Əli Orucov: "Ermənistanın sülh prosesini gecikdirmısi, Bakıya qarşı nifrət hissində qalması, qorxu və xofdan çıxa bilməməsi bir dövlət kimi onun öz mövcudluğunu sual altına salır"
Avropa Şurası Parlament Assambleyasının (AŞPA) yay sessiyasında çıxışı zamanı Ermənistan parlamentinin "Hayastan" blokundan olan deputatı Armen Gevorqyan deyib ki, İran-İsrail münaqişəsi fonunda Avropa İlham Əliyev rejiminin güclənməsinə təkcə dolayısı ilə deyil, həm də birbaşa töhfə verir.
Gevorkyan, həmçinin, Avropa Siyasi Birliyi sammitinin 2028-ci ildə Bakıda keçirilməsi təklifindən narahatlığını bildirib və qeyd edib ki, bundan Azərbaycan öz "ekspansionist planlarını" qanuniləşdirmək üçün istifadə edə bilər.
Bütün bunlar Ermənistanın yeri geldi-gəlmədi Azərbaycanın əleyhinə fikir səsləndirmək, onun kölgəsini qılınclamaq mərəzindən doğur. Əslində İran-İsrail müharibəsinin Azərbaycana nə dəxli var? Açıq-aşkar erməni deputat Azərbaycanın güclənməsindən narahatlığını dilə gətirir və bu, Ermənistan dövlətinin mövqeyidir. Erməni rəsmiləri Avropanın enerji təhlükəsizliyi arxitekturasında Azərbaycanın artan rolundan, beynəlxalq tədbirlərin Bakıda keçirilməsindən həyəcanlı narahatlıq keçirirlər. Bu o demək deyilmi ki, Ermənistan sülhü deyil, düşmənçiliyi inkişaf etdirmək niyyətindədir?
Baki-xeber.com-un sualını cavablandıran politoloq Əli Orucov bildirdi ki, 44 günlük müharibədə Azərbaycanın möhtəşəm qələbəsi, ardınca bir günlük əməliyyatla separatizm ünsürlərini təmizləyərək ərazi bütövlüyünü və suverenliyini tam bərpa etməsi təkcə Cənubi Qafqazda deyil, ümumilikdə beynəlxalq miqyasda qüvvələr nisbətini kökündən dəyişdi: "Bu qələbələrin verdiyi nəticələr Azərbaycanı söz sahibinə və bölgənin şəriksiz liderinə çevirdi. Bakının uğurlu və dinamik diplomatiyası özünün gələcək təhlükəsizliyini təmin etməklə yanaşı, özü metropoliyaya qarşı mübarizə aparan xalqlara dayaq oldu. Prezident İ.Əliyevin uzaqgörən və məqsədyönlü siyasəti ilə Azərbaycan nəqliyyat, kommunikasiya və enerji qovşağına çevrildi, beynəlxalq siyasətin fəal iştirakçısı oldu. Ermənistanın və havadarlarının böhtan və yalan kampaniyalarına baxmayaraq, Azərbaycan bölgədə dayanıqlı sülhün və əməkdaşlığın əldə olunması istiqamətində inamla addımladı. Azərbaycan Fransanın təsiri altında olan bəzi Qərb institutları ilə müəyyən hallarda təhdid edilsə də təmkinini itirmədi, mümkün qədər qarşılıqlı əlaqələrin möhkəmlədilməsinə çalışdı. Xüsusən də Ukrayna-Rusiya müharibəsi fonunda Qərbin enerji və nəqliyyat şaxələndirilməsində müstəsna rol oynamaqdadır. Bütün bu nailiyyətlər, təbii ki, tarixən azərbaycanlılara, türklərə qarşı nifrət hissində köklənən erməni cəmiyyətini narahat etməyə bilməz. Göründüyü kimi, erməni deputat da həmin nifrətin və kinin təsiri ilə Azərbaycana iftira atır, qızışdırıcı mövqedən çıxış edir. Ermənilər anlamaq istəmirlər ki, Qərbi Azərbaycan reallıqdır, orda yaşamış və tarixi torpaqlarından silah gücü ilə çıxarılmış, repressiya və deportasiyaya uğramış soydaşlarımızın geri qayıtmasına İrəvan əngəl ola bilməyəcək. Digər tərəfdən, Qərbi Azərbaycan əhalisinin geri dönüşü Ermənistan dövləti üçün də müsbət devidendlər gətirir. Regional əlaqələri möhkəmlənir ki, bu da onların təhlükəsizliyinin və inkişafının təmin edilməsinə faydalı tendensiyalar gətirər. Zəngəzur dəhlizi nə qədər tez açılsa, Ermənistan bir o qədər tez beynəlxalq özünütəcriddən çıxa bilər. Ermənistan qəbul etsə də, etməsə də Azərbaycan təhlükəsiz, siyasi sabit və inkişaf etmiş bir ölkə kimi beynəlxalq aləmdə qəbul edilir. O, qlobal müzakirə və tədbirlərin keçirilməsi üçün ən yüksək standartlara cavab verir. Azərbaycana etibar edilir. Qərbin Azərbaycana böyük ehtiyacı var. Mən hesab edirəm ki, bəzi Qərb siyasi dairələrinin ikili standart və ögey münasibətlərinə baxmayaraq, Azərbaycan öz iradəsi və gücü ilə məhz beynəlxalq arenada söz sahibi ola bilib. Ən mötəbər və nüfuzlu beynəlxalq tədbirlərə ev sahibliyi edən Bakı qarşılıqlı maraqları təmin edən əməkdaşlıq üçün açıqdır, hüququn və nizamın bərpasına töhfə vermək təşəbbüslərini davam etdirməkdədir. Ermənistanın sülh prosesini gecikdirmısi, Bakıya qarşı nifrət hissində qalması, qorxu və xofdan çıxa bilməməsi bir dövlət kimi onun öz mövcudluğunu sual altına salır".
Dəniz NƏSİRLİ
