Təbriz Musayev: “Parlament seçkilərinə qədər bu kimi qarşıdurmalar artacaq”
Kremlin ən tanınmış təbliğatçılarından biri olan Vladimir Solovyov Rusiyanın Ermənistana qarşı “xüsusi hərbi əməliyyat” (Rusiyanın Ukraynaya qarşı tammiqyaslı işğalını adlandırmaq üçün istifadə etdiyi termin) başlatmaqda haqlı ola biləcəyini irəli sürüb.
Buna görə Rusiya səfiri Sergey Kopırkin Ermənistan Xarici İşlər Nazirliyinə çağırılıb. Səfirə dövlət telekanalının efirində verilən bəyanatlardan dərin hiddət ifadə edən etiraz notası təqdim olunub. Həmçinin, Ermənistan parlamentinin vitse-spikeri Ruben Rubinyan Solovyovun açıqlamalarına sərt reaksiya verərək onu “it” adlandırıb. Rubinyan qeyd edib ki, “it hürür, karvan gedir”.
Görünən odur ki, Rusiya-Ermənistan münasibətləri gərginləşir.
Sözügedən məsələni bakı-xeber.com-a şərh edən İrəvan Azadlıq Təşkilatının sədri Təbriz Musayev hesab edir ki, Solovyovun Paşinyan hakimiyyətini “xüsusi hərbi əməliyyat”la təhdid etməsi əsla təsadüfü deyil: “Bununla Kreml mesaj verir ki, Ermənistanın Qərblə yaxınlaşmasına sona qədər dözməyəcək. İndiki dövrdə bu, daha çox iyunda keçiriləcək parlament seçkilərinə hesablanıb. Rusiya Ukraynada uğur əldə etsəydi, hansısa formada bunu Ermənistanda təkrarlayardı. Çünki bu, həmin Rusiyadır ki, 1999-cu ilin 27 oktyabrında Ermənistan parlamentini külləbaran etdirdi. Qətliamı törədən ermənilər olsa da, bunun arxasında bilavasitə Rusiya kəşfiyyatı dayanırdı. Məhz o hadisədən sonra Rusiyanın marionetkası olan Robert Köçəryan və Serj Sarkisyan tandeminin mövqeləri Ermənistanda gücləndi. 20 il hakimiyyət onlarda qaldı. Rusiyanın Ermənistanda hərbi bazaları, siyasi təsir agentləri olsa da bu kimi ssenariləri indi təkrarlamaq çətin məsələdir. Ancaq bu, o demək deyil ki, Rusiya sakit oturacaq. Ermənistanın Rusiya ilə münasibətləri pisləşdikcə, Solovyov hökuməti, Paşinyanı tənqid edib və təhqir edib. Bu da 2024-cü ildə onun televiziya proqramının Ermənistanda bloklanması ilə nəticələnib. 2025-ci ildə Solovyov Ermənistan hökumətini “korrupsiyalaşmış, iyrənc, dəyərsiz” adlandırıb və onu Ermənistan tarixini satmaqda ittiham edib. Fikrimcə, Ermənistanda iyunda keçiriləcək parlament seçkilərinə qədər bu kimi qarşıdurmalar artacaq”.
Vidadi ORDAHALLI
