Ukraynanı ələ keçirə bildi, heç bu 4 il ərzində Donbası tamamilə işğal edə bilməyib. Baxmayaraq ki, buna görə nə qədər böyük həcmdə resurs sərf edib, böyük itkilər verib.
Sözügedən məsələ ilə bağlı fikirlərini baki-xeber.com-la bölüşən tarix elmləri doktoru, professor Məhərrəm Zülfüqarlı hesab edir ki, ədalətli və ədalətsiz müharibə təsnifatı var: “Ədalətli müharibə vətənin müdafiəsi uğrunda gedən müharibədir. Ədalətsiz isə işğalçı müharibədir. Böyük Vətən müharibəsi ilə indiki Ukrayna müharibəsi arasında çoxlu fərqlər var. Birincısi, 1941-1945-ci il müharibəsinə qədər 1939-cu uldə Almaniya arasında Molotov və Ribentrov müqaviləsi var idi. Bu müqaviləyə əsasən SSRİ Almaniya ilə Polşa və Pribaltikanın bölünməsini razılaşdırmışdı. Yəni müttəfiq kimi çıxış edirdilər. Ancaq Almaniya 22 iyun 1941-ci ildə xəbərdarlıq etmədən SSRİ-yə hücum etməsi bu müharibənin mahiyyətini dəyişdi. Yəni SSRİ bunu Böyük Vətən müharibəsi kimi təqdim etdi. O zaman SSRİ 1418 gün ərzində ona görə qələbəyə nail oldu ki, faşist Almaniyası ədalətsiz işğalçı müharibə aparırdı. Üstəlik, faşist Almaniyasına qarşı anti-faşist koalisiyası yaranmışdı. Bura ABŞ, İngiltərə və digər ölkələr daxil idi. ABŞ-dan edilən iqtisadi-hərbi yardımın da böyük rolu olub. Hazırda Rusiya ona görə məqsədlərinə çata bilmir ki, bu, işğalçı və ədalətsiz müharibədir. Ukrayna öz ərazisini qoruyur. Ədalət bu gün Ukrayna tərəfindədir. Lakin Rusiyanın nüvə silahına malik olması bir sıra dövlətləri ehtiyatlı olmağa məcbur edir. Bu səbəbdən Ukraynaya istənilən dəstəyi verə bilmirlər. Yoxsa Ukraynaya dəstək böyük olardı. Ancaq o da var ki, Rusiya tükənir, müttəfiqlərini də itirir. O baxımdan Ukrayna uğur əldə edəcək”.
Vidadi ORDAHALLI
