Faiq Ələkbərli: “Bu kimi qüvvələr hökumətin bu iki dövlətlə yaxınlaşmasına mane olmaq, normallaşmaya və sülhə gedən yolu kəsmək istəyirlər”
Ermənistandakı bəzi qüvvələr, politoloqlar, iranşünaslar, türkoloqlar Nikol Paşinyan hökumətinin Azərbaycan və Türkiyə ilə münasibətləri normallaşdırma və sülh siyasətinə qarşı çıxır, müxtəlif təxribatçı açıqlamalarla bu məsələyə əngəl olmağa çalışırlar.
Politoloq Stepan Danielyanın normallaşma prosesinə mane olmaq məqsədilə yazdığı məqaləsi də buna sübutdur. Danelyan iddia edir ki, Türkiyədə kilsələr ya dağıdılır, ya da məscidə çevrilir, bu ölkədə xristian irsinə qarşı guya hansısa basqılar var. Türkiyəni İranla müqayisə edən Danielyan yazıb ki, İranda isə xristian mədəniyyətinə və kilsələrinə hörmətlə yanaşılır.
Türkiyədə başqa xalqlara və başqa mədəniyyətlərə guya “nifrət var”. Türkiyəyə və Azərbaycana qarşı nifrətlə silahlanmış Danielyan kimiləri bu uğursuz müqayisəni aparmaqla, əslində özlərinin mahiyyətini açıb ortaya qoyurlar. Unudurlar ki, nə Türkiyədə, nə Azərbaycanda, nə də digər türk dövlətlərində xristian irsinə qarşı mənfi münasibət yoxdur. Azərbaycanda da, Türkiyədə də kifayət qədər xristain irsi nümunələri var və onlara da dövlət qayğısı çox yüksək səviyyədədir. Əksinə, Ermənistanda və İranda türk irsinə qarşı soyqırımlar həyata keçirilib ki, bunu bilməyən yoxdur. İndiki Ermənistanda Azərbaycan irsinin darmadağın edildiyi, yer üzündən silindiyi faktdır. Danielyan bunları yaddan çıxarır və öz adlarını başqalarına qoyur.
“...Hər cür təxribat törədirlər”
AMEA-nın Fəlsəfə və Sosiologiya İnstitutunun şöbə müdiri, fəlsəfə doktoru, siyasi ekspert Faiq Ələkbərli “Bakı-Xəbər”ə bildirdi ki, İran adlanan ölkə ilə müqayisədə guya Türkiyədə xristian irsinə qarşı aqressiyanın olması fikri qəbuledilməzdir: “İstər Osmanlı dönəmində, istərsə də Türkiyə Cumhuriyyəti dövründə heç vaxt kilsə və məscid fərqi qoyulmayıb. Ənənəvi olaraq xristianların ibadət yeri olan kilsələr də, yəhudilərin ibadət yeri olan sinaqoqlar da, müsəlmanların ibadət yeri olan məscidlər də insanların üzünə açıq olub. Heç kəs deyə bilməz ki, Osmanlı və Türkiyə Cumhuriyyəti dönəmində qeyri-müsəlmanların ibadət yerinə hansısa bir zərər yetirilib. Nəsə bir problem olubsa, bu, müharibələrin gedişində, yaxud hansısa təxribatlar nəticəsində baş verib. Amma Osmanlı da, Türkiyə Cumhuriyyəti də məscidlərə hansı qayğını göstəriblərsə kilsələrə və sinaqoqlara da o qayğını göstəriblər. Bu gün də kilsələrə və sinaqoqlara diqqət göstərir, qeyri-müsəlmanlara aid ibadət yerlərinin təmir və bərpa edilməsi, yenilərinin inşa olunması faktlarına da rast gəlirik”.
İranda xristian irsinə diqqətlə yanaşılmasının səbəblərinə də şərh verən F.Ələkbərli qeyd etdi ki, bu, türklərə qarşı panfarsistlərin aqressiv yanaşmasının təzahürüdür. O bildirdi ki, Pəhləvi dövründə də, indiki molla rejimi dönəmində də xristian irsinə qayğı türklüyə, Güney Azərbaycana qarşı istifadə edilib.
Azərbaycanda və Türkiyədə tarixən çoxmədəniyyətlilik, tolerantlıq hökm sürüb, bu gün də belədir.
Danielyanın bu qərəzli və qeyri-reallığı əks etdirən məqaləsində onun türk birliyini hədəfə alması, İranı isə türk birliyinə qarşı qoymaq cəhdləri açıq görsənir. “Mövcud Ermənistan hakimiyyəti türk birliyinə qarşı deyil, çünki yaxşı anlayırlar ki, onların gəlcəyi türk xalqlarının ittifaqının möhkəmlənməsi və güclənməsi ilə bağlıdır. Bunu Ermənistanın daxilində də yaxşı bilirlər və bu baxımdan çalışırlar ki, hansısa formada Türkiyəyə qarşı nifrəti daha da şiddətləndirsinlər. Əslində isə Ermənistan hökuməti Türkiyə və Azərbaycanla yaxınlaşmaqda maraqlıdır. Bu kimi qüvvələr isə hökumətin bu iki dövlətlə yaxınlaşmasına mane olmaq, normallaşmaya və sülhə gedən yolu kəsmək istəyirlər. Ermənistanın Azərbaycanla və Türkiyə ilə yaxınlaşmasına mane olmaq üçün hər cür təxribat törədirlər”-deyə F.Ələkbərli qeyd etdi.
İradə SARIYEVA
