İlyas Hüseynov: “Qarlı, şaxtalı, boranlı havaya rəğmən monitorinq həyata keçirməsi və Azərbaycan sərhəddləri boyunca nəzarəti icra etməsi böyük suallar doğurur”
Avropa İttifaqının (Aİ) Ermənistandakı missiyası Azərbaycan-Ermənistan sərhəddində yenidən fəallaşıb. Erməni mediasının yazdığına görə, Aİ-nin Monitorinq Missiyası regionda patrul xidməti davam edir. Guya bununla da sülh və sabitlik qorunur.
“Çətin hava şəraitinə baxmayaraq, Ermənistandakı Aİ Missiyasının müşahidəçiləri 24/7 patrul xidmətini davam etdirərək bölgədə sülh və sabitliyə töhfə verirlər”. Bu barədə Aİ-nin Ermənistandakı missiyasının X-in mikrobloqundakı paylaşımda qeyd edilib.
Azərbaycanla sərhəddə bir ildən çoxdur ki, sakitlik olsa da, Avropa İttifaqının missiyası niyə belə inadla sərhədlərdə işləyir?
Politoloq İlyas Hüseynov baki-xeber.com-a bildirdi ki, Azərbaycan və Ermənistan arasında sülh istiqamətində proseslər durmadan inkişaf edir. İ.Hüseynov vurğuladı ki, bu yaxınlarda artıq ikinci partiya üzrə neft məhsulları Azərbaycandan Gürcüstana, oradan isə Ermənistana yola salınıb. İ.Hüseynov xatırlatdı ki, bundan əvvəl taxıl tədarükü ilə bağlı müvafiq addımlar atılıb və Azərbaycan da burada vasitəçi rolunda çıxış edib. “Eyni zamanda vətəndaş cəmiyyəti nümayəndələrinin qarşılıqlı olaraq İrəvanda və Bakıda görüşləri keçirildi. Hətta bu gün vətəndaş cəmiyyəti nümayəndələrinin birgə toplantısı keçirildi, mühüm müzakirələr aparıldı. Məhz suallar da Ermənistanla vətəndaş cəmiyyəti kontekstində keçirilən görüşlərdə iştirak edən şəxslərə ünvanlandı. Belə pozitiv bir dinamikanın müşahidə olunduğu bir dönəmdə Aİ Ermənistanda yerləşən mülkü missiyasının qarlı, şaxtalı, boranlı havaya rəğmən monitorinq həyata keçirməsi və Azərbaycan sərhəddləri boyunca nəzarəti icra etməsi böyük suallar doğurur, böyük narahatlığa səbəb olur. Zatən Aİ-nin mülkü missiyası da çox yaxşı anlayır ki, bu ilin iyununda Ermənistanda keçiriləcək seçkilərdən sonra konstitusiya dəyişikliyi olacaq və ardınca Azərbaycan və Ermənistan arasında sülh müqaviləsinin imzalanması gözlənilir. Sülh müqaviləsinə görə Azərbaycan və Ermənistan arasında sərhəd boyunca üçüncü qüvvələrin iştirakı yolverilməzdir. Dolayısı ilə Aİ-nın mülkü missiyası Ermənistan ərazisini tərk etməlidir. Belə bir fikir var ki, mülkü missiya sərhəd bölgəsindən çəkiləcək və Ermənistanın dərinliklərinə doğru hərəkət edəcək, o artıq Ermənistanda qalıcı funksiyanı icra etmək niyyətindədir. Düşünürəm ki, bu məsələyə qarşıdakı dövrdə yenidən baxıla bilər”.
İ.Hüseynovun sözlərinə görə, lakin sərhəd zolağı boyunca Aİ-nin və eyni zamanda digər ölkələrin müşahidəçilərinin iştirakının olmaması şərt və tələb kimi irəli sürülüb.
İ.Hüseynov qeyd etdi ki, məhz bu təlaş və narahatlıq Aİ-nin mülkü missiyasını monitorinq icra etmək adı altında informasiya məkanında özləri barədə bu cür müxtəlif xəbərlər dolaşması üçün çalışmağa sövq edir. “Onlar özlərindən söz etdirməyə çalışırlar”-deyə İ.Hüseynov vurğuladı.
İradə SARIYEVA
