Ermənistan Baş Prokurorluğu ölkənin ikinci prezidenti Robert Köçəryanın qanunsuz əmlakının və onunla əlaqəli şəxslərin 22 daşınmaz əmlakının, 15 müxtəlif şirkətdəki payların müsadirə edilməsini tələb edir. Bu barədə baş prokuror Anna Vardapetyan parlamentində bildirib.
Onun sözlərinə görə, iş üzrə cavabdehlər Robert və Bella Köçəryanlar, Sedrak Köçəryanvə Zarui Badalyan, Levon və Siranuş Köçəryanlar, Qayane Köçəryan və Vigen Çatinyandır: “Prokurorluq Ermənistanın maraqları naminə 985 milyon dram və ya 2,5 milyon dollar məbləğində istiqraz, 1,4 milyon dollardan çox məbləğdə bank əmanətləri, 4 milyon dollardan çox məbləğdə kreditlər üzrə tələb hüquqları, 8,3 milyard dram, 260 milyon rubl və təxminən 590 min avro, iki nəqliyyat vasitəsi və sairin müsadirə edilməsini tələb edir”. Məsələ ilə bağlı “armenianreport” poralı yazır ki, bütün bunların indi baş verməsi heç də təsadüf deyil: “Son günlərin əsas hadisəsi ondan ibarətdir ki, Ermənistan Baş Prokurorluğu Robert Köçəryan və onun ailəsindən Ermənistan Respublikasının xeyrinə əmlaklarının müsadirə olunmasını tələb edir. Respublika ictimaiyyəti təbii ki, Köçəryanların çox zəngin olduğunu bilirdi. Amma yenə də müsadirə olunması planlaşdırılanların siyahısı çox sarsıdıcıdır. Amma yenə də bu, ölkəmizin prezidenti olmuş insanın “halal zəhməti ilə qazandığı”nın cüzi bir hissəsidir. Təbii ki, həyatımızda heç bir şey təsadüfən baş vermir, xüsusən də belə yüksək səviyyədə. Hamı başa düşür ki, indiki iqtidarın guya heç bir qisasçılıq siyasəti aparmadığı barədə sözlərinə inanmaq olmaz. Xatırlayırıq ki, bu yaxınlarda ölkəmizin baş naziri Nikol Paşinyan şəxsən parlamentdə bəyan etmişdi ki, o, Robert Köçəryan və Serj Sarkisyanın hələ də həbs olunmamasının necə baş verdiyini başa düşmür. Hətta ibtidai sinif şagirdi də onun bu çıxışları ilə Respublika Baş Prokurorluğunun hazırkı tələbi arasında əlaqə yarada bilər. Ancaq daha bir vacib məqamı qeyd etmək lazımdır. Məlum olduğu kimi, Nikol Paşinyan Moskvaya səfər edib və onun səfəri İrəvanla Kreml arasında münasibətlərin pisləşdiyini nəzərə alaraq böyük səs-küyə səbəb olub. Paşinyan KTMT-ni açıq şəkildə tənqid edir, Rusiyadan uzaqlaşır və Qərblə əlaqələr qurur. Lakin Moskvaya səfərin özü və Azərbaycan prezidentinin uçmadığı Qələbə paradında iştirak gərginliyi qismən də olsa aradan qaldırmaq istəyindən xəbər verir. Görünür, buna görə Paşinyan Belarus diktatoru Aleksandr Lukaşenkoya zorla yaxınlaşmağa da dözüb. Bunun üçün o, azərbaycanlı əsgərlərin Qırmızı Meydanda keçirdikləri yürüşün şahidi olmağa da razılıq verdi. Çünki paşinyanın açıq şəkildə ifadə edilmiş şəxsi marağı var idi.
İndi hər şey, bütün sirr aydın olur. Paşinyanın Moskvadan qayıtmasından dərhal sonra postsovet məkanının diqqətdə olan siyasətçilərindən birinə qarşı genişmiqyaslı hücum baş verdi. Söhbət indi sadəcə 22 əmlakdan, milyonlarla dollardan, şirkətlərdəki paylardan və digər əhəmiyyətli aktivlərdən gedir. Məsələ ondadır ki, Köçəryanın həbsi üçün zəmin hazırlanır. Bəli, heç də şişirtmirik, sadəcə elan edirik. Və burada aşkar şeyləri aydın şəkildə ifadə etmək lazımdır. Məsələ təkcə Köçəryanın təkcə keçmiş prezident olmasında deyil. Bu, açıq şəkildə rusiyapərəst mövqe sərgiləyən, Kremlə yaxın olan və Rusiyanın siyasi dairələrində tez-tez qonaq olan siyasətçidir. Bu cür iri miqyaslı əmlakın müsadirə edilməsi prosedurunun Moskvadan xəbərsiz başlaması, ən azı, riskli addım olardı. Axı Kreml ənənəvi olaraq postsovet məkanındakı keçmiş sadiq müttəfiqlərinə təsir üçün bir növ “ehtiyat aerodrom” kimi baxır. Nəticə etibarı ilə, belə hərəkətlərin Rusiya ilə razılaşdırıla biləcəyini düşünməyə əsas var - birbaşa olmasa da, heç olmasa səssiz razılıqla. Bundan nə çıxır? Köçəryan artıq Rusiya üçün strateji dəyər ifadə etmir. Bəli, dəyişən geosiyasət kontekstində Kreml hazırkı hökumətimizlə yeni razılaşmalar naminə köhnə əlaqələri “sıfırlamağa” üstünlük verə bilər. Bəli, Köçəryanın gələcək aktivlərinin müsadirəsi təkcə hüquqi proses deyil. Bu, siyasi siqnaldır – həm yerli erməni auditoriyası, həm də beynəlxalq müşahidəçilər bunu güc balansında dəyişikliklərin göstəricisi kimi qiymətləndirirlər. Paşinyanın Moskva səfərindən dərhal sonra belə addımların atılması heç bir şübhə yeri qoymur: Kreml ya razılaşdı, ya da keçmiş müttəfiqinin taleyinə bilərəkdən göz yumdu. Bu isə İrəvanla Moskva arasında münasibətlərdə yeni mərhələnin başlanğıcı demək ola bilər - praqmatik, soyuq, lakin hələ də canlı olan mərhələ”. Bu günlərdə Ermənistanın hakim “Vətəndaş Müqaviləsi” Partiyasının deputatı Vaaqn Aleksanyan da qeyd edib ki, Robert Köçəryan Rusiya xüsusi xidmət orqanlarına işləyir: “Köçəryan söyləyir ki, Ermənistan Rusiyaya xəyanət edib və Rusiyanın düşmənlərinin tərəfinə keçib və buna görə də Rusiya Qarabağda müharibəyə müdaxilə etməyib. Bu, Ermənistanın keçmiş prezidentinin yox, xidmət etdiyi ağalara hər cür bəraət qazandırmağa çalışan Rusiya xüsusi xidmət orqanlarının agentinin sözləridir”. Politoloq Robert Qevondyan Köçəryanın özünü Rusiyanın Ermənistandakı səfiri Sergey Kopırkin kimi apardığını söyləyib. Ekspert sabiq prezidentlə səfirin yerini dəyişdirməyi təklif edib. Ermənistan parlamentinin sədri Alen Simonyan da bildirib ki, Köçəryan Ermənistan Respublikasında Rusiyanın casusu statusuna malikbir şəxsdir. Amma indi Rusiya bu siyasətçinin üzərindən xətt çəkir.
Nahid SALAYEV
