Mehman İsmayılov: "...bu gərginlik Paşinyanın həm siyasi, həm də fiziki məhvinə gətirib çıxara bilər"
Son zamanlar Ermənistan rəsmilərinin Rusiyaya qarşı loyal davranışları, iki dövlət arasında yaxınlaşmalar hiss edilir. Əlbəttə, hamıya bəllidir ki, Ermənistan siyasi bəyanatlarla Rusiyadan qopmaq istəsə də, indiki şəraitdə o bunu bacarmaz. Çünki Rusiya Ermənistana anakonda ovuna sarıldığı kimi sarılıb.
Ona görə də Ermənistanın Rusiyanın ağuşundan salamat çıxmaq ehtimalı hələ ki, yoxdur. Bununla belə, Paşinyan Ermənistanı Avropaya doğru yönəltdiyini tez-tez vurğulayırdı. Hazırda isə o, bu tip bəyanatlarına bir qədər ara verib. Hiss olunur ki, Ermənistan yenidən Putinə yaltaqlanmağa başlayıb. Sizcə ermənilər nə oyun oynamaq istəyir?
Məsələni “Bakı-Xəbər” qəzetinə şərh edən politoloq Mehman İsmayılov bildirdi ki, Ermənistanın indiki durumu çox acınacaqlıdır: "Birincisi ona görə ki, Ermənistan ideoloji cəhətdən param-parça vəziyyətdədir. Erməni tarixində ilk dəfədir ki, erməni kilsəsi ilə Ermənistan siyasi hakimiyyəti arasında dərin uçurum və düşmənçilik yaranıb.
Erməni müxalifətinin arxasında isə Rusiyanın xüsusi xidmət orqanları dayanır. Birmənalı şəkildə Paşinyana düşmənçilik edən daşnakları, erməni kilsəsini və Qarabağ döyüşçülərini Rusiya dövlət səviyyəsində dəstəkləyir. Bir neçə gün əvvəl Rusiyanın Ermənistandakı səfiri Sergey Kopırkin rəsmən Ermənistanı hədələdi. O dedi ki, Ermənistan unutmamalıdır ki, hansı dövlət Qərblə Rusiyanın maraqlarının kəsişdiyi müstəvidə yer alırsa, onu Ukraynanın taleyi gözləyir. Əlbəttə, bu, Ermənistanın siyasi hakimiyyəti tərəfindən çox ciddi qarşılanır.
Digər tərəfdən, Ermənistan Amerikaya və Avropa İttifaqına çox ümid edirdi ki, silah, maddi dəstək və informasiya dəstəyi alacaq. Amma Rusiya-Ukrayna müharibəsi və ABŞ-nin yeni administrasiyasının hakimiyyətə gəlməsi bütövlükdə dünyanın geosiyasi mənzərəsini dəyişdi.
Ona görə də Ermənistan nə Amerikaya, nə də Avropaya ümid edə bilir.
Digər tərəfdən isə, 2026-cı il seçkiləri yaxınlaşır. Ermənistanın siyasi hakimiyyəti hazırda bu problemlərin arasında çabalayır. Bir tərəfdən də Azərbaycana yarımçıq sülh müqaviləsi bağlamaq üçün göstərdiyi təzyiqlər heç bir nəticə vermədi. Azərbaycan sərt şəkildə öz şərtlərini irəli sürüb və Ermənistandan konstitusiyasını dəyişməyi tələb edur.
Bununla yanaşı Türkiyə ilə sərhədlərin açılmasına cəhd göstərdilər. Yenə nəticə əldə edə bilmədilər. Çünki bütün bu məsələlər yalnız Azərbaycanın tələbləri yerinə yetirildiyi halda həll edilə bilər. Belə bir şəraitdə Ermənistan hakimiyyətinin başqa çıxış yolu qalmır. Yeganə yol Rusiyanın qucağına dönməkdir. Üstəlik də Paşinyan anlayır ki, ona ən böyük təhlükə Kremldən gəlir. Başqa tərəflərdən Ermənistan hakimiyyətinə heç bir təhlükə yoxdur. Ona görə də Qərbdən əlləri üzüləndən sonra Rusiyaya yönəlirlər.
Əlbəttə, bu bizim üçun xoşagələn ssenari deyil. Çünki Ermənistan yenidən Rusiyanın çətirinin altına dönməklə Güney Qarqazda həmişəki kimi gərginlik mənbəyinə çevriləcək. Amma indi əsas odur kı, Ermənistan rəhbərliyi bu paraddan istifadə edib, guya Moskvaya pozitiv münasibətdə olduğunu göstərməyə çalışdı. Ermənistan rəhbərliyinə elə gəlir ki, Rusiya Ukrayna cəbhəsində üstünlük əldə edib, amma onlar bunda da aldanırlar. Azimutlarını itirmiş Ermənistan hakimiyyətinin döyə biləcəyi yeganə qapı isə Kremldir. Ona görə də Paşinyan Putinlə gərgin münasibətləri yumşaltmağa çalışır. Çünki bu gərginlik Paşinyanın həm siyasi, həm də fiziki məhvinə gətirib çıxara bilər".
Akif NƏSİRLİ
